Kerobia ye una colla de mosica formada por Xabi Fernández (guitarra y boz), Mikel Zorrilla (batería), Alberto Izaba (baixo) y Mikel Izaba (teclas).
Ista colla d’Iruña se formó en o zaguer mes d’o 2001 cuan se chuntón Xabi, Mikel y Germán San Martín (exteclista de Kerobia). Se mantenió como trío dica Chinero d’o 2003, cuan bi entró Karlos Ortiz como baixo. Con iste cuarteto publicón o primer disco: Kerobia (2004, GOR). Dimpués de fer a chira de presentazión d’iste dico, en Abiento d’o 2005 prenzipión a parar o segundo disco y Karlos Ortiz deixó la colla y prenió o relebo Alberto Izaba a o baixo.
Con ista nueba composizión se publicó o segundo disco: Rose Escargot (2006, GOR). Dimpués d’estar sobre os eszenarios dica zaguers d’o 2007 Germán deixó a colla y bi entró Mikel Izaba a las teclas.
En Abril d’o 2008 se publicará o suyo terzer treballo: Materia organikoa eta gainerakoak (2008, Autoproduczión). Iste treballo no ye que a primera parti d’una trilochía que se publicará en una añada y meya. D’ista traza s’aspera a segunda parti ta istas calendatas y a terzera parti ta Octubre d’o 2009.
(més…)
O pasau 7 de febrero, bellas 300 presonas se manifestoron en a Plaza San Chaime de Barzelona, clamaus por o partiu Ciudadanos/Ciutadans, baixo a cobertura d’a COPE y en contra d’a politica lingüistica d’a Generalitat. A frase más destacada de Siñor Rivera mientres l’acto, estió: “No nos cansaremos de rebindicar o bilingüismo dica que se faiga reyalidat”. Puestar que por considerar l’acto masiau conserbador, o PP no i fuese, atamás de consonar con os suyos obchetibos. En Santiago de Compostela, parellanos manifestans portaban a pancarta “Sí bilingüe”.
O PSOE aragonès a trabiés d’a Conselleria de Cultura, han feito publico o borrador d’o prochecto d’una esbafada Lei de Luengas, en a cual, ni bi amanix a coofizialidat d’o catalan y l’aragonès, ni a obligatoriedat d’a suya amostranza en os suyos respectibos territorios. Ye una lei de dreitos y no d’obligazions. (més…)
12 chobens ban a estar chuzgaus por reyalizar un acto de desobedienzia zebil. Se les demanda 2 añadas y meya de garchola por fer una posada y tallar o trafico.
Ha prenzipiau a campaña contra os chuizios que o benién diya 26 de marzo se ferá en l’Audienzia de Iruñea. 12 chobens ban a estar chuzgaus por reyalizar un acto de desobedienzia zebil. Se les demandan 2 añadas y meya de garchola por fer una posada y tallar o trafico aintro d’os actos d’a campaña por a okupazión “Iruñerria Piztera goaz” que, en rispuesta a o desaloix d’o gaztetxe Euskal Jai, remató con a okupazión d’o Palazio de Rozalejo.
Bibió obedeixendo lo mandato biblico y a la tradizión istorica.
Ella escobaba, lustraba, ixabonaba, ixaguaba, planchaba, cusiba y cozinaba.
A las güeito oradas d’o maitín serbiba o desayuno, con una cullarada de bresca ta la eterna ardor de garganchón d’o suyo mariu. A las doze oradas serbiba l’almuerzo, consomé, puré de trunfas, pirín bullíu, durasnillas en almíbar; y a las güeito oradas a zena, con o mesmo menú.
Nunca no se rezagó, nunca no s’enantó. Minchaba en silenzio porque no yera muller opinadera ni preguntadera, mientres o mariu rezentaba falordias presens y pasadas.
Dimpués d’a zena, se prolargaba labando amonico los platos, y dentraba en o leito rogando a Dios que él estase dormiu.
(més…)
Classificat com a: Sozial
L’alcalde afirma que fren a o gamberrismo como lo d’o Corredor Berde, «lo que cal ye represión».
Camaras de seguridat ta pribar más actos bandalicos. Ye a mida proposada ayer por l’alcalde de Zaragoza, o represor Juan Alberto Belloch, t’achiquir as esferras y as conductas inzebicas en o Corredor Berde d’o bico Oliber. Igual como lo pasau mes de mayo, cuan amanixión pintadas sobre a pasarela d’o Boluntariau, Belloch tornó a recurrir a la instalazión de camaras y a la «represión» como mida más efectiba ta rematar con o gamberrismo.
Pero no lo fazió alabez y tampoco no le será de buen cumplir a suya parola agora. A bulnerazión d’os dreitos d’a intimidat d’as personas se contraposa a la obligazión de cusirar os equipamientos publicos y bi’n ha un puyal de sentenzias que dan a razón a os primers en cuentra d’as camaras. Belloch afirmó que a instalazión d’istos trastes «estaría complementaria a o treballo d’a Polizía» y en l’inte de clabar-las se metería ficazio de que no imbadesen intimidat. No dizió cómo.
En o magazine d’a Vanguardia d’o pasau 15 de febrero leyé una entrebista feita a l’escritora Siri Hustvedt, nuebayorkesa d’orichen noruego y casada con o gran novelista Paul Auster. A la pregunta sobre o biculturalismo y bilingüismo d’a suya familia respondeba: “Si tu yes acostumbrau a saltar d’una luenga ta unatra, d’una cultura t’atra, y prezibes as dos d’as tuyas trazas, tamién yes más capable d’entender a cualsiquiera ser umano.
A perspectiba se i ubre, a tuya mentalidat ye más libre y sabes que bellas cosas no se pueden dizir d’a mesma traza en una luenga que en atra. Per ixo creigo que bustez (se referiba a os que parlan catalán) son capables de situar-se en o puesto d’atro con muita más rapideza de qui ye monolingüe y monocultural”.
(més…)
Integra pero sucherén, pincho pero puerco, armonioso pero disonán, nomás debán d’una colla como ista se pueden combinar achetibos a priori antagonistas. Istos zaragozanos han estau capables d’adueñar-se de toz istos significaus y chugar a mezclar-los dica trovar o suyo soniu tanimientres se reimbentaban disco a disco.
Plegau a iste punto podríanos prenzipiar con tópicos, “ye o suyo disco más maduro”, “han conseguiu trancar o zirclo”, “han concluyiu a suya búsqueda d’o suyo soniu” u cualsiquier frase feita. Pero no, no sería correcto ya que simplemén han estau fiels a si mesmos. Han creyau un nuebo disco que tiene una nueba personalidat que se nutre d’o prochecto , como toz en a istoria d’ista banda. (més…)
O resultau, tras decadas y decadas de comunicazión comerzial y esfuerzo publizitario, ha estau bestial: ya sabrás que o producto más importán d’o mundo ye un refresco. No pan, ni leit, ni pescau… sino un refresco d’augua carbonatada clamau Coca-cola. No siempre estió asinas. Cuán o boticario d’Atlanta J.S. Pembertom comerzializaba en 1886 ista bebida yera un “Tonico ta l’estomaco y os nerbiols” capable de rematar con “a dolor de cabeza, a esteria y a malinconía”, porque ta par d’alabez os productos encara eban de fer onra ta cualcosa. 120 añadas dimpués y con a trachectoria publizitaria más costosa y luenga d’a istoria, a purna d’as nuestras bidas consiste en augua carbonatada con aromas sinteticos. (…)
Dende a industrializazión y con a plegada d’un gran mercau de productos y tecnicas enantadas de fabricazión, a publizidat prenió un papel alazetal en a estimulazión d’o consumo. A competenzia dentre anunzians por fer más eficazes os suyos mensaches comerzials, prebando d’esferenziar-se d’a resta, amaga la sorprenden omocheneidat de l’argumentario publizitario. Os codigos eticos, emplegos y costumbres, modas y modelos que uno par d’atro los anunzios transmiten, fan a la finitiba tot un imachinario sozial, un mirallo que refleixa una imachen con trazas comerzials d’o que somos u emos de plegar a estar.
Asinas que o resultau ye un conchunto de tecnicas comunicatibas refirmadas en estudios soziolochicos y psicolochicos, que mugan cada segmento sozial de consumidors y que s’estendilla dica cubrir de tot l’acto de consumo. Por ixo, a publizidat actual no entiende d’ideolochías, se fa omofoba cuan cal u feminista cuan pertoca. Se i ha feito, una begada más, a las nezesidaz d’as grans interpresas y les ha ufriu como resultau a logotecnia, un conchunto de tecnicas de marketing y publizidat espezializadas en fer xublidar os productos cuan son siñaus por a marca adecuada. (més…)
De bote y boleyo, y cuasi por sorpresa. Os zaguers cabos de semana d’o mes de febrero son una calendata siñalada y indeterminada de bez, en a que se zelebran os carnabals en Benimaclet. Chens d’esferens puestos y de prous prozedenzias plenan a plaza y as carreras d’o bico a embute. Muitos no plegan en Benimaclet que ta istas calendatas. I son benius ta zelebrar o carnabal. Una fiesta pagana, popular, d’a carrera. A fiesta de l’esfraz que desepara la mentira cutiana por bellas nueis. A chen s’esfraza ta estar qui quiere estar reyalmén, ta estar lo que no puede estar a resta de l’año, ta rebindicar l’alegría y o goi sin regles, sin más güegas que as d’as luzes de l’amanixer. Dengún no conoixe nunca la calendata, pero ye fixo que bi ha calendata, que bi ha fiesta, que bi ha carnabal.
Dende fa bels binte añadas, dimpués d’estar biedaus en a epoca franquista, os carnabals de Benimaclet naixen como una fiesta unica en a ziudat de Balenzia. En primerías s’acompañaban d’os fuegos y os bailes d’o Correfoc del Dimonis. Dimpués estión biedaus alegando periglosidat. L’asoziazión de bezins d’o bico y maulets prenión a iniziatiba en o rebiscole d’a fiesta en a que se representa a declarazión d’independenzia d’o califato d’o moro Maclet. Pero no so que d’os fillos de Maclet (o prefixo beni significa “fillo de”) ye o carnabal sino de toz ixos que plenan o bico añada par d’atra con as suyas ganas de fiesta, plegando ta Benimaclet dende cualsiquier cabo.
Seguntes denunzia la Coordinadera Antifaixista de Malaga en un comunicau, dende o pasau miercols s’han feito mas d’una dezena de detenzions de chobens embrecaus con o mobimento antifaixista d’a ziutat andaluza por parti d’a Policia Nacional.
O colectibo antifaixista ha denunziau l’arbitrarietat d’as detenzions, que ye platera con os feitos imputaus, y más que más porque a mayoria d’istos s’han feitos en os meyos de comunicazión con zitas falsas d’a polizia. Mientres o cabo de semana, amigos y familiars d’os detinius s’han arroclaus en as puertas d’a comisaria, tamién i han reyalizau una manifestazión de refirme.
Os mobimientos sozials malaguencos han denunziau que tot isto ye un montache ta criminalizar-los, y destacan a grandiza operazión sin prezedens que ha desembolicau a polizia, fendo rechistros domiziliarios, confiscando-ie ordinadors y telefonos mobils y sin muitas explicazions a os detinius y os suyos familiars por aber-se decretau o secreto de sumario.
