Fendo Orella 101.8 FM

Onze colectibos ecolochistas han presentau güe un manifiesto an que demandan o buedau controlau de l’entibo d’Itoitz, l’ature d’a recrexedura de Yesa, una nueba politica idrolochica, y a “libertat sin condizions” t’o miembro de Solidarios con Itoitz Julio Villanueva.

Os colectibos “Amigos de la Tierra, Coagret, Ekologistak Martxan, Greenpeace, Gurelur, Lurra, Asamblea de Vecin@s Amenazad@s por Itoitz, Coordinadora de Itoiz, Iniciativa Ciudadana Yesa No Vida Sí, Nueva Cultura del Agua de Navarra y Solidari@s con Itoitz”, han presentau o documento en rueda de prensa en Iruñea.

O texto remera a oposizión que o prochecto ha teniu dende o suyo empezipie en bels colectibos ecolochistas, as percusions que ha teniu o suyo plenau (con más de 1.300 seísmos dende chinero de 2004) y a “inzertidumbre” d’os bezins d’a redolada, igual como os de Zangoza, amán de l’entibo de Yesa, cuala recrexedura ye previsto.

Debán d’isto adiben en o suyo manifiesto l’ature iste pasau berano de Julio Villanueva, uno d’os actibistas de Solidari@s con Itoitz que fa onze añadas tallón os cables que transportaban formigón ta la construczión d’a presa, y que agora cumple una pena “inchusta y esmesurada de tot” porque o sabotache “tenío puesto en un contexto de desamparo y impotenzia”.

Esfienden os siñáns que en ixa aczión os actibistas de Solidari@s con Itoitz ” i actuón mobius por intreses colectibos como a esfensa y proteczión d’o meyo ambien” y que a suya remanenzia en libertat “no fa garra alarma sozial”, por o que consideran que a suya “echemplar condena no tendría atra fin que a de disuadir y fer miedo a la disidenzia”.

De todas trazas, advierten d’os “risques d’esferra irreparable” que a suyo parixer contina tenendo l’entibo por a “contrimostrada baquiabilidat d’a ripa cucha” y os “continos mobimientos sismicos”.

Semana contra la id-itoiz-ación

Por a suya parti, han anunziau o desembolique d’a “semana contra la id-itoiz-aci-ón” en Iruñea. Se ferá d’o 17 t’o 22 d’abiento en Zabaldi (Iruñea). Dentre atras actibidaz se i ferán charradas y procheczions de bideo. Atamás, o zaguer diya, o sabado 22 os astí congreus podrán partizipar en a kalejira parada dende a Plaza de Nabarrería dica a garchola ta demandar a libertat de Julio Villanueva.