Fendo Orella 101.8 FM

[las provincias.es]

O gobierno aragonés negozia con una colla d’interpresas britanicas, australianas, estadounidenses y franzesas la posible construczión d’un gran zentro d’ozio y chuego de bels 2.000 ectareas en Os Monegros, que suposaría una inmbersión que podría plegar dica os 17.000 millóns d’euros. A zercanía a Balenzia, Madrit y Barzelona, asinas como l’augua a embute de l’Ebro, han estau claus ta la macro operazión.

O bizepresidén d’o Gobierno aragonés, José Ángel Biel, confirmó ayer os contactos, en una rueda de prensa dimpués d’o Consello de Gobierno, an que él como lo presidén Marcelino Iglesias dión t’o gabinete detalles sobre o macroprochecto, clamau Gran Scala, que suposaría la construczión de 32 otels- casino, zinco parques tematicos, ipodromo, campos de golf, un gran zentro de trobadas y dica una plaza de toros, y que podría estar rematau en diez añadas, seguntes o Heraldo de Aragón.

Bi adibió que o Gobierno, y personalmén o presidén, José Luis Rodríguez Zapatero, tienen “informazión de tot” d’o mesmo Iglesias y prexinó que si as cantidaz d’imbersión que se manullan se fan reyalidat a la fin, o Gobierno Zentral “no tendrá garra problema en ir a bezinal en infraestructuras”.

A colla d’interpresas britanicas, australianas, estadounidenses y franzesas que empentan o prochecto, que se presentan como International Leisure, tienen un “zereño refirme finanziero”, destacó Biel, que ye tamién presidén d’o PAR.

O bizepresidén i adibió que istos interpresaires no han requerido en garra inte a participación finanziera de l’Echecutibo, que manimenos, podría recaudar al año 600 millóns d’euros en impuestos.

17.000 millóns d’euros
Biel siñaló que “ba dillá d’una imbersión normal”, y por ixo “ye menister un tratamiento espezial”, y cusirará que se cumpla la lechislazión en o tocante a Ordenazión Territorial y Meyo Ambién y a l’atorgadura d’as lizenzias en concretar-se.

Os promotors, son “a disposizión” d’o Gobierno d’Aragón y prestos ta biachar ta la Comunidat ta presentar a suya ideya, cosa que seguntes Biel podría fer-se antis de cabo d’año. O Echecutibo conoix o prochecto dende fa tiempo, y una comisión interdisziplinar, treballa dende chinero “con gran discrezión”, bella cosa que creyó fundamental ta que contine entabán.

Con un coste si fa u no fa de 17.000 millóns d’euros, a imbersión suposa, multiplicar por doze a d’a Exposición Internacional 2008.

Respeutibe a os motibos que han feito que os promotors se dezidisen por Aragón fren a atros puestos, como Dubái u Franzia, dizió que bi ha razóns cheoestratechicas y d’ubicazión, de disponibilidat d’augua y enerchía y, más que más, de puesto.

O bizepresidén esfendió lo prochecto, dizió que “tiene credibilidat” y “más esquimens que incombeniéns” y demandó a la soziedat “una miaja d’ilusión” porque “atros serían goyosos de que les fesen de buen fer as cosas”, en referenzia t’atras comunidaz autonomas que tamién quereban acullir Gran Scala.

O bizepresidén sacó importanzia a las criticas feitas dica agora, mas que mas Izquierda Unida, contra o prochecto y dizió que “me truca lo ficazió que tiengan que benir de difuera ta dezir-nos que somos en un mannífico puesto”, Aragón, an que bi’n d’augua, prou sulero y Monegros se troba alto u baxo a la mesma distanzia de Barzelona, Madrit, Balenzia, Bilbao, ziudaz an que se troba o 75 por zien d’o Producto Interior Bruto (PIB) d’España, y tamién amán de Franzia, expresó Biel.

100.000 abitadors
Reconoxió que puede esluzernar a suya grandaria y cuán sienten as cantidaz que se son manullando y puntualizó que si contina entabán será una fita de “gran traszendenzia t’Aragón”, pero si no, “no s’abrá cazegau cosa”, porque mica será la finanziazión publica. A posible plegada t’Aragón d’iste macro zentro d’ozio y chuego ha endrezau a bels partius politicos a demandar a comparexenzia de miembros d’o Gobierno debán d’as Cortes d’Aragón, ta que espliquen a mida d’as negoziazións y d’o prochecto, sobre o que piden transparenzia.

O prochecto, seguntes se conoxió a semana pasada en Orlando (EE. UU.) en a “Convención Anual de la Asociación Internacional de Parques de Atracciones”, bi incluirá bels parques tematicos, dentre ellos Spyland, que chirará arredol d’o mundo de l’espionache y que estió presentau en a dita trobada, an que asistión representáns d’o gobierno aragonés.

Spyland suposaría una imbersión total de 300 millóns d’euros, encara que en una primera fase se desembolicarían nomás que un casino-otel y dos zonas d’o parque tematico d’as zinco u seis que’n tiendrá. Seguntes o Heraldo de Aragón o zentro tiendrá dos grans dentradas y a zirculazión interior se ferá con una bía t’autos (que discurrirá por l’anillo esterior) y un trambía zircular de doble endrezera, que tiendrá ature en cada una d’as dembas tematicas y que se moberá por l’anillo interior.

A la fin, Gran Scala tiendrá un impacto si fa u no fa igual como una ziudat de 100.000 abitadors (o doble, por exemplo, que Uuesca). Por ixo, caldrá fer en o zentro os serbizios acordes a ixa grandaría.