Fendo Orella 101.8 FM

Os cambios que se son produzindo en o Pirineo aragonés son l’alazet d’o documental “Territorio d’abellas, paisache d’ombres”. O suyo director, Daniel Orte, ha replegau imachens y testimonios d’abitadors d’a cordillera, y expertos en temas meyoambientals, ta fer conoxer os suyos pensamientos y opinions, creyando un documento actual y que amuestra de tot as contradiczions que se son bibindo en istos intes en a cordillera pirinenca.

O documental ba estar presentau o pasau 11 d’abiento, consonando con o Diya Internazional d’as Montañas y cuenta con o refirme d’a Plataforma en Esfensa d’as Montañas d’Aragón, ya que “bi amuestra la situgazión actual y ye feito dende o Pirineo”.

A bista d’a situgazión d’o Pirineo se troba en Benás, encara que como siñaló Daniel Orte, “ye trespolable ta tot lo territorio pirinenco”, “he quiesto amostrar a percusión que i tiene o mundo global, o que busca lo rapido y lo comodo, que no ye siempre lo millor y antimás, sin parar cuenta d’ixas personas que leban muitas añadas reflexionando-ne”.

Daniel Orte naxió en Madrit en 1974 y en l’añada 2000 se’n fué a bibir t’a bal de Benás, dimpués d’aber petenau o Pirineo, os Alpes, os Andes y mesmo parti de l’Imalaya. Ha treballau en a gara d’esquí de Zerler, de guía de montaña y de guarda, y en o suyo tiempo libre fa cortos, alazetaus en tematica montañera y conserbazionista. Son d’él os documentals “A mia zaguera bal” y “Acta de defunzión d’Espelunziecha”, que tenión prou reconoxedura y empentón a filmazión de “Territorio d’abellas, paisaches d’ombres”.