Fendo Orella 101.8 FM

A maitinada de l’11 d’abril de 1993, Guillem Agulló ba morir a Montanejos, muerto d’una naballada, a mans d’una colla de chobens. Una ripa d’organizazions de cuchas denunzión que o mobil d’o crimen eba estau politico, ya que os chobens que prenión parti en l’asesinato yeran conoxius por a suya ideolochia d’extrema dreita y españolista. Toz os partius politicos refusón os actos, fueras de PP y Unió Valenciana.

En o chuizio d’o caso, feito en Castellón d’a Plana en l’año 1995, o chuche condena a uno d’os acusaus, autor confeso d’as naballadas Pedro Cuevas, a 14 añadas de garchola y absolbió a la resta d’a colla. Bels diyas dimpués, uno d’os acusats, Juan Manuel Sánchez, partizipó en una enrestida con naballa en o bico d’o Carmen de Balenzia.

O chuizio creyó prou polemica dentre os meyos de comunicazión balenzians. O chuche azeptó un rarizo testimono ‘X’, presentau por a esfensa, que i declaro baxo secreto. Maulets, que feba l’acusazión popular, se i marchó.

GUILLEM AGULLÓ, NI OBLIT NI PERDÓ! A LUITA CONTINA!

Fa 15 añadas y parix que estase ayer. Qui bibimos a muerte de Guillem no lo emos xublidau sisquiá un diya. No mos ne dixan. No’n podemos y no’n debemos, puesto que l’actualidat tristemén mos torna t’o pasau. Mos fería goi poder dezir que ixo d’os skinheads nazis, d’as abatanadas y as enrestidas ye bien luén, que estió una moda d’os 90 que seduzió a bels chobens sin expectatibas que rematón por fuyir d’ixa locura. Pero no ye asinas. Y no lo ye porque en l’inte no se prenió seriosamén, no se querió almitir o problema, s’achiquió tot en barallas chobenils dentre tribus urbanas, se despolitizaba y s’enguiliaban responsabilidaz, y agora abemos o fruito d’ixa ipocresía.

En so que 17 añadas, seguntes publica o zaguer Informe Raxen, s’han produziu 75 asesinatos conoxius a mans d’a extrema dreita por motibos de discriminazión y odio a l’esferen. Amagar o polbo baxo l’alfombra, ista ye a politica d’os responsables, porque no quieren almitir-lo, porque no les mulla, porque tienen atros trestuques igual como as grans fitas u alzar a simpatía d’a monarquía. Allora si que se i aplican. Creman retratos d’o rei y en dos días detener a os responsables, chuzgar-los y fer-les una pena propia d’a edat meya. En Balenzia, una colla de nazis apuñala a un choben que estió zerca de cazegar a bida, en Castellón le fan una esvastica en a cara a unatro choben, y agora amanixen bideos d’ultras enrestindo y rebaxando inmigrans, y no pasa cosa. Nomás que en o caso d’a puñalada detienen a 5 neonazis, que son en libertat ixe mesmo diya. D’as cutianas enrestidas en Castellón no se sabe cosa, garra deteniu, igual como d’as bombas contra ERPV, BNV y CEAR.

15 añadas dimpués, o panorama no ye mica esperanzador por os esfensors d’a libertat. Os partius ultras prenzipian a quitar concellers en os conzellos, os campos de fútbol continan estando un paradiso t’os psicopatas, y as cazerías continan. Pero, qué intrés tiene l’Estau en alzar ista situgazión d’encorralamiento, d’impunidat y de terror?

L’asesino de Guillem, Pedro Cuevas, estió pillau fa agora 3 añadas por a Guardia Civil aintro lo marco d’a Operación Panzer puesto que feba parti d’a organizazión neonazi Frente Antisistema (FAS), a la que pillón con armas de toda mena, mesmoo un lanzagranadas. Dos añadas dimpués, en as zagueras esleczions munizipals, o suyo nombre amanixeba en a candidatura d’o partiu neonazi Alianza Nacional por a localidat de Chiba, an que bibe o mainate d’ista colla, Juan Manuel Soria, tamién implicu en o Caso Panzer. Os papels i parón cuenta: l’asesino de Guillem, que no estió considerau que tenese razons politicas por morir a Guillem, amanixeba baxo a esvastica 14 añadas dimpués. Pero Cuevas ya eba cumpliu a suya condena.

O chuizio d’o Caso Agulló estió una bergoña. Dende o diario Las Provincias, alabez en mans d’a ultra Mª Consuela Reyna, se criminalizó a figura de Guillem, de tot o mobimiento independentista, d’os okupas d’o Kasal Popular, de l’antifaxismo y de qui albertiba d’o periglo neonazi. L’acusazión popular se retiró por a gran farsa que se paraba en os despachos d’os chuzgaus de Castellón. Cuan asesinón a Carlos Javier Palomino en Madrit o pasau nobiembre, de tot, nos miramos entazaga y bi beyemos o caso de Guillem atra begada. Y os mesmos discursos, as mismas parolas buedas y as mismas mentiras.

Por ixo ye por lo que cal rebindicar o simbolismo que o Caso Agulló tiene. Asinas, dica que no se remate de raso con qui empentan y fan l’odio, nusatros no aturaremos. Continaremos luitando con toda la nuestra rasmia, sin cazegar a ilusión ni a rialleta, sin xublidar y sin retacular.

País Valencià, abril de 2008.
Equipe de Redaczión de antifeixistes.org

[Bideo de Belén Agulló y d'Obrint Pas]
http://es.youtube.com/watch?v=yf7nC4O04P8