Fendo Orella 101.8 FM

[Os balcans (18-11-07)]

Kosovo dió en as urnas un esclatero mandau a l’ex dirichén d’a guerrilla UÇK Hashim Thaci ta que lidere o zaguer trango enta a independencia. L’alta astenzión s’explanica por o callizo sin salida, economico y politico, a o que ha lebau a comunidat internacional a iste cantón d’o balcans. Una carrera sin surtida en o que ha sucumbiu parti d’a clase politica local. Dimpués d’os comicios d’o sabado, a unica soluzión a iste ature ye más esclatero que nunca.

Cal saber que o Partiu Democratico de Kosovo (PDK) ye liderau por o líder politico d’a organización armada UÇK (Exerzito de Liberazión de Kosovo), Hashim Thaci que ganó con amplitud as eleczions d’o zaguer sabado. O resultau estió con o PDK conseguindo o 34% d’os botos, diez puntos t’alto d’a Liga Democratica de Kosovo (LDK), fundada por l’extinto Ibrahim Rugosa y que ganó as anteriors dos eleczions dende 1999.

Thaci rezibe asinas o mandau ta lebar a iste terriotiro, formalmén parti de Serbia pero en a practica un protectorau d’a ONU y d’a OTAN, enta la suya ansiada independenzia sin rezagar-se más y por a bía rapeda.

A formazión que agrupa a la mayoría d’os guerrillers albano-kosovars que luitón con as armas en a man en contra d’a dominación serbia en os nobanta conserban antimás as alcaldía d’os suyos grans feudas y arrebata a la LDK belunos d’os suyos tradizionals bastions.

-Más de 20 países d’a UE refirman a independenzia de Kosovo

“Seguntes o menistro d’Europa de Reino Uniu, corresponde a cada país reconocer a existencia d’una nueba nazión”. Iste mesmo dizió o zaguer lunes que más de 20 d’os 27 países miembro d’a Unión Europeya refirman o reconoximiento d’a independenzia de Kosovo.

“Pero en terminos d’o nabego d’iste prozeso, ye un resultau muito millor ta toz os imbolucraus si i hai una máxima unidat internacional”, dizió.

Iste mesmo lunes de maitins, a Unión Europeya ha demandau a o nuebo Gobierno saliu d’a eleczions d’o domingo que no se prezipite enta la independenzia y que pare cuenta d’a opinión d’a comunidat internazional en cualsiquier iniziatiba que tienga en o tozuelo.

EEUU ye partidario d’a independenzia d’a rechión, encara provincia Serbia controlada por a ONU.

Manimenos, a UE se amuestra trestallada sobre l’asunto y bels miembros se resisten a cualsiquier mobimiento enta la independenzia que no cuente con o refirme d’a ONU u d’una amplia parti d’a comunidat internazional.

Seguntes Wolfgang Ischinger, (diplomatico alemán que encabeza a mediazión chunto con responsables rusos y estadounidenses) se ha esforigau cuasi tot umanamén posible ta cuadrar o Status de Kosovo, dando a entender que as posibilidaz d’alcuerdo entre serbios y kosobars son minimas y a independenzia ye l’unico camín.

Serbia ha ufierto una gran autonomía a la rechión tanimientres contine baxo o Gobierno de Belgrado, pero os albanokosobars no azeptan cosa que no siga a independenzia.

Pero bels estaus se oposan a una declarazión unilateral d’independenzia, entre ellos bels estaus bezins d’os Balcans, Alemania y España, y Rusia.

O menistro alemán d’Asuntos Exteriors, Frank Walter Steinmeier, dizió en referenzia a la oposizión rusa que una soluzión alcordada ye millor ta tot lo mundo, tamién ta els.

A UE ye ansiosa ta ebitar una repetición d’as añadas 90, cuan as suyas dibisions internas sobre como cuestionar a guerra d’os Balcans amostrón a suya ineficazia en politica exterior.

Y ye que, tornando ta España, ya en l’año 2005 cuan José Bono, yera menistro d’Esfensa de l’Estau español, dixó esclatero que España se oposa a una posible independenzia d’a probinzia serbia de Kosovo (dixando esclatero a suya imposizión). A o suyo chuizio, a independenzia trayería “problemas” ta Serbia (no se si más puede tener-ne) y “mui seguramén” ta o conchunto d’Europa ya que podría aber qui “fese siñal” d’a independenzia d’a probinzia, en referencia a os nacionalismos en España.

Dende 2005 ya emos puesto beyer a independenzia de Montenegro, por a que abión de tragar os diplomaticos españols y mui mal se han de dar as cosas ta que no tornemos a beyer luego a sezesión d’atro país d’Europa, dimpués d’es atros países balcanicos, a separazión de Checoslovaquia u as ex – republicas sobieticas, …

Bel diya puestar que le toque l’inte a España, pero asperemos que no se aiga de plegar a una situazión tan dramatica ta conseguir o consenso internazional.