Fendo Orella 101.8 FM

[11/12/2007 EFE]

O Diya d’as Fuerzas Armadas se zelebrará en Zaragoza en 2008, añada en a que tendrá lugar a Exposizión Internazional “Augua y desembolique sostenible” y en cuala seguridat colaborarán bels 2.000 militars, seguntes anunzió güe o ministro d’Esfensa, José Antonio Alonso.

En una conferenzia de prensa dimpués d’arroclar-se con o presiden d’Aragón, Marcelino Iglesias, y con l’alcalde de Zaragoza, Juan Alberto Belloch, Alonso explicó que o Diya d’as Fuerzas Armadas ye un “diya gran” y o “más importan” t’o Ministerio d’Esfensa, a o que antimás i asisten, a ormino, os Reis d’España y os Prinzipes d’Asturias.

Se trata de una chornada que mobiliza una esfilada de bels 3.000 efectibos y toz os trastes d’alta tecnolochía mesos a disposizión d’os tres echerzitos, dizió lo ministro, qui aseguró que ye seguiú por muitos ziudadans y bi incluye una semana plena d’actibidaz ta fer conoxer “cómo son as Fuerzas Armadas, cualo ye l’inte en o que biben y a suya calidat, cualo ye o suyo presen y cualo ye o suyo futuro”.

Indicó que se desembolicará en os meses d’abril u mayo d’a benién añada y sobre as razons ta eslexir Zaragoza como ziudat ta zelebrar ista esfilada, remeró que conzide con o bizentenario d’a Guerra d’a Independenzia y con o desembolique d’a Expo.

Sobre ista zaguera cuestión, subrayó que o Ministerio d’Esfensa quiere aduyar a que una zelebrazión “tan importa” t’Aragón y ta la ziudat como ista fita internazional “siga realzada lo maximo posible”. “Zaragoza -remeró- ye una ziudat que tiene un ligallo tradizional istorico importantismo con as Fuerzas Armadas”, tiene “un sobrebuén presén” y un “sobrebuén futuro”, ya que grazias a o prozeso de modernizazión de l’Echerzito lo numero d’efectibos presen en a ziudat se incrementará un 24 por zien, isto ye, bels 1.500 efectibos más, afirmó Alonso.

O ministro anunzió d’a misma traza que 2.000 militars colaborarán con a Polizía Nazional, a Guardia Zibil y a Polizía Local ta guaranziar que os ziudadans puedan disfrutar con total seguridat d’a Exposizión Internazional que se zelebrará en Zaragoza d’o 14 de chunio t’o 14 de septiembre. O Ministerio d’Esfensa ba a “treballar a bezinal” y colaborará en fainas de seguridat mientres a Expo, que “ye lo que millor sabe fer l’Exerzito”, dizió Alonso, a l’inte insistió en que concretamen se dedicarán a la “seguridat aerea y a la proteczión de determinadas infraestructuras criticas que mos baigan dizindo” los responsables.