Fendo Orella 101.8 FM

O patronato d’o parque natural d’as bals ozidentals estio constituyiu o martes en Echo, con l’ochetibo de colaborar en a chestión d’iste espazio. O director cheneral de desarrollo sostenible y biodibersidat, Alberto Portero, partizipo en l’auto de constituzión d’iste organo consultibo, que cuenta con representans d’os conzellos incluyius en l’aria d’o parque, a redolada d’a Chazetania, ecolochistas, asoziazions, propietarios y d’atrás instituzions. A lai d’aprobazion d’o parque natural guaranzia la partizipazión instituzional y sozial d’o territorio por meyo d’a creyazión d’iste amplo organo consultibo y de partizipazión sozial.

O Parque natural d’as bals ozidentals estió aprebau por lai d’as Cortes d’Aragón o 14 d’abiento de 2006, con o que aragon pasó a contar con 4 parques naturals: Posets-Maladeta, Guara, Moncayo y as bals ozidentals. Iste parque natural tien una extensión de 27.073 ectarias y una zona periférica de protezion de 7335 ectarias. D’atra man, se delimita un aria d’influyenzia sozioeconomica d’o parque natural d’as bals ozidentals, integrada por o conchunto de terminos monezipals an se troba l’espazio natural, que son ubicaus en a redolada d’a Chazetania y afeuta a os terminos monezipals de Aísa, Ansó, Aragüés d’o Puerto, Borau, Chasa, Bal d’Echo y Canal de Berdún.

Faunisticamen, l’ambito d’o parque natural cuenta con una gran riqueza en cuanto a dibersidat d’espezies y a la suya importancia ecolochica, y dende un punto de bista floristico, esisten dos zonas calificadas como claus d’intres botanico, con una alta dibersidat floristica: os mazizos de Peña Forca, Petraficha y a Mesa d’os Tres Reis constituyen o primer d’ellos. O segundo, se situga en os mazizos d’Aspe y Bisaurín, plegando dica o mazizo de Collarada. Destacan os pastos alpinos y subalpinos, por albergar a mayor parti d’as plantas consideradas rarizas, asinas como gran parti d’os endemismos pirinencos localizaus dentro d’o Parque.

D’a mesma traza, cal destacar as masas forestals, por o suyo gran balor biolochico, de nasarro, fau y abete.