Fendo Orella 101.8 FM

O zirco meyatico PP-PSOE y o plante d’a cucha antiespañolista no pueden estar fenomenos más luens, pero tienen o efecto común de que ta toz os antiespañolistas istos comizios quedan asobelo de luen. Os independentistas no han sentiu cosa d’o suyo, y sí muita fribolidat. Y os partius que irán enta as urnas no explican qué se puede fer reyalmén en Madrit por a independenzia, contra la ilegalizazión u por as luengas reyalmén discriminadas, y asinas, asinas…

Dizen os expertos que Zapatero ha afinau más que Rajoy al triar os traches ta las rufiertas; os suyos yeran más duros, no se arrugaban tanto, y ixo potenziaba a suya imachen de presidén. A suya diczión tamién ha estau millor; a o suyo ribal le ha pesau ixe defecto d’arrastras as “eses” a la fin d’as frases, y tamién a traza en que os güellos se le’n iban ta o cronometro en o primer round. ¿Y quí no beyó o lunes a George Clooney dezaga de Zapatero cuan esbotó a suya millor sonrisa ta deseyar “Buena nuei… y buena suerte”? Bels zeños de Rajoy, a la contra, remeraban a un personache de cómic: Popeye. Los dos iban bien rasuraus, ixo sí, no como Nixon, que perdió aquella rufierta electoral en as añadas 70 por afeitar-se masiadas oras antis y presentar-se-ie en a tele con unas trazas asabelo de chandras.

Lo anterior puede parixer una fatera. Y en ye. Pero istos son belunos d’os argumentos con que os meyos españols han calibrau o resultau os cara a cara entre o líder d’o PSOE y d’o PP. Con elementos asinas se decantan unas eleczions en l’Estau español. Asinas que no ye estranio que muita chen se quede o domingo en casa y se’n baiga ta o mon a pisar a nieu.

O tochet meso en as trazas d’a campaña española dixa beyer a manca de fundo d’a custión: PSOE y PP se diferenzian en o canto d’un duro. A la ziudadanía independentista no tienen garra soluzión que ufrir-les. A superfizialidat d’os dos teleshows de Madrit sona insultán de tot en puestos que ansían con urchenzia salir d’un conflicto politico que lastra bellas chenerazions. Un Estau en o que, dimpués d’o zaguer chiro de tuerca, se bieda botar a qui quieran a 200.000 personas a las que a nina de Rajoy u a color d’a corbata de Zapatero, como ye lochico, les bufa la pocha.

Os/as independentistas nomás somos una perra de cambio en o fuego cruzau entre Zapatero y Rajoy. O primero acusa a o segundo d’aber crebau todas as mugas en ista lechislatura, porque nunca antis o partiu d’a oposizión no baralló a o Gubierno de turno fendo serbir a suya politica sobre Euskal Herria. Manimenos, Zapatero tamién fa serbir a os independentistas tanimientres no da garra soluzión, nomás a imposizión y o silenzio a cualsiquier oposizión a la cultura españolisima y tot lo que isto conlleba.

O fenomeno tornará a pasar iste domingo. Y ye más que seguro lo faiga puyar. España con as suyas campañas buedas de conteniu y cargadas de superfizialidat, lo mete fázil.