Fendo Orella 101.8 FM

Un guarda forestal se topó con l’animal en o munezipio nabarro de Garde

O Gubierno de Nabarra ha obteniu material grafico y teunico sobre a presenzia d’un onso en a bal navarra de Roncal por primer begada en diez años, dimpués de que una colla de guardas beyese, a nomas güeito metros de distanzia, un exemplar en a zona de Garde.

Manimenos, estarán os estudios d’ADN os que determinarán si se trata de Camille, d’o que no se teneban notizias direutas encara que s’eba deteutau una dezena larga d’enrestidas a ganau, o si puede estar un exemplar procedén d’os que se introduzion en Uesca (os clamaus Aspe y Nere son os más probables), encara que por l’inte lo han baltizau como Ponciano.

O primer abistamiento estió a zaguer semana cuan un guarda forestal trobó en un pinar de Garde o puesto an podría dormir l’oso con restos de pelo y fezes. A l’atro’l diya i regresó acompañau de guardas d’o Serbizio de Meyo Ambien, qui confirmoron a presenzia d’un onso pardo en o lugar. Pero cuan reculliban muestras ta reyalizar as pruebas d’ADN, a 15 metros les aparixió un onso que, con paso lento y despreocupau, s’amanó enta ellos.

Se da la zircunstancia de que mientres iste onso se muebe por o termino de Garde, en os paraches de Larra y Ukerdi s’han trobau atros rastros que no han puesto estar identificaus, y que apuntan a la posibilidat d’un segundo exemplar.