Fendo Orella 101.8 FM

O diya 28 de marzo de 2008, a las 11:15 d’o maitín, a PEA (Plataforma en Esfensa d’a luenga Aragonesa) dio una rueda de prensa con a fin d’explanicar a situazión de l’aragonés en a Expo, as proposas que s’eban realizadas y as rispuestas por parti d’os que paran dito ebento.

En a cambra d’a FABZ (carrera San Bizén de Paúl, 29), s’achuntón arredol d’unas 40 personas y tamién i acudión meyos de comunicazión como RadioEbro y AragónPress, y representans de dibersas instituzions como l’Academia de l’Aragonés. A los presens se les dio una copia d’o manifiesto de protesta por a situazión de l’aragonés en a Expo y un dossier an que s’explicanicaban con detalle as esferens situazions de manca de respeto y de conzienzia lingüistica por parti d’os risponsables d’Expoagua.

En un primer momento se prozedió a l’amostranza d’un powerpoint, explanicando lo que ye a PEA, a suya finalidat, a suya carauterizazión, os suyos ochetibos y todas ixas autibidaz, queixas y proposas que eban feitas dende a suya creyazión.

Tras dito powerpoint se fazió a leutura d’o manifiesto de critica a la situazión de l’aragonés en a Expo y se comentón os esferens aspeutos d’o dossier. S’ufrió un chiquet turno de parola ta posibles comentarios y dandalos por parti d’os presens, en o que se trató d’una traza más funda as nuestras aizions con respeuto a iste tema, as rispuestas que os risponsables d’Expoagua nos eban dau y tamién temas d’organziazión d’a PEA y a estruturazión d’o mobimiento en esfensa de l’aragonés en asoziazions en relazión a la propia plataforma.

Ta rematar se prozedió a la leutura y comentario de l’argumentario de la lengua aragonesa, o cualo nos fazió onra ta comentar y argumentar a nuestra postura con respeuto a temas delicaus tocans a l’aragonés, como puestar a suya relazión con a resta de luengas romanicas, a suya sozializazión y o suyo esbenidero, mirando de deixar platero toda mena de dandalos y malentendius que podesen apareixer.

Dimpués de poco más d’una ora de rueda de prensa, se remató agradexiendo aa los presens a suya asistenzia, ufrindo siempre a nuestra colaborazión a toda iniziatiba en pro de l’aragonés como plataforma en esfensa d’a luenga y remerando que 2008, añada conoixida en Zaragoza y Aragón por a zelebrazión d’a Expo, ye seguntes a UNESCO l’añada internazional d’as luengas minoritarias.