Fendo Orella 101.8 FM

O zaguer chuebes 13 d’Abiento petenaba con una amiga por debán d’o Corte Inglés de Zaragoza. Os chuebes gosan benir escritors a siñar libros, y al beyer muita chen en a dentrada en ringlera, a mía amiga me proposó amanar-nos-ie, porque si bi eba chen ye porque bi abría bel escritor famoso. Asinas que nos i amanemos, y cuan i pleguemos nos trobemos con bella cosa no asperábanos.

Lo primero que i beyemos estió un cartel chigán de José María Aznar, con o titol d’o suyo nuebo libro y una foto suya de grandaria XXL que ye a imachen d’a portalada d’o suyo libro an que i amanixe triunfador y prepotente. “No puede estar”, diziemos, “no puede estar él aquí”. Y con un ñugo en l’estomago i dentremos. Allí bi eba muitas más copias d’ixe fierismo y menazador cartel apegaus por toz os puestos, y una ringlera prou gran de chen, más que más muller y ombres mayors, encara que tamién bi eba unas ninas con uniforme d’escuela pribada. Y dezaga d’a ringlera una mesa rodiada de guardaespaldas bestius de trache con trazas de matons do yera posau Aznar.

Nusatros yéranos esluzernaus de tot. No nos podébanos creyer que tenésenos a tres metros de nusatros a o expresidén, un ombre corresponsable d’a muerte de 700.000 personas en Irak, que partizipó en una guerra ilegal y inchusta, que no estió aprebada ni por o Consello de Seguridat d’a ONU nian por o Congreso d’os Deputaus de l’estau español, que ha prebocau que un país lebe cuatro añadas y meya en una situazión de kaos, debastazión y muerte con a unica fin de manullar os suyos recursos petroliferos.

A la finitiba, un criminal de guerra que ha quedau impune de tot y agora se adedica a continar fendo fortuna con negozios barios.

En ixe inte nos planteyemos que talmén abríanos de dizir-le bella cosa, ya que pensemos que, debán de gobernantes d’ista mena, o correcto ye denunciar a suya condizión chilando. Asinas, que, antis d’abandonar o local, nos coloquemos debán d’a mesa, en frén d’Aznar, y le chilemos: “¡Asesino!, ¡Terrorista!, ¡Sinvergüenza!”, y nos chiremos y escomenzipiemos a caminar enta salida.

En l’inte en que plegábanos de surtir d’o Corte Inglés, se nos amanón un ombre y una muller y nos sacón a placa de polizía.

Os dos polizías locals de paisano nos demandón que nos identificásenos. En ixe inte, de no saba an, prenzipión a surtir policías nazionals uniformaus, amostrando-nos a magnitud d’o despliegue polizial que bi eba ta “protecher” a firma d’o libro, antimás de toz os guardaespaldas, d’os cuals belunos surtión dezaga nusatros.

Cuan os dos policías locals nos eban identificau, l’ombre s’amanó enta nusatros ta dizir-nos que lo que ébanos feito yera una “chiquillada”, que no podébanos fer ixas cosas, pero que podébanos marchar que no creyera que nos ise a pasar cosa por isto.

En ixe inte, s’amanó uno d’os polizías nazionals y nos dizió que no, que marchásenos encara. A policía nazional me demandó atra begada a identificazión, y me prenzipión a fer preguntas sobre o mío domizilio, telefonos, estudios etc. Tot lo rato endrezando-se nomás enta yo, y pasando d’a mía amiga en un alarde de masclismo (talmén consideraban que por estar muller no yera garra peligro).

Dimpués de tener-nos asperando por meya ora, suposo que nomás ta intimidar-nos, me ufrión siñar una piñora, de nuebas nomás a yo, por aber prenzipiau un escandalo publico, que prou que me negué a siñar.

A tamás d’a impotencia que fa saber que un criminal como Aznar, puede fer una gambada tranquilamén, entre midas de seguridad increyibles, gozando d’impunidat. Emos de pensar que, encara que no se faiga chustizia en os tribunals, cuan os gobernantes son corruptos, criminals, capables de prebocar muertos por as suyas ansias de diners y poder, o pueblo ha de deber denunciar-los publicamén, tan altero y esclatero como se pueda.

No ye a primera begada

As firmas de libros d’Aznar más de una begada han estau contestadas, de trazas alto u baxo espontaneas, por chobens que han denunziau a figura de l’expresidén. Asinas en 2004 dos vallisoletanos estión absueltos por clamar a Aznar asesino y chilar “no a la guerra” en a firma d’o suyo libro “Ocho años de gobierno. Una visión personal de España”. En 2005, unatra firma d’atro d’os suyos libros: “Retratos y perfils. De Fraga y Bush”, se beyó interrumpida en Barzelona por una colla de chobens que chilón contra la guerra y acusón a Aznar de ser responsable d’os atentaus de l’onze M.