Fendo Orella 101.8 FM

ZARAGOZA 2008, GUERRA Y DESEMBOLIQUE (IN)SOSTENIBLE
POR UNA BIELLA CULTURA D’A PAZ. ESFILE D’AS FUERZAS ARMADAS D’A RISA

En Zaragoza, patimos milentas d’ectareas destinadas a maniobras militars, posibles bases d’espionache d’a OTAN, esfiles militars chigáns, macro zelebrazións d’o capitalismo mundial esfrazadas de creximiento sostenible. Debán de toda ista maquinaria instituzional militarizada, alazetada en millóns d’euros y consensos mediaticos cuasi obligatorios, queremos fer sentir a nuestra boz disidén y critica con a unica fuerza d’as nuestras razóns y as nuestras personas.

As actibidaz d’o cabo de semana tendrán o suyo requilorio lo sabado anterior, fendo alcordanza una añada más d’a militarizazión de l’espazio d’a ziudat:

SABADO 24 MAYO: En o Diya Internazional d’as Mullers por a Paz, Acto publico contra la militarizazión d’o territorio, a las 18’30 oras en a Plaza d’España de Zaragoza
Dimpués, continaremos o cabo de semana benién, con tiempo t’o debat, a borina y a rebindicazión:

BIERNES 30 MAYO: “L’imperio d’a OTAN y a mentira umanitaria” (Charrada con Carlos Taibo, profesor de Ziencia Politica en a Unibersidat Autonoma de Madrit). A las 19’30 oras en a Cambra d’Actos d’a Facultat d’Economicas, Gran Bía, nº 2

SABADO 31 MAYO: “Europa en guerra: l’inte de l’aizión” (Charrada con Carlos Barranco, RED EUROPEA CONTRA INSTALACIONES MILITARES). A las 19’30 oras en o Local “Treziclo”, Carrera Liñan, nº 1, “La Madalena”.

SABADO 31 DE MAYO: FIESTA AAARRR! (CON “REBEL CLOWN ARMY”): BORINA ANTIMILITARISTA. A las 22 oras en o Local “Treziclo”, Carrera Liñán, nº 1, “La Madalena”.

DOMINGO 1 DE CHUNIO: Esfile d’as Fuerzas Armadas d’a Risa. A partir d’as 12 d’o maitín dende l’Abenida Goya, en o cantón con o Paseyo Fernando lo Catolico.

O Diya d’as Fuerzas Armadas se zelebrará en Zaragoza en 2008, añada en a que se ferá la Exposizión Internazional “Augua y desembolique (in)sostenible” y en cuala seguridat colaborarán bels 2.000 militars.

En parolas d’o ministerio d’a Guerra español o Diya d’as Fuerzas Armadas ye un “diya grán” y o “más importán” t’o Ministerio d’Esfensa, do antimás asisten os Reis d’España y os Prinzipes d’Asturias.

Se trata d’una chornada probelizista que mobiliza un esfile de más de 3.000 efectibos y toz os trastes d’altera tecnolochía feitos serbir por os tres echerzitos que bi incluye una semana d’actibidaz. Tendrá lugar a finals de mayo con enchaquia d’o sanguinazo bizentenario d’a Guerra d’a Independenzia y o desembolique d’a Expo. O Ministerio d’a Guerra quiere aduyar a que una zelebración “tan importán” t’Aragón y ta la ziudat “siga reyalzada lo maximo posible”. “Zaragoza ye una ziudat que tiene unos binclos tradizionals istoricos importantismos con as Fuerzas Armadas”, tiene “un sobrebuén presén” y un “sobrebuén esbenidero”, ya que grazias a o prozeso de modernizazión de l’Echerzito lo numero d’efectibos preséns en a ziudat s’incrementará un 24 por zién, isto ye, bels 1.500 efectibos más.

Asinas mesmo 2.000 militars colaborarán con a “Policía Nacional”, a “Guardia Civil” y a “Policía Local” militarizando de raso a ziudat ta guaranziar que os ziudadans puedan “disfrutar” con total seguridat d’a Exposizión Internazional que s’enguerará pocos diyas dimpués. O Ministerio d’a Guerra asegura que ba a “fer o bezinal” y colaborará en fainas de represión, control sozial y seguridat d’a Expo, que “ye l’unico que sabe fer l’Echerzito”.