Fendo Orella 101.8 FM

Que malos son os badistas

No cal que enchegar a tele u ubrir cualsiquier papel comerzial ta saber con quí emos de carrañar-nos istos diyas: no bi ha dreito a que uns trazóns badistas empuerquen premeditadamén o metro de Madrit, ye impreszindible rematar con ista bada. A o cabo y a la fin somos cliéns y o clién siempre tiene a razón.

Prexina que bel teruelano d’afillatura u de paso por Madrit se l’alcurre pillar o Metro sin saber mica d’ista bada. Talmén os preséns nabidencos d’o Corte Inglés i pillen cualcosa d’ulor a podriu, ontindo los suyos dreitos como consumidors por culpa d’istos radicals.

Y nusatros nos miramos a os nuestros arredols y asentimos, pues i somos feitos a creyer en as parolas sentadas y razonables d’os que más saben. Y no mos importa no saber.

Por atro costau, ¿qué demanda ista chen? ¿De qué se quexan? ¿Talmén no’n tienen de treballo? Quieren, dentre atras cosas, un mesmo chornal ta toz os que fan o mesmo treballo independienmén d’a interpresa que les (sub)achuste u d’o suyo ran profesional, estabilidat y achuste indefiniu, una chornada de 35 oras laborals, puyada de chornal que a bida ye muito cara y un plus de periglosidat chustificau de raso, y prezisar qué mena de fainas pueden fer u no pas as treballadoras preñadas.

Sí, y tamién a luna. A bier qui disfruta d’ixas bentaxas, a bier qui, dentre toz os que pillamos o metro maitín par d’atro, tenemos un treballo fixo y estable, y puyadas de chornal, y una Tabla Salarial unica ta toz os compañers, cuan muitas begadas no sé quí ye quií treballa a o canto mio, ni qué interpresa le bosa, ni por cuanto tiempo y de qué trazas. ¡Y 35 oras a la semana, ola! Y lo d’as preñadas… millor que se queden calladetas, no baiga a estar que as espachen. Porque en o mio treballo lo fan, ¿no?, yo lo he bisto, y yo no plego nian ta mileurista, y treballo más de 40 oras y plego tardi ta casa mia y de cabo cuán pringo los cabos de semana y casi no tiengo bacanzas, y no me’n quexo. ¿Por qué han de fer-lo istos, y antimás fotiendo a la resta?

Pero a bida tamién ye puerca y fa encara mas fastio, y con tot y con ixo, dengún mos diz que mos carrañemos por ixo, ni sisquiá que paremos cuenta d’ixa cochinada y d’ixa pudridura. Porque toz emos bisto asabelo de begadas o bideo d’a siñora que s’esbariza por l’azeite, ¿berdat?, pero lo bideo d’os treballadors que diya par d’atro s’estampan en a obra que no’n tiene de midas de seguridat, u que les i esclafa la maquina que sin tasamén preparazión les han meso dentre as mans, ixe bideo no lo meten en telebisión, ni en garra puesto.

Y a telebisión tampoco no mos rezenta qui son as pobretas interpresas que consideran “inasumible” a puyada d’o chornal, como Ferroser y Eurolimp, fillals de Ferrovial, que muebe más de 10.000 millons d’euros en a Bolsa, u CLECE, que pertenexe a l’ACS-Dragados de Florentino Pérez y a suya galaxia de lucro y angluzia. No, nunca no bieremos en telebisión una d’as suyas chuntas d’aczionistas, cuan bi deziden os espachaus y se reparten os esquimens y blindan as indemnizazións y as “stock option” d’os suyos mainates, no, ixo no lo bei dengún, no siga que uno s’ature a pensar y contimpare a suya bida y a d’os suyos explotadors, porque ya se sabe que as contimparazións son odiosas, y periglosos os malos pensamientos.

Que dengún s’estranie allora que deban de semellán panorama, que ye tamién de nusatros y por ixo mos estorba de tot cualsiquier cosa que se surta d’os regles y que puye o tozuelo y que s’atriba a concarar-se a os que mos pataquian en o treballo, u cuan buscamos bibienda, u cuan mercamos toz os cataticos y trastes que mos benden a pré d’oro y que no mos curan ni de l’aburrimiento ni d’a tristura. Debán de semellán panorama contra o que casi dengún fa cosa y practicamén toz baxamos o tozuelo igual como femos en o metro ta no mirar-nos fito fito, que dengún s’estranie que por una begada una bada no siga una bada escoscada, isto ye, decoratiba y inútil, sino salbache, dezidida y a por todas. Si no, ¿ta qué fer-la? ¿Se trata de fer buena pacha, u de sacar treslada barallando? ¿L’esclau ha de fer-se a rialleta, u mosegar?

Talmén no ye que pueda y aiga d’alcordarme d’ixo que se deziba solidaridat, y refirmar a suya luita, sino que podría empezipiar a imitar os suyos metodos ta fer-los serbir astí an que más me fa mal, en o mio propio treballo, astí an que naxe tot ixe resentimiento y toda ixa rabia que dimpués bulco sobre os que nomás tienen a “culpa” de no aconortar-se, y de luitar por os suyos dreitos.

Talmén cal prenzipiar a empuercar a ofizina, y a fabrica, y as aulas, y as carreras, y a ziudat entera ta escoscar a bida.

Talmén cal prenzipiar, simplemén, a dixar de tener tanta medrana. Y de reconoxer como compañers a os que ya han dixau de tener-ne.

Solidaridat
Ta las interpresas conzesionarias (Valoriza, Clece, Eurolimp y Ferroser), ta Metro de Madrit y ta la propia Comunidat de Madrit, iste conflicto ye un mal exemplo que cal redotar como siga, ya que suposa bella cosa más que un conflicto laboral, suposa la renaxedura de cualcosa que cada begada ye de pior trobar: UNIDAT SINDICAL. Prenzipiamos l’andadura os seis sindicatos representatibos en l’escosque de Metro (CCOO, UGT, CGT, USO, SUT y CNT), pero CCOO refusó partizipar en a combocatoria de Bada, rematando como traidor t’os suyos afiliaus y Delegaus, que sí son partizipando-ie de tot.

As interpresas, como quedó platero en a zaguera proposa feita en a reunión que se zelebró con ellas dentre os diyas 28 y 29 d’Abiento, quereban igualar a toz os treballadors a la baxa, isto ye, sacandoles as milloras sobre o combenio colectibo a os que ya las disfrutaban, mientres nusatros lo que queremos ye igualar ta toz as millors condizións economicas y sozials ya existéns. Nomás que en chornal somos charrando d’esferenzias de dica 400€ mensuals dentre treballadors que treballan escoscando garas esferéns pero en a mesma línia de Metro.

A la fin, dimpués de l’Asambleya Cheneral de treballadors feita ayer, a Bada contina, atamás de que a suya larga durazión ya ye causando un importán problema economico t’os badistas. Por ixo en a mesma Asambleya s’enzetó una Caxa de Resistenzia, en una pocha de plastico, que se bi emplió con casi 1500€ que aportón os asistens, belúns han estau espachaus y nian han cobrau a nomina d’iste mes. Ya ye disponible una cuenta bancaria de SOLIDARIDAT an que tos demandamos que i aportez l’aduya economica que podaz.

A cuenta bancaria de Solidaridat-Caxa de Resistenzia ye:

BANKINTER: C/C 0128 – 0044 – 91 – 0500002092

En cada ingreso u transferenzia s’ha de meter en CONCEPTO:

SOLIDARIDAD HUELGA DE LIMPIEZA DE METRO

Tamién tos demandamos que imbiez faxes de solidaridat y refirme a o 915543899, igual como correus electronicos ta l’adreza cgt.limpiezas@mi.madritel.es