Filed under: Internazional, Solidaridat, Sozial | Etiquetes: ONU, tortura
O Comité contra la Tortura d’a ONU fazió publico iste mes un nuebo informe sobre l´Estau espanyol. A conclusión no podeba estar-ne atra, daus os informes anteriors y a insistencia d’o Gubierno espanyol en mantener a suya prautica cutiana: a ONU l’insta de nuebas a abolir o rechimen d’incomunicazión a os detenius. Manimenos, a letra chicota d’o informe amuestra atros detalles más bisteros, como a confirmación de que o Gubierno espanyol ha optau per presentar como garant contra la tortura a l’Esfensor d’o Pueblo, ye dezir, a Enrique Mugica Herzog.
O Gubierno de Zapatero ha comunicau a la ONU que as funzions d’o clamau Mecanismo Nacional de Prevención de la Tortura serán feitas per l´Esfensor d´o Pueblo. A creyazión d´iste mecanismo yera una obligazión ta l´Executibo dimpués de que suscribise en abril de 2006 o Protocolo contra la Tortura d´a ONU, que imposa la implementazión d’istas y atras midas. Se trata d’un ente encargau de fiscalizar os periodos de detenzión y que , por tanto, s’abría d’encargar d’entrar en os calabozos y comisarías ta cusirar como se desembolican os periodos d´arresto.
En o suyo diya, a Coordinadera ta la Prebenzión d’a Tortura formada per dezenas d’organizazions de tot l’Estau espanyol ya alertó de que Madrit prebaba d’encomendar as funzions d’o Mecanismo a l’Esfensor d’o Pueblo. Dimpués de dos anyadas de consultas reiteradas con organizazions d’ista demba, fa tasament unas semanas, en bispras de l’examen d’a ONU, y sin fer-ne publizidat, l’Executibo materializó ista intenzión.
Estió en dentrar en o lugar de Ollantaytambo, amán de Cuzco. Yo m’eba despediu d’una colla de turistas y bi yera solenco, mirándome de luén as ruinas de piedra, cuan un nino d’o lugar, eslanguiu, aperrecallau, s’amanó ta demandar-me que le regalase un retulador. No podeba dar-le o retulador que teneba, por que lo yera fendo serbir en bes-te-ne a saber que aburridas anotazions, pero le ufrié debuixar-le un latonet en a mán.
De seguida en dión treslau. Ascape me trobé rodiau d’una zarracatralla que desichiba, a tot chilar, que yo les debuixara bichos en as suyas manetas crebazadas de bardoma y fredor, pelellos de cuero cremau: bi eba qui quereba un cóndor y qui una cullebra, atros s’estimaban más lorez u babiecas y no’n mancaban os que demandaban una pantasma u un dragón.
Y alabez, en o preto d’ixe estrapaluzio, un desemparadet que no debantaba nian un metro d’o sulero, m’amostró un reloch debuixau con tinta negra en o suyo maniquiello:
-Me lo nimbió un tío de yo, que bibe en Lima -dizió
-Y anda bien -le pregunté
-Se rezaga un poco -reconoixió.
Mada retalla parolas d’os diyarios, parolas de todas as grandarias, y las alza en caixas. En caixas royas alza las parolas carrañosas. En caixa berda, as parolas aimans. En caixa azula, as neutrals. En caixa amariella, as tristas. Y en caixa transparén alza las parolas que tienen machia. De cabo cuán, ella ubre as caixas y las mete d’o rebés sobre a mesa, ta que as parolas se mezclen como les pete. Allora, as parolas le rezentan lo que ocurre y l’anunzian lo que ocurrirá.
-Yo paré cuenta de que yera muerto, porque parlaba en latín -m’explicó Ánchel-
Antimás, se’n sabeba. Feba tiempo que Urbano Lugris, artista pintor, chazeba baixo tierra. Pero ixa tardi, Ánchel yera puyau t’a torre, t’asperar-ie l’agüerro, y se lo i eba trobau.
Dende o cobalto d’a costa gallega, Ánchel yera alufrando l’agüerro, que beniba d’a mar, y l’agüerro yera una luz blanca que imbadiba o zielo, laso de boiras. En ixa paz yera Ánchel, blanca bisa, aire nuebo, cuan paró cuenta que teneba a l’artista a o canto suyo. O biello dizió beluna d’ixas maldaz d’el, que en latín sonaban rarizas, pero se fazió a rialleta igual como siempre se’n rediba, que no yera con a boca sino con os suyos periglosos güellos de nino enchegaus baixo l’empandullo d’o pelo.
Y alabez, de bote y boleyo, o zielo se tornó barrenau: baruquió, s’enfoscó, y en ixa foscor amanixión bailando unas boiras benidas de qui sabe an, boiras d’oro, boiras de fuego, boiras de bín, y dimpués plegón os lampiz y as nafrón. Y tremoló lo mundo, sobatiu por os truenos, y sobre o mundo s’esboldregó una plebia d’a fin d’o mundo.
Ánchel chilo:
-¡Don Urbano pinte ixo, ombre!
Quedo baixo a fura plebia, l’artista bufó como un can biello.
Estió en latín, pero podió entender-se-ne.
-¡Pero no beyes que soi muerto, copón!
Un 20 d’abiento pleno d’actibaz, ta iste sabado 19 en tenemos…
Chenta aragonesa bechetariana parada por Fendo Orella. Surtimos d’o nuestro cado ta ficar-nos en o fogaril. ¡Bi soz todas y toz combidaus!
Tampoco no tos ixublidez d’a manifestazión que ha parau a Coordinadera contra la bandiera española d’a Plaza Aragón y o II Festibal Dengún Trango ta Zaga organizau por A Enrestida.
Filed under: Internazionalismo | Etiquetes: Independenzia, otubre17, Referendum
A bida d’exiliau tien bel buen inte y iste en ye uno. O benién diya 13 podré exerzer o mio boto por a independenzia de Catalunya en referéndum. 
Belunas d’as cosas positibas d’iste, amás d’o feito de que se faiga bella cosa asinas:
- Pueden fer serbir o dreito a boto toz os empatronaus en o lugar mayors de 16 añadas y más que más siga cual siga a suya condizión inmigrán.
- En ye refirmau por una trentena d’asoziazions tan diferens como as de donans de sangre, o club d’atletismo, asoziazions de pais u collas de teyatro. Qué goi fa trobar asoziazions que no s’amagan con o tan cutiano en a nuestra tierra “no queremos politizar l’asoziazión” que nos trobamos mesmo en asoziazions en primerías esfensoras d’a identidat aragonesa.
Filed under: Cultura, Internazional | Etiquetes: Daara J, Ismael Lo, wolof
A luenga wolof, tamién clamada “volofo”, ye un idioma charrau en Senegal, Gambia y Mauritania y ye a luenga natiba d’a etnia wolof. Lo charran más de 3 millons de personas.
O wolof ye a luenga más charrada en Senegal, y ye fablau, amás de por a tribu wolof que representa o 40% d’a poblazión, por atros senegaleses.
Arredol d’o 40% d’a poblazión de Senegal (3.2 millons de personas) charra o wolof como luenga materna. Atro 40% lo tien como segunda luenga. En toda la rechión entre Dakar y Saint-Louis, y tamién a l’oeste y sudoeste de Kaolack, a mayor parte d’a poblazión charra wolof. En Casamance y en l’oeste de Senegal, s’emplega o wolof chunto con o mandinka y o diola. L’idioma ofizial de Senagal ye o franzés.
En Gambia, alto u baxo lo 15% d’a poblazión (bellas 200.000 personas) tien o wolof como luenga materna, pero iste idioma tien una influyenzia muito mayor por a suya importanzia en a capital, Banjul, an que o 50% d’a poblazión lo fa serbir como primera luenga. En Serrekunda, a ziudat más gran de Gambia, no bi ha guaire chen d’etnia wolof, pero l’idioma ye fablau por o 90% d’a poblazión. Cada bez más, os chobens d’atro orichen etnico lo fan serbir como primera luenga.
