Fendo Orella 101.8 FM

A organizazión ecolochista WWF alerta de que a reduzión d’a capa de chelo en o Mar Baltico ye probocando a muerte masiba de crietas de foca anillada, que “mueren de fambre y fredor” por beyer-se obligadas a dentrar masiau luego en l’aigua.

A foca anillada d’o Baltico (Pusa hispida botnica), espezie protechida y en periglo d’extinzión, cría a os suyos bebés en espelungas de nieu y chelo dimpués d’a naxedura d’istos, que se produz entre chinero, febrero y marzo. Cuan as crías han enzebiau prou como ta tener una gruesa capa de grasa que as protecha, salen a las cheladas aiguas d’o Baltico.

Pero a influenzia d’o ser uman en o cambeo climatico ha afeutau a o suyo ziclo de reproduzión, con un d’os ibiernos más calidos y menos chelaus d’os zaguers 300 años en a rechión. “Como o deschelo se produz prou rapedo, as crías se beyen abocadas a dentrar en l’aigua mas luego d’o normal”, sin conseguir acumular a grasa amenistada ta que as protecha, por o que “mueren de fambre y fredor”.