Fendo Orella 101.8 FM

Acto: Presentazión de “Em dic Mireia (i el meu cony es diu Carlitos)”
Puesto: Siede de l’Asoziazión Nogará, carrera Gabín, 6, baxos, Zaragoza
Ora: 19.30
Bi asistirán: Os autors, Manel Riu y Mir Roy
Presentarán: Jorge Romance y José Antonio Bergua

Manel Riu y Mir Roy han lebau t’o paper as andanzas de Mireia, una mayestra de secundaria, que publicaban en un blog en Internet

Manel Riu y Mir Roy son dos mayestros, aragoneses de Benabarre (Ribagorza) que en abril d’o 2006 ubrión o blog mireiagalindo.blogspot.com. A suya protagonista Mireia, charraba de sexo, cultura, politica y educazión sin garra mena de tapullos. Mireia rezentaba as suyas abenturas y as d’atras mullers que son por a suya bida como Mariona, Laura, Rosalia y Martina. As istorietas d’as zinco, y as relazions d’entre ellas y atros personaches, eboluzionan por l’esbrunziu  mundo politico de 2006, y fan onra ta reflexionar de politica, luengas, educazión, sentimientos, relazions u sexo.
Dende a suya creyazión, a web tenió un importán exito con mas de 140.000 besitas. O resultau ye iste libro que agora se presenta y que ha reordenau a zibernetica bida de Mireia. A la fin de l’añada pasada amanixeba Cossetania Edicions que s’intresó por lebar ta un libro a bida de Mireia creyada por istos dos aragoneses.

Manel Riu y Mir Roy explican que “Mireia se fa mofla de tot, engaña a la chen, pero a la fin remata estando bictima de l’engaño”. Y ye que as cosas no son siempre igual como parixen (u igual como se publizitan) y por ixo a Mireia, a protagonista d’a istoria, l’embeleca Sommersby, a zinta protagonizada por Jodie Foster y Richard Gere, remake de “El retorno de Martin Guerre”, con as suyas istorias de personas que se fan pasar por atras personas. No ye l’unico guiño de “Em dic Mireia…” en as suyas pachinas se mezclan mosicas, zitas, libros y referenzias de zine que fan d’o libro un contino “trampantojo”.

Antimás d’escribir, Manel y Mir quieren esfender o dreito d’os aragoneses que charran catalán a poder fer-lo emparaus por una Lei de Luengas, que se troba en o branquil d’a suya tramitazión o benién setiembre. L’epilogo d’o libro ye escrito en o catalán ribagorzano que ye a suya parla materna y ye dedicau t’o presidén d’Aragón, Marcelino Iglesias, siempre que aprebe a Lei de Luengas que ha de dar carta de naturaleza t’as luengas propias d’Aragón, chunto a o castellano.

L’acto será presentau por o periodista y bloguero Jorge Romance, y por José Antonio Bergua, actibista en esfensa d’o catalán d’Aragón, natural tamién de Benabarre. Aragoneame.com antimás, ufrirá un nexo de chunión dentre o mundo birtual y reyal en forma de presén.