Fendo Orella 101.8 FM

Cuan l’Asociación de Víctimas del Terrorismo (AVT), con José Alcaraz debán, dezidió enzetar una campaña de “acoso y derribo” contra la colla de hardcore-punk Soziedad Alkohólica fa ya más de dos añadas, nunca no pensó que tot remataría asinas. Dimpués d’asabelo chuizios contra la colla basca, con enchaquia d’as suyas probocaderas letras, calificadas por l’asoziazión como “contrarias a l’estau de dreito” y “aponderaderas de l’independentismo radical basco”, l’AVT ha estau condenada a bosar 4.000 euros por prechudizios ta la banda de punk, en entender o chuez que as suyas cantas dentran en o marco d’a libertat d’expresión.

Ixa campaña disfamadera eba teniu os suyos fruitos mientres, si fa u no fa, dos añadas. L’AVT eba espardiu por toz y cada uno d’os conzellos d’os lugars an que S.A. teneba prebista una actuazión ta que os suyos alcaldes i biedasen os conziertos. Atamás de que en bels comunicaus, Soziedad Alkohólica aseguró a suya desvinculación d’a banda terrorista ETA, l’AVT continó afirmando reiteradamén que istos refirmaban o terrorismo independentista basco.
Pero as aizions de l’AVT no rematan astí. Fendo serbir a suya condizión de bictimas, han iu alquirindo poder politico en a soziedat española, muitas begadas caminando d’a mán d’o Partiu Popular, con qui han feito ligallos en bellas manifestazions refirmando, dentre atras cosas, l’autoría d’ETA en os atentaus yihadistas d’o 11 de Marzo en Madrit. Tamién de conchunta, consiguión atro reto a costa d’as deleras de ziens y ziens de chobens: aturar o festibal Lumbreras Rock de Murzia, en biedar l’actuazión d’una d’as suyas bandas, a italiana Banda Bassotti. Os organizadors se trobón obligaus a lebar-se l’acontezimiento t’atro puesto como protesta a la zensura por parti de l’asoziazión y d’o PP, partiu gobernán en a localidat.