Fendo Orella 101.8 FM

[COA-MOC, Alternativa Antimilitarista en Zaragoza]

Atro añada más se zelebrará o segundo domingo de mayo, aintro d’as fiestas d’o Rabal zaragozano, a tradizional romería enta l’armita de San Gregorio. Y atra begada más i quedará zensurada la presenzia d’as opinións que reclaman a tornada ta l’emplego zibil d’istas tierras. Iste món contina en o preto d’o “Campo de maniobras de San Gregorio”, a mayor amplaria ocupada por o “Ministerio de Defensa”, an que no se permite, ni sisquiá en istos diyas, a libre expresión.

As suyas 33.839 ectarias continan estando feitas serbir ta las maniobras d’os echerzitos d’a OTAN y a benién parazión de nuebas misións en países en conflicto. Aquí se entrenan os soldaus que combaten en Iraq, Afganistán y en atros puestos d’o mundo.

O COA-MOC de Zaragoza, chunto con atras collas bezinals y ecolochistas, enzetón en 1999 una campaña contra o cambo de maniobras y poligono de tiro de l’echerzito español de San Gregorio, aprobeitando a romería ta l’armita de San Gregorio, que se i fa añada par d’atra en o mes de mayo, ta fer aizións de protesta contra o cambo. En l’añada 2003, en o preto d’a Guerra d’Irak y d’a campaña electoral munizipal y autonomica, baxo instruczións d’o mismo mando militar (de trazas prepoténs y probocaderas) s’interzeptó a dentrada d’a mayoría d’integráns d’a IV marcha “Desarmar San Gregorio”. Dende allora, a protesta s’ha feita en meyo de biedaus, piñoras y, de cabo cuán, mesmo menazas (…)
(…) Os echerzizios militars tienen un zerimpacto ambiental, encara sin mida por expertos independiéns: rudios, construczión de nuebos camíns en una redolada esteparia, que estricalla la bechetazión que empara y agafa o sulero fértil, peladura debida a l’esplazamiento de zentenars de personas y beiclos pesaus sobre suleros asabelo frachils y asinas asinas. Antimás, belunas d’as actibidaz son esconoxidas, debiu a l’aplicazión d’o secreto d’a esfensa nazional y/u d’a seguridat de l’estau. Y tot isto, a 1,5 km. en línea dreita d’a Expo.

Mientres istas añadas, nuebas menazas han plebiu sobre a nuestra ziudat, incrementando-ie lo compromís con un orden internazional inchusto. A posible instalazión d’una base de espionache d’a OTAN en a nuestra ziudat, contrabiene a declarazión como ziudat de paz por parti d’a UNESCO(…)

O “Día de las Fuerzas Armadas” se zelebrará en Zaragoza, en 2008, añada en que tendrá lugar a Exposición Internacional y en cuala seguridat colaborarán bels 2.000 militars. En parolas d’o ministerio d’a Guerra español o “Día de las Fuerzas Armadas” ye un “diya grán” y o “más importán” t’o “Ministerio de Defensa”, do antimás asisten os Reis y os Prinzipes(…) Se ferá a la fin de mayo con enchaquia d’o sanguinazo bizentenario d’a “Guerra de la Independencia” y o desembolique d’a Expo. O Ministerio d’a Guerra quiere aduyar a que una zelebrazión “tan importán” t’Aragón y ta la ziudat “siga reyalzada lo maximo posible”. “Zaragoza ye una ziudat que tiene unos binclos tradizionals istoricos importantismos con as Fuerzas Armadas”, tiene “un sobrebuén presén” y un “sobrebuén esbenidero”, ya que grazias a o prozeso d’esbielle de l’echerzito lo numero d’efectibos preséns en a ziudat s’incrementará un 24 por zien, isto ye, bels 1.500 efectibos más (…)

Queremos que l’espazio militarizau siga tornau ta la ziudat y t’os suyos abitadors, allenaus en as añadas d’a fin d’o franquismo.