Fendo Orella 101.8 FM


Resumen d’o que pasó lo 4F
novembre 30, 2009, 7:37 am
Filed under: Sozial | Etiquetes: , , , ,

O diya 4 de febrero de 2006, en a carrera Sant Pere mes Baix, 55 de Barzelona bi ha una borina de mena “rave” en una casa “ocupada”. A Guardia Urbana (polizía local) tien encordonada la zona. L’inmueble -propiedat d’o Conzello- abría d’estar cusirau por a Guardia Urbana ta pribar o suyo emplego. A reyalidat ye que bi ha una borina an que a chen dentra y sale -mesmo se sabe d’a presenzia de secretas dentro-. Si fa u no fa a las 6.20 d’o maitín a Guardia Urbana dezide biedar o paso por ixa carrera. Bellas personas preban de ficar-se en a borina y unatras simplemén d’esnabesar a carrera. Rodrigo Lanza -dentre atros- demanda que le dixen pasar ta ir t’a boca d’o Metro que bi ha a o canto. Le dizen que se’n baiga ta unatra (muito más luén). Tanimientres se produze una carga. Rodrigo Lanza rezibe un fuerte trucazo con una porra en o tozuelo que le fa sangrar muitismo y cayer enturdiu por tierra. A l’inte d’a carga salen bezins de bels inmuebles que chilan contra la polizía. Cayen obchetos, dentre ellos mazetas. Una, problamén arrullada dende a casa d’a borina, impacta en o tozuelo d’un Guardia Urbano dixándolo ferido grau. Dimpués d’a carga se produzen 9 detenius. Zinco en yeran en a carrera -nunca no estión dentro de l’edifizio, dentre ellos Rodrigo Lanza- y cuatro que salen en ixe inte de l’edifizio. D’os 9 detenius se zeban con tres. Tres sudamericanos con pinta d’alternatibos que yeran en a carrera.

L’alcalde Joan Clos surte de maitins o diya benién en toz os meyos de comunicazión dizindo que una mazeta chitada dende un edifizio eba feriu de grabedat a un guardia urbano. Ista bersión se segundia ora par d’atra en as notizias. De contino l’informe polizial por o que Clos parla d’a mazeta “disparixe”. Clos ye en silenzio dica chinero d’o 2007, que en un programa de telebisión, torna a dizir que “tenié un informe, no remero si oral u escrito”. Como ye de dar dengún no quiere que Clos charre, y iste documento, que por protocolo a polizía le’n entregó, disparixe de tot.

Dña. Africa de la Criz Ramos, d’a colla sanitaria d’o 061 que atendió a o guardia urbano feriu, declaró en o Chuzgau d’Instruczión nº 18 de Barzelona que en o puesto d’os feitos bi eba bella mazeta. O tema d’a mazeta ye alazetal en l’acusazión contra Rodrigo Lanza (condenau a 5 años de garchola), Alex Cisternas y Juan Daniel Pintos (condenaus a 3 años y meyo). Isto porque os acusaus nunca no dentrón en l’edifizio y por isto no pueden aber arrullau una mazeta. A nueba bersión d’a polizía ye que istos arrullón cantals dende a carrera, que en trucar en o guardia urbano iste cayó y se crebó a parti de dezaga d’o crapazín con a zera. Posibilidat que metión en duda la mayoría d’os peritos medicos en o chuizio (isto ye en bidio).

O medico Robert Panades B, qui atendió a o polizía nafrau, declaró que “…pregunté a os achens -que por astí se trobaban- cuál eba estau o mecanismo d’a nafra y no lo sabión indicar, unos diziban que eba cayiu cualcosa d’alto, como un tiesto; unatros que eba estau un cantalazo pero dengún no sabeba concretar-lo”. Dimpués en o chuizio istos mesmos polizias teneban tot “esclatero”.

A tot isto, y estraniamén, a fiesta contina en l’edifizio dimpués d’a carga. Os cuatro detenius en salir d’a casa son liberaus. L’organizador d’a borina se fote bellas oras en comisaría declarando, pero parixe que no como deteniu. Ista persona ye acusada por o mobimiento okupa de Barzelona de traficán y bocatoba d’a polizía.

Rodrigo Lanza y os atros dos denunzian que estión torturaus en a comisaría Sants-Montjuïc. Tanto les i abatanón que o medico d’a polizía determinó que eban d’estar lebaus ta un espital. As torturas continón mientres dos diyas. As torturas igual como lo feito d’estar disparexius mientres 15 oras dimpués d’a suya detenzión en mans d’a polizía han estaus denunziaus por Amnistía Internacional -en o suyo informe sobre os Mossos- y a Comisión d’Esfensa d’a Persona d’o Colechio d’Abogaus de Barzelona.

Bi ha un polizía feriu y os tres sudacas se ban a minchar o marrón.

Dimpués d’os inzidens a Guardia Urbana ha encordonau a zona. Cosa que fa con cualsiquier chicot acziden de zirculazión ta que a polizía zientifica pueda aduyar a aclarir os feitos, más lochicamén debán d’a grabedat d’os feitos. Pos cuan a polizía zientifica se presenta en o puesto oras dimpués -a las 10.00 d’o maitín d’o diya 4 de febrero- se i troba con que o puesto ha estau escoscau de tot por o Serbizio de Limpieza d’o Conzello de Barzelona. Como dizió lo conzellero d’o bico de Ciutat Vella, Carlos Martí, o 6 d’abril de 2006, o feito de que a interpresa de limpieza d’o Conzello de Barzelona i actuase abió d’estar ordenau u premitiu por a Guardia Urbana que yera en a zona. Iste feito ha estau alazetal ta borrar un puyal de pruebas que sacasen as culpas de Rodrigo Lanza, Alex Cisternas y Juan Pintos. A mai de Rodrigo meitó una denunzia por iste feito y demandó a la Chustizia que s’identificase a o chefe de l’operatibo d’a Guardia Urbana que premitió a limpieza d’o puesto.

O tema d’a torturas a la chueza se bufó a pocha. A os tres chobens se les amostrón unas fotocopias en blanco y negro con 20 fotos grandaria carnet y con imachens antigas d’os polizias ta que “os identificasen”.

En o chuizio a chueza no permitió dengún testigo d’a esfensa (chen d’a carrera, chen d’as casas…).

Antiparti d’AI y o Colechio d’Abogaus, l’Asoziazión Memoria contra la Tortura se presentó como acusazión popular pleitiando contra os autors d’os malos tratos y torturas, l’Asoziazión Justicia i Pau amostró a suya alticamadura por tot o caso, a Federazión de Asoziazions de Bezins de Barzelona demandó que se aclarisen as responsabilidaz por a limpieza d’o puesto y que Clos aclarise l’orichen u fuens d’informazión d’a primera bersión que dió (a d’a mazeta), Cristianos por l’Abolizión d’a Tortura refirmó a os chobens y nimbió una mena de cartas t’as autoridaz de Barzelona, denunziando-ie os feitos como “bestials torturas y actos de razismo por parti d’a polizía de Barzelona”, Casa d’a Solidaridat de Barzelona chunto a las suyas numerosas asoziazions que a configuran, más que más a Plataforma Archentina contra la Impunidat han estau de contino dezaga y ufrión refirme medico a Mariana Huidobro, mai de Rodrigo, cuan se metió en baga de fambre chunto con os tres chobens engarcholaus. A la fin o presidén d’a Comisión de Dreitos Umans d’o Senau chileno, Jaime Naranjo, fazió en chunio pasau unas declarazions en a camara alta manifestando a suya alticamadura por os chobens, do se refirió a la responsabilidat de cusirar os dreitos d’os compatriotas en atros paises. En Chile a repercusión meyatica ha estau muito gran pues se i bei como un caso platero de discriminazión. Rodrigo y Alex naixión en Chile y Juan Daniel en Archentina.

Istos tres chobens ingresarán en a garchola proximamén por un delito que no cometión. Rodrigo ya estió engarcholau dos añadas (dende os 21 dica las 23 añadas d’edat).

Toda ista “Chustizia” ha estau rematada o 12 de chunio de 2009 por o Tribunal Supremo de Madrit que confirmó a sentenzia y mesmo i adibió seis meses a Rodrigo Lanza.

O más gronxiable de tot ye que a filla de Joan Clos yera en a borina d’o 55 d’a carrera Sant Pere mes Baix.

Ye a nuei barzelonesa, do s’achuntan pijautos, secretas, pseudo ocupas traficans con amigos en a polizía y a chen común… do si bi ha un embolique gran a la fin siempre se troba a tres sudamericanos con cualcosa de pintas ta foter-les toda la mierda. Clasismo y razismo en a Barzelona turistica y cosmopolita.

About these ads

Feu un comentari so far
Deixa un comentari



Deixa un comentari

Fill in your details below or click an icon to log in:

WordPress.com Logo

You are commenting using your WordPress.com account. Log Out / Canvia )

Twitter picture

You are commenting using your Twitter account. Log Out / Canvia )

Facebook photo

You are commenting using your Facebook account. Log Out / Canvia )

Google+ photo

You are commenting using your Google+ account. Log Out / Canvia )

Connecting to %s



Follow

Get every new post delivered to your Inbox.

Join 282 other followers

%d bloggers like this: