Cómo tos n’alcordarez o pasau 30 de mayo de 2008 suzedió lo bestial y esmesurau desaloix d’o CSO Rasmia en o bico de Torrero, en Zaragoza, a mans d’as “fuerzas de seguridat” de l’Estau.
Casoalmén o diya que eslichión t’o desaloix, consonoba con a besita d’o rei a la capital aragonesa y l’inminén enguero d’a Expo lo diya benién, lo que pillón de desincusa ta que o bico amanixese con más presenzia polizial y efectibos actibos que no nunca (12 tozineras, 2 licopteros y un trapazil de secretas y antidisturbios) que identificaban y disuadiban a la chen que fué ta la conzentrazión en contra d’o desaloix de traza represiba y biolenta en as carreras a o canto de Rasmia.
Albaro, choben bezín d’o bico de Torrero, estió uno d’os prous chobens mallaus ixe diya a mans d’os antidisturbios y identificau chunto con atras personas luén d’o puesto do un auto d’a polizía local estió alcanzau por o trucazo d’un cantal y un polizía estió feriu en a barba.
O siguién lunes, diya 2 de chunio, estió deteniu en casa suya y lebau ta la comisaría zentral de polizía como unico culpable de lo alcurriu o diya 30 de mayo, acusau d’atentau a l’autoridat y daños como cargos más graus. Estió tot ixe diya, a nueit y o maitín d’o siguién baxo arresto y dimpués de prener-le declarazión en os chuzgaus lo dixón en libertat con cargos, por no tener antezedens.
Dimpués de plegar a un alcuerdo con a parti acusadera ta no ir ta chuizio (ya que estaría mui prebable que perdese) ha de bosar una piñora de 12.000€ ta prebar de no dentrar en a garchola y aguardar que a fiscal eslicha dar-le a condizional. Ta condenar-le no ha estau menester que a parola d’o polizía y no i hai garra prueba de que Alvaro estase l’autor material d’o que se l’imputa.
Albaro ha ubierto un numero de cuenta ta qui quiera u pueda solidarizar-se con él:
0182 6936 10 0201525685
Rasmia somos todas/toz, si nos trucan a una/o nos trucan a todas/toz
A conzesionaria de nabegazión d’a EXPO, Turismo Ebro Fluvial, será compensada por as perdas que sufrió lo pasau berano al no poder ufrir en condizions a rota de trasporte entre l’azute y Ranillas. A interpresa quereba trasportar 350.000 personas aprobeitando lo tirón d’a Expo, pero remató suspendendo lo serbizio en octubre con un importán forau economico y tasamén plegando a o 6% d’o pasache prebisto. Nomás logró captar 21.085 cliens en zinco meses (muitos con o pase de baldes).
As continas creixidas y os graus problemas de calau no dixón que se fese una explotación en condizions ta la interpresa, que tiene dreito a las compensazions por contrato y asinas lo fazió saber a o Conzello. Fa tres meses ya se daba por feito que s’abría de bosar y agora se rematan os contactos ta trancar l’alcuerdo. Os barcos no podión plegar a las puertas d’o rezinto de Ranillas dica agosto, en l’ecuador d’a Expo, y a embarcazión de mayor capazidat nian podió esnabesar o Puen de Piedra por a fuerza d’a corrién.
O Conzello de Zaragoza ha denegau ta rematar o permiso a la coalla neonazi Movimiento Social Republicano (MSR) ta impartir una conferenzia y presentar un libro o proximo 10 de Chinero en o Zentro Zebico de l’Almozara.
Seguntes informón fuens de Partizipazión Ziudadana, ista colla no ye incluyida en o listau d’entidaz ziudadanas que pueden demandar istos espazios publicos a o consistorio y, antimás, o zentro zebico yera reserbau por atros colectibos ta ixe diya.
L’acto, combocau ta iste sabado, consistiba en una conferenzia sobre libertat d’expresión y a presentazión d’un libro a cargo de Juan Antonio Llopart, presidén d’o MRS y director d’una editorial que, seguntes a Federación de Asociaciones de Barrios de Zaragoza (FABZ), publica libros de conteniu faixista, antimás d’estar uno d’os fundadors d’a extinta Cedade.
A zaguera añada, o conoixiu ultradreitista Ricardo Sáenz d’Ynestrillas fazió serbir un perimso en a Biblioteca d’Aragón ta presentar un libro y lanzar mensaches faixistas y razistas.
(més…)
T’aquel que encara no se i aiga feito a las zifras en Euros, son más de 100.000 mil millons d’as antigas pesetas as que adeuda o nuestro conzello de Zaragoza y que imos a aber de bosar, china chana, entre toz os zaragozanos/as.
Ye una deuda increyible, que ba a arrozegar a la ziudat tanimientres muitas añadas y que ya se ye notando en l’abandono de bellas infrastructuras, como lo paseyo de l’augua, u o irrematau redol de l’antiga gara d’o Portillo, u o túnel d’a A-68, u o empioramiento d’o serbizio de recullida de basuras con o nuebo sistema automatizau, que ha reduziu os costes a interpresa pero que no cuaca a os ziudadans por a reduczión de contenedors y l’aleatoriedat d’a situazión d’os mesmos.
¿Como salir d’iste empandullo?
Ye embolicau bosar una deuda tan gran debiu a os propios intreses que chenera, y isto puede ir enchonflando china chana a zifra dica fer-la insostenible de tot.
Una ziudat como Zaragoza tiene unos ingresos limitaus, y prinzipalmén se nutre d’os impuestos que replega d’os ziudadans, istos impuestos ya ha comunicau que puyarán un poquet más d’o IPC, beluno mesmo más.
Pero ista puyada d’impuestos ye insufizién. Atra traza de recuadazión ye a puyada de sanzions y piñoras por parti d’os recaudadors, ispectors y as fuerzas de seguridat, que ya albirtión en o suyo inte a presión que ye rezibindo por parti d’o consistorio ta puyar a recaudazión. O prenzipio d’os recortes en serbizios y prestazions no tardará, ya que en bel puesto abrá de remerar si s’enampla a deuda.
(més…)
