Filed under: Radio Topo, Sozial | Etiquetes: 1 mayo, Radio Topo, Socalce, Vermut
1º de Mayo 2010
Coso baixo nº 182, solar nº 11 (frent a l’IES Pedro de Luna)
Dende as 12.00 horas
Socalce obrero y popular. 17 anyadas luitando por a comunicacion horizontal
Conciertos, puestos de colectivos, mercadet cultural, radio en directo, teyatro en aragones, socalce y asinas asinas.
¿Por qué femos iste socalce?
Radio Topo leva 17 anyadas acompanyando a os/las ciudadan@s y colectivos d’a nuestra ciudat, y dando voz a a las suyas inquetutz, compromisos y reivindicacions. Anyadas que son estadas tamien de luita por a reconoixedura d’o nuestro dreito alazetal a la libertat d’expresión.
Dimpués de más de 30 anyadas de pervivencia en a muga de l’“alegalidat”, as Radios Libres de l’Estau espanyol tenemos agora la posibilidat de viyer reconoixiu o nuestro quefer como meyo d’expresión libre y directo, esferenciau igual d’os meyos institucionals como d’as interpresas privadas de comunicación.
A nueva Lei Cheneral d’a Comunicación Audiovisual creya una bastida legal que reconoix os meyos de comunicación de caracter no lucrativo pero que han de desenvolicar as Comunidatz Autonomas. Ista ye una qüestion que, prou que no han refleixada os mass-media en as suyas informacions sobre ista lei, más alticamaus por os minutos de publicidat que les permitiba u por a posibilidat de fusions meyaticas.
As Cortz d’Aragón tamién plegan d’aprebar una Proposición No de Lei puixando a o Gubierno d’Aragón a regularizar as Radios Libres, a incluyir-las en a venidera Lei Audiovisual aragonesa y, lo más important, a escuitar antes as suyas proposas.
Por isto demandamos que o Gubierno d’Aragón cumpla con a suya responsabilidat y desenvolique antes con antes, y con participación d’os meyos no lucrativos, una Lei Audiovisual aragonesa y una reglamentación especifica que asegure a existencia present y venidera d’as Radios Libres en Aragón.
Filed under: Fendo Orella, Internazional, Mosica | Etiquetes: Orxata Sound System, València
Orxata Sound System en ye un d’os colectivos mosicals mas inusuals d’a escena electronica actual. Naixiu d’a ciudat de Valencia, en 2003, con l’obchetivo de fer un mezclallo d’a mosica electronica de baile [dende l'electro, techno, drum & bass y dubstep dica o ragga, dub u hip hop] con sonius tradicionals valencianos.
D’o colectivo fan parti quatro cantaires, un trompetista, un baixista, un DJ y un programador/sampleyador.
Han actuau por si fa u no fa, tot o territorio de fabla catalana y han feito chiras por Alemania, Austria, Belchica, Francia y Marruecos.
Dende 2003 publican totz os suyos treballos en Internet baixo licencias Creative Commons y en son una d’as primeras collas en escribir as suyas letras a zofra a travies d’una web wiki.
Ganon en 2006 o premio Grup Revelació d’os Premis Ovidi Montllor con a maqueta “orxata” y en 2008 con o suyo primer disco “1.0″ ganon o premio Ovidi Montllor a o Millor Disco Pop-Rock.
Filed under: Fendo Orella | Etiquetes: AEK, aragonés, asturianu, Chorche Romance, euskera, Fendo Orella, Històries del Paradis, luenga minorizada, Maldaus Bordes, Mario Sasot, Radio Topo, Xavi Sarrià, Xunta
Cronica d’as chornadas de Fendo Orella, desenvolicadas en Zaragoza d’o 17 a o 26 de marzo de 2010, con enchaquia d’o nuestro 6eno cabo d’anyo como programa. Diferents actividatz ta celebrar y compartir de raso en aragonés, en a nuestra luenga de baralla.
Programas especials
L’enguero d’as chornadas vinió lo 17 de marzo, en un progrma especial, d’a man d’a Xunta pola Defensa de la Llingua Asturiana y de l’AEK (Alfabetatze Euskalduntze Koordinakundea – Coordinadera de Euskaldunización y Alfabetización) d’a val de Baztan. Dos luengas de resistencia que podiemos conoixer una mica millor a traviés de qui las charra, amuestra y esfiende.
Una semana dimpués, en o nuestro venient programa, atro especial. Ista vegada o tema central estió a comunicación en luengas minorizadas. Con a mosica en catalán d’o cantautor aragonés Antón Abad, mientres as 2 horas d’iste especial os periodistas Mario Sasot y Chorche Romance nos charrón en aragonés y catalán, y dende l’anvista d’istas luengas, d’experiencias propias y venideras d’a comunicación en Aragón.
Prochección Maldaus Bordes
O chueves 25 de marzo prochectemos en o Centro Social Autochestionau A Enrestida, a pelicula Maldaus Bordes (Inglorius Basterds, de Quentin Tarantino) en version orichinal con subtitols en aragones.
A cinta prencipio puntual, a la meya ta las ueito, con una trentena d’espectadors y con bells pozals bien plenos de palometas de panizo rondando de man en man. O filme, que transcurrio d’entre as risas d’os que ya lo heban visto y a espectación d’os que lo vieban por primer vez, duro, si fa u no fa, dos horas y meya, tiempo que Tarantino, fidel a o suyo estilo, tardo en acotolar os nazis, cómo? Ixo no tos lo recentamos. En rematar, a os espectadors les asperaban, como guinda final de tan suculent plato, unas tapas vechetarianas paradas por os miembros d’o programa: humus, tortiella de trunfas, birostas con fungos y mesmo torrijas facion as delicias de totz os que i fuon y as obras de Brad Pitt y os suyos no afecton a o suyo estamaco.
Qui sabe, habra estau ista la nuestra obra mayestra?
Presentación Històries del Paradis
Rematemos as chornadas con a charrada que se fació en o CSA A Enrestida o viernes 26 de marzo a cargo de Xavi Sarriá, que i acudió dende València ta presentar-nos o suyo libro, “Històries del paradís”.
Xavi Sarriá ye un personache conoixiu por estar o cantaire d’a colla Obrint Pas, que ya ye venida una par de vegadas a Zaragoza, pero lo que no se conoixeba tanto yera la suya faceta d’escritor, una faceta que leva cautivando mesmo antis de prencipiar en o mundo d’a mosica, estando encara bien choven, seguntes nos dició, y en a que ha continau afundando en mayor u minor mida totz istes anyos mientres desembolicaba o suyo treballo musical.
O suyo primer libro “Històries del paradís”, publicau por a editoria Bromera, ye una replega de relatos breus que nos charran de situacions que en diferents partis d’o mundo y dende distintas anvistas refleixan a busqueda d’un paradiso que talment no exista pero cada persona se construye en o suyo esmo con a ideya de trobar-lo bell diya. Gracias a estar a voz d’Obrint Pas, Xavi Sarriá ha teniu a enchaquia de viachar por muitos países d’o mundo y de conoixer a-saber-lo de personas que le han charrau d’as suyas vidas, d’os suyos miedos y d’as suyas asperanzas, y bellas d’ixas historias han feito buena honra ta meter os alazetz sobre os que ha iu creyando los suyos relatos.
Pero a charrada, que se fació en catalá a petición d’a chent que i asistió, no nomás se centró en o libro, que tamién facio honra ta conoixer millor a persona de Xavi Sarriá, parlando-nos-ie d’os orichens d’Obrint Pas, d’a suya experiencia en Radio Klara, emisora libre y libertaria de València, an que feba quan yera tasament un mocet un programa de mosica en valencià, d’as suyas motivacions ta escribir tanto parolas ta cantas como relatos literarios, y como yera de dar, nos charró d’a situación politica y social en o País Valencià, plegando a un inte que más que una charrada estió una rufierta entre amigxs, rufierta que continó una vegada rematau oficialment l’acto y mientres toda la nueit con a chent que estió en a presentación y querió acompanyar a Xavi y amostrar-le tamién a realidat politica u cultural que vivimos en Aragón, por a que estió muito intresau.
Con a millor rematadera posible se fació pues a despedida d’istas chornadas paradas por a chent de Fendo Orella. Nomás nos queda agradeixer a totz os convidaus que i han participau y prou que sí, a todas y totz os que hetz asistiu a belun d’os actos d’as mesmas, asperando que tos haigan feito goyo y tos alienten a empentar a ixena, entre as que somos debant d’o micrófono, y as que sotz ascuitando-nos, a luita por a nuestra luenga, l’aragonés.
Y agora….
Agora ya imos camin ent’o 7eno cabo d’anyo, china-chana y programa a programa. Tanimientres nos trobamos os miercols de 19 a 20 horas en RadioTopo 101.8FM
D’o 9 a o 17 d’abril
Centro Joaquín Roncal (c/ San Braulio 5-7)
http://www.nogara-religada.org/
Viernes 9, 19:00 h.
O desenvolique d’a Lei de Luengas
Juan José Vázquez, viceconsellero d’Educación, Cultura y Esporte d’o Gubierno d’Aragón
Lunes 12, 19:00 h.
Situación de l’aragonés en as escuelas
Mª Pilar Benítez Marco, coordinadera de Proyeuto d’animazión arredol d’a luenga e a cultura aragonesa
Javier Vispe Mur, mayestro d’aragonés, CEIP Asunción Pañart de LAínsa
Martes 13, 19:00 h.
Fauna y cambeos d’o paisache en Aragón
Chabier González Esteban, albéitar de fauna salvache
Miercols 14, 19:00 h.
As ikastolas en Navarra, una experiencia en a educación d’una luenga minorizada
Representants d’a coordinadera d’ikastolas de Navarra
Chueves 15, 19:00 h.
Mosica en luengas minorizadas
José Lera Alsina, mosico, director d’o Grupo Val d’Echo y miembro de l’Academia de l’Aragonés
Xune Elipe, miembro d’a colla en asturianu Dixebra y productor d’o siello discogra co LAguañaz
Viernes 16, 19:00 h.
Situación de l’occitano gascón: recuperación, investigación y espardidura
Pesentación d’o prochecto de cooperación Aragón-Gascunya, culturas pirinencas y nuevas tecnolochías
Laurent Abrate (Nosauts de Bigorra)
Fernando Blas y Fernando Romanos (Parola)
Concierto fin d’as chornadas
Sala The cavern Prior, c/ Santa Cruz 7
Biella nuei & Azawan (chicota presentación d o disco Crebar o muro, con un poema en aragonés d’o sieglo XI)
La orquestina del fabirol (folk aragonés)
Actividatz complementarias en Tarazona:
Sabado 17, 18:00 h.
A Lei de Luengas: analís d’o texto y posibilidatz d’o suyo desenvolique
Sala Albiana
Filed under: Aragon, Cultura, Fendo Orella, Luenga | Etiquetes: Arguis, Lorenzo Cebollero
A os suyos 78 anyos, Lorenzo Cebollero Ciprés ha publicau o libro “A bida en a montaña”, que consta de si fa u no fa 6.000 versos en aragones en os que describe os costumbres, treballos y fiestas que vivio de choven en Arguis, o suyo lugar.
Fue t’a escuela dica os 13 anyos, y dimpues se dedico a las fainas d’o campo dica os 30, cuan vio que “con 40 uellas y 4 campos ya no se podeba vivir”. Lorenzo Cebollero Ciprés, natural d’Arguis, ha quiesto plasmar a traza de vivir en as sarras prepirinencas en o suyo libro “A bida en a montaña”, ta que os mayors lo remeren y as nuevas cheneracions no l’obliden.
“Con mas necesidatz que atra cosa”, Cebollero afirma que a vida en o mont yera “muito sacrificada”, encara que el confiesa que bi estio feliz porque totz en o lugar yeran iguals. “En a posguerra i tenebanos trunfas y no las podebanos vender, y l’olio lo tenebanos que mercar a amagatons”, remera. “Pero yo treballaba de buen implaz, y si teneba vin me eba un trasco y, si no, pues d’augua”. Con 30 anyos baixo ta Uesca, do formo una familia y treballo en o metal dica la chuvilacion. Agora, con 78 anyos, ha decidiu replegar as coplas que dende fa 24 anyadas escribe t’o programa de fiestas d’Arguis. “Dica que me chuvile no me metie a escribir porque teneba atros pensamientos y atra faina. Tampoco no m’instruyon ta isto, yo he escrito lo que he iu aprendendo en a vida”.
Asinas, en un romance de 1.549 estrofas en aragones, Cebollero recenta os costumbres, fiestas, fainas y treballos d’antesmas. En a zaguera copla fabla tamien sobre a vida d’agora. “O cambeo ha estau ta millor, lo d’antesmas ye majo ta recentar-lo y ta que a chent no l’oblide. Si cada cheneracion no deixara escritas as suyas tradicions, se cacegarian”. O libro tamien contribuye a dignificar l’aragones que l’autor fablaba de choven en o suyo lugar. “Antesmas baixabanos ta Uesca y se’n rediban d’a nuestra traza de fablar, y agora ye d’o reves, lo quieren rebiscolar. A yo me pa muito bien”.
Quitau d’o Diario del Alto Aragon
Ista publicacion ye ta tu. No te conoixco, pero soi quasi seguro de que tiens un telefono mobil en a pocha.
En 15 anyos, o mobil s’ha espardiu por o planeta como garra tecnolochia no lo i heba feito antes. Dica plegar en una situacion absurda: en l’Estau espanyol, igual como en quasi toda Europa, os contratos de telefonia mobil brincan agora o numero d’habitadors/eras.
O control social se ye tornando cada vegada mas fosco, embolicau y integrau. Cuala ye a tecnolochia de control mas eficaz, a tele u as camaras de vidio-veixilancia? Con o mobil plegamos en a combinacion ideyal dentre o Big Brother d’Orwell y a sociedat de comunicacion capitalista. Ista sosmision voluntaria tan gran y a dependencia que embreca a una ferramienta desembolicada y promocionada por o sistema nos leva a qüestionar bellas cosas.
Frent a ista situacion, as personas y collas alticamadas por a suya privacidat, as suyas libertatz individuals u menazadas por a veixilancia policial, se’n fan d’as posibilidatz tecnicas de control a travies d’o mobil. A historia nos contrimuestra que si en atras situacions os poderosos hesen teniu as ferramientas tecnolochicas actuals ta veixilar a la suya poblacion, pocas d’as dianas d’a represion (por conviccion, orichen, sensibilidat u por a suya practica) s’hesen puestas eslampar. Nusatr×s mesm×s, a travies de luitas ecolochistas u vecinals, de refirme a migrants u sencillament por ligar-nos con personas embrecadas en ixos movimientos, en Barcelona u en atros cabos d’Europa, hemos visto como a policia puet, baixo a sincusa d’a seguridat, violar a intimidat de ciudadan×s fogueretas, fichar a disidents politicos, sosmeter a o suyo control a colectivos de tot… A parti mas violenta d’ixa lochica puet estar a espardidura, dende o 11 de septiembre, d’o marco antiterrorista plegando por eixemplo en detencions de militants por espardir panfletos en Francia, publicar un diyario critico en euskera, ubrir una pachina d’informacion Twitter en os Estaus Unius y una luenguisma lista d’abusos. En iste contexto, desembolicar ideyas diverchents y expresar-las puet tornar-nos en sospeitos×s.
