Fendo Orella 101.8 FM

Hue a 3 anyadas d’ixe mayo royo de 2006, podríanos dicir que as cosas continan igual como en prencipiar, a o caso Atenco lo contina caracterizando a Ilegalidat, a Impunidat y a Inchusticia

N’o recuento d’os danyos, os asesins, os violadors, os asaltadors de domicilios, os fotedors de lapos, os torturadors continan baixo lo manto protector d’Institucions obsoletas y ineficaces, a 3 anyadas os autors materials d’istos feitos, recibión una chapadeta y un cheque d’impunidat d’a Suprema Corte de Chusticia; os autors materials perpetradors dreitos de tal bestialidat, tampoco no han estau castigaus, no i hai sisquiá un policía u melitar en a garchola.

A 3 anyadas, o guvierno corrupto apostó a que istos feitos serían n’o ixubliu y a carmenada y a bestialidat con la que hemos estau trataus sería aprendida por o pueblo ta silenciar cualsiquier chito de disidencia u forau de conciencia social y humanista.
Pero de nuevas, han fallau porque o pueblo no ixublida y cada vegada, más sectors d’a nuestra sociedat, actors, actrices, artistas, intelectuals, periodistas, academicos, collas y asinas asinas s’han adibius a la desichencia de “CHUSTICIA Y LIBERTAT T’ATENCO”.

As contradiccions son abismales, ni punto de contimparación, pero ixa ye a reyalidat social de qui desichimos os nuestros dreitos, de qui esfendemos lo que nos perteneixe, de qui metemos a o servicio d’o pueblo los nuestros conoiximientos y solidaridat, por ixo digo, que a ilegalidat, a impunidat y a inchusticia continan tan vichents como en prencipiar.

Les agradeixco a totz ustetz a suya solidaridat, a suya participación y faigo una clamada a la chunidat, a adibir y no marguinar, a buscar consonancias, a reconoixer diversas trazas de luita y de pensamiento, a prener una actitut critica y constructiva, a complegar as nuestras luitas, enantemos en as consonancias, faigamos homenache a o pasau con parolas y a o present con os nuestros actos.

Dende ista garchola d’altera seguridat especializada n’o tratamiento de delincuents periglosos n’a que hemos estau encorralaus con a finalidat de chusmeter-nos en a nuestra integridat fisica y moral, en o nuestro esprito y ideyals, les digo y puyo a voz ta decir-les que no lo han lograu, continamos firmes n’as  nuestras conviccions, ideyals y identidat.

O guvierno tirano y esvergüenyau nos engarcholó aquí como un ixemplo t’o pueblo,  do a sobén se recibe un trato inhumano, minchamos en 3 minutos, nos bañamos n’ atros 3, permanixemos trancaus 23 horas d’o diya baixo a inaturable luz d’un foco que nunca no s’amorta, siempre baixo ordens como sáquese a chambra, sáquese a playera, puye as suyas mans, tórnese, sáquese os balons, baixese os calzons, baixese o glán, amuéstreme os cocos, sáquese os peducos y zapatos, béstite, ha! Pero primero faiga 3 sentadetas… Totz istos  actos dixan platero que mas que un Centro Federal de Readaptación Social, ye un Centro d’Exterminio cualo engarcholamiento busca matar… por a insalubridat, a desasistencia y agresión psicolochica cutiana, a tortura fisica y psicolochica que contina existindo-ie, as faltadas de rispeto, as enrestidas a la dignidat, a terne que terne inchusticia sobre inchusticia, as mancas medico-sanitarias, isolamientos… ista enriste contra la dignidat humana y busca malmeter o cuerpo y l’esmo, pero a penar d’ello, y de que n’o particular mesmo a vesita familiar se m’ha negada, trancandome a posibilidat d’acarrazar y recibir un pochón de mi quiesta mai, de mi pai u chirmans, no m’han chusmeso, contino firme en os mios ideyals y todas as rebaixadas y castigos los concaramos con dignidat. O mio corazón rebelde y universitario contina inquebrantable, a garchola no m’ha podiu, m’ha feito mas fuerte que no nunca.

Prou que ista motivación se las debo a ustetz, a os que tienen recordanza, a os que luitan, a os que puyan a suya voz, a os que no dixan de luitar por os suyos dreitos, por os que desichen chusticia y por os que reclaman a nuestra libertat, a ustetz les doi as gracias y ninvio un saludo combativo, asperando se troben con os animos alto.

Soi seguro que, antis u dimpués, totz complegaremos en so que un frent, n’una sola movilización, ya que o nuestro pueblo esboldregará las condenas de cadena perpetua que nos han imposadas, nos rancará d’a garchola y nos tornará a os perseguius, sé que luego nos arroclaremos con totz ustetz y bi serán América, Adán, Juan Carlos, Román, Jorge, Alejandro, Narciso, Rodolfo, Edgar, Eduardo, Cesar, Pedro, Oscar y prou que sí, Nacho, Felipe y encara que ya no siga fisicament con nusatros, tamién i será Alexis Benhumea,  porque él s’ha quedau ta cutio n’os nuestros corazons y bi ha grabau a suya inmortalidat.

¡Asesinarán y engarcholarán os cuerpos, pero nunca no a os espritos!
¡Que vivan por siempre n’os nuestros corazons, os que s’han devantau con dignidat!

¡Ye preferible pervivir en a garchola, que callar en libertat!

HECTOR GALINDO GOCHICOA

Preso Politico, condenau a 67 anyadas y meya de garchola en un Penal Federal de Maxima Seguridat.