Fendo Orella 101.8 FM

[La Haine, Felisa Sastre]

Fa 60 añadas, de traza unilateral y biolando a Resoluzión d’a ONU por a que s’estableba o trestallo de Palestina, os dirichéns sionistas, endrezaus por David Ben Gurión, proclamaban baxo un gran retrato de Theodor Herz, a creyazión de l’Estau chodigo d’Israel.

Conoixcamos de raso lo que en 2008 se zelebra dentre os chodigos sionistas de tot lo mundo refirmaus por os Estaus democraticos d’oczidén.

En primer puesto, zelebran l’estricallo y acotolamiento de más de seiszientas ziudaz y lugars palestinos y l’asesinato en masa de milentas de campesinos, dimpués d’una terrible campaña feita por organizazións paramilitars terroristas igual como as Haganah, Stern y Irgun ta fer posible a creyazión de l’estau sionista chodigo.
Zelebran a colonizazión de más d’o 80% d’o territorio palestino sobre as ruinas d’as ziudaz, lugars y lugaróns d’a Palestina istorica y a expulsión de 700.000 mullers, ombres, ninos y lolos que as abitaban dende sieglos.

Festellan una ocupazión militar de 40 añadas, sin concarada en a istoria moderna, que furta tierras, estable midas restrictibas t’o mobimiento d’os palestinos que se resisten a las coaizións, y leba a cabo un metodico plan d’esbandirura d’as colonias sionistas.

Remeran o mito d’una patria chodiga establida en territorio poblau por palestinos mientres sieglos, y a desenradigadura y expulsión de zentenars de mils de ziudadanos de Palestina, meyán a menaza, a coaizión y a fuerza militar aplicadas con a maxima crueldat.

Zelebran, en resumen, a establidura d’un Estau razista, clabau sobre l’alazet d’uns pretendius dreitos d’orichen dibino, y en o que a ziudadanalla y os dreitos que proclama no afectan que a os profesos de relichión chodiga.

Un Estau que discrimina, como no s’eba tornau a bier dende a Sudafrica de l’apartheid, a os suyos ziudadanos negros (no chodigos) y creya un sistema de trestallo total: Carreteras nomás que ta chodigos, propiedat d’a tierra alzada ta els, puestos de control y desixenzias de permisos t’o desplazamiento d’os palestinos, esferéns documentos d’identidat ta unos y t’atros, placas de matriculas d’esferén color y finalmén un muro d’a bergüeña, condenau por o Tribunal Internacional de Justicia pero refirmau por as clamadas democrazias oczidentals.

Un Estau que chusmete a lo mayor cambo de conzentrazión existén en o planeta, con una poblazión d’un millón y meyo de sers umanos trancaus en a francha de Gaza, a os que chusmeten diya par d’atro a lo terrible y ilegal castigo colectibo d’as enrestidas indiscriminadas con misils y toda mena d’armamento moderno, frén a unos cuasi inofensibos proyectils artesanals d’a resistenzia palestina a la ocupazión. Un Estau que talla os suministros alazetals ta ixa poblazión, dende a electrizidat y os carburáns, medicamentos y material sanitario.

Un Estau que fa campañas d’esboldregue de casas palestinas, que ha rancau zentenars de mils d’oliberas milenarias, alazet d’a economía familiar d’os palestinos. Un Estau que ha trancau o sistema educatibo de Palestina, dende l’amostranza primaria ta la unibersitaria, que impide l’aczeso t’os zentros educatibos, os tranca u si cal, no le dandalia en ordenar bombardeyar-los.

Un Estau que mantiene en as suyas garcholas, sin cargos ni prozesos chudizials, a milentas de palestinos que se resisten a las rebaxadas y acosos a os que de contino se troban chusmesos.

Un Estau que niega o dreito a tornar a os palestinos espachaus en 1948 y a os suyos deszendiéns, y aculle, por atro costau, a tot chodigo, fillo de chodiga u comberso a o chudaísmo de cualsiquier parti d’o mundo, sin a menor enradigadrua ni conoxedura d’a tierra en a que se l’aculle por o simple feito de pertenexer a una relichión que s’ha tornau en raza u siñal de ziudadanía.

Tot ixo y más zelebra Israel, acompañada por mainates d’o mundo oczidental, que güe se troban en Tel Aviv mientras os palestinos, acotolaus, allenaus, discriminaus, engañaus y rebaxaus por ixos mismos mainates d’oczidén, resisten y no se rinden a las deleras israelís de borrar-los d’o mapa. Ellos, sí que enduran un chenozidio lento pero metodico. No pas os sionistas israelíes que díya par d’atro estendillan as suyas colonias por a fuerza y enamplan o suyo territorio debán d’a impasibilidat d’a resta d’o mundo oczidental.