Fendo Orella 101.8 FM

Bibió obedeixendo lo mandato biblico y a la tradizión istorica.

Ella escobaba, lustraba, ixabonaba, ixaguaba, planchaba, cusiba y cozinaba.

A las güeito oradas d’o maitín serbiba o desayuno, con una cullarada de bresca ta la eterna ardor de garganchón d’o suyo mariu. A las doze oradas serbiba l’almuerzo, consomé, puré de trunfas, pirín bullíu, durasnillas en almíbar; y a las güeito oradas a zena, con o mesmo menú.

Nunca no se rezagó, nunca no s’enantó. Minchaba en silenzio porque no yera muller opinadera ni preguntadera, mientres o mariu rezentaba falordias presens y pasadas.

Dimpués d’a zena, se prolargaba labando amonico los platos, y dentraba en o leito rogando a Dios que él estase dormiu.
Ta par d’alabez ya s’eban espardiu prou a maquina labarropas, l’aspiradera electrica, y l’orgasmo femenino, que yeran plegaus poco dimpués d’a penizilina; pero ella no se’n enteraba d’as nobedaz.

No ascuitaba que os radioteyatros, y mui de cabo cuán saliba d’o cubillar de paz do bibiba luén d’a biolenzia d’o mundo.
Una tardi, salió. Marchó a besitar a una chirmana malauda. Cuan tornó, lusco-lusco, trobó a o mariu muerto.

Bellas añadas dimpués, a bogala confesó que ista istoria no eba rematau asinas.

Contó l’atra final a un bezino clamau Cherardo Mendibe, que le’n contó a unatro bezino que l’en contó a unatro que le’n contó a unatro: en tornar de casa d’a chirmana, ella trobó a o mariu por tierra, chalfegando, biroliando, a cara de color tomate, lo bi inoró, se ficó en a cozina, paró una lifara de calamars en a suya tinta y merluza a la basca, con un postre d’altera torre de fruitas y de chelaus, tot regau con un bin biello que teneba amagau, y a las güeito oradas d’a nuei, como yera o suyo deber, sirbió a zena, se fartó de minchar y de beber, confirmó que él yera quieto de tot en o sulero, se presinó, se bistió de negro y gritó por telefono a o medico.

“La mujer ejemplar”, d’o libro Bocas del Tiempo (Eduardo Galenao)