Fendo Orella 101.8 FM

A raza ansotana ye orichinaria d’o noroeste d’a probinzia de Uesca, mas que mas, d’as bals d’Echo y Ansó, d’iste zaguer prene o nombre.

Güé, se troban exemplars en istas dos bals, antimas de en bels lugars d’as Zinco Billas, an os pastors bendeban bels exemplars cuan feban a trasumanzia.

A raza Ansotana s’esferenzia d’a Rasa Aragonesa en que tien as garras más curtas, y son más chicotas. Tienen o perfil más rectilínio que a Rasa. D’atra man, l’Ansotana tien o bellón más largo, ye más rustica, tien bellón por as axilas, cuello, bientre, parti bentral y calzons. Os masclos tienen cuernos y tamién en tienen bellas fembras.

A raza Roncalesa tamien ye parellana a l’Ansotana, d’a que s’esferenzia en que a primera porta moño, isto ye, son moñudas.

Autualmen son d’aptitut carnica nomás, pero antismas se emplegaban ta dar lei, lana y carne; de feito, a raza Ansotana estió, dimpués d’a Merina, a prenzipal produtora de lana.

No se sabe guaire bien si l’Ansotana deriba d’a Rasa o bizebersa, pero de todas trazas as dos tienen un orichen común, asinas como tamien a Roncalesa.

A raza ansotana no se troba en periglo d’estinzion, contando en 2005 con 1450 exemplars inscritos en o suyo Libro xenealochico.