Fendo Orella 101.8 FM

Uno d’os dos chobens lesakarras detenius ayer por a Guardia Zebil en Arrasate, Igor Portu Juanena, ye ingresau en a UVI de l’Espital Donostia en estau grau, con dos costiellas crebadas y trencadura polmonar, antimás de moraduras por tot lo cuerpo y una emorrachia en o güello cucho. Dende ayer ye isolau en mans d’a Guardia Zebil, que ista maitanada ha rechirau os domizilios de Portu y de Mattin Sarasola en Lesaka.

07/01/2008 9:20:00

LESAKA-. Igor Portu Juanena, que estió aturau ayer en Arrasate chunto a o tamién lesakarra Mattin Sarasola, ye ingresau en a UVI de l’Espital Donostia, seguntes ha puesto saber GARA y ha confirmau Askatasuna.

L’organismo antirrepresibo ha informau de que a la familia d’o choben, que permanixe isolau en mans de l’instituto armau dende que estió aturau, l’han siñalau que tiene dos costiellas crebadas y “problemas polmonars”.

Seguntes o parte medico de l’espital t’o que ha teniu aczeso a medico Mati Iturralde, o choben tiene una “trencadura de l’arco costal de dezaga d’a nobena costiella cucha”, amás de “una importán dentrada d’aire en o cobaxo d’os libianos y d’entrada d’aire en o libiano cucho”, isto ye, en as suyas parolas, “bi ha abiu crebadura polmonar”.

Antimás, o parte medico siñala que Igor Portu tiene “moraduras en arco d’o peito anterior y posterior y en l’esquinazo” y o güello cucho con moraduras y emorrachia aintro d’o güello.

L’informe de l’espital tamién fa bier que “o pazién tiene trucazos con puños y patadas en cara, arco d’o peito y meliquera y extremidaz inferiors”.