Ista publicacion ye ta tu. No te conoixco, pero soi quasi seguro de que tiens un telefono mobil en a pocha.
En 15 anyos, o mobil s’ha espardiu por o planeta como garra tecnolochia no lo i heba feito antes. Dica plegar en una situacion absurda: en l’Estau espanyol, igual como en quasi toda Europa, os contratos de telefonia mobil brincan agora o numero d’habitadors/eras.
O control social se ye tornando cada vegada mas fosco, embolicau y integrau. Cuala ye a tecnolochia de control mas eficaz, a tele u as camaras de vidio-veixilancia? Con o mobil plegamos en a combinacion ideyal dentre o Big Brother d’Orwell y a sociedat de comunicacion capitalista. Ista sosmision voluntaria tan gran y a dependencia que embreca a una ferramienta desembolicada y promocionada por o sistema nos leva a qüestionar bellas cosas.
Frent a ista situacion, as personas y collas alticamadas por a suya privacidat, as suyas libertatz individuals u menazadas por a veixilancia policial, se’n fan d’as posibilidatz tecnicas de control a travies d’o mobil. A historia nos contrimuestra que si en atras situacions os poderosos hesen teniu as ferramientas tecnolochicas actuals ta veixilar a la suya poblacion, pocas d’as dianas d’a represion (por conviccion, orichen, sensibilidat u por a suya practica) s’hesen puestas eslampar. Nusatr×s mesm×s, a travies de luitas ecolochistas u vecinals, de refirme a migrants u sencillament por ligar-nos con personas embrecadas en ixos movimientos, en Barcelona u en atros cabos d’Europa, hemos visto como a policia puet, baixo a sincusa d’a seguridat, violar a intimidat de ciudadan×s fogueretas, fichar a disidents politicos, sosmeter a o suyo control a colectivos de tot… A parti mas violenta d’ixa lochica puet estar a espardidura, dende o 11 de septiembre, d’o marco antiterrorista plegando por eixemplo en detencions de militants por espardir panfletos en Francia, publicar un diyario critico en euskera, ubrir una pachina d’informacion Twitter en os Estaus Unius y una luenguisma lista d’abusos. En iste contexto, desembolicar ideyas diverchents y expresar-las puet tornar-nos en sospeitos×s.
Iste control funciona a travies d’o miedo y fa basemias. Asinas s’espardion bellas falordias ligadas a os telefonos: «Empecipiamos l’asambleya, ¿hetz amortau os vuestros mobils?», «¡Fote, o mio mobil s’ha tornau barrenau, de seguras que ye punchau!» Como todas as falordias gosan de trafucar, son de mal aclarir y qüestionar a zofra. Querebanos aqui documentar istas tecnicas de veixilancia y proposar practicas a comunal ta eslampar d’o uello d’o Big Brother. ¡Para cuenta! A informacion relativa a istas tecnicas gosa d’estar de muito mal trobar dentre os secretos d’a policia y a foscor d’a chusticia sobre as suyas trazas d’investigacion. Antimas, a contina evolucion d’istas tecnolochias fa que iste conteniu tienga calendata ta malmeter-se…
Si en prencipiar o mobil se vinclaba a o businessman, china-chana s’ha tornau en a ferramienta imprescindible de l’humano liberal. Corresponde asinas a muitas d’as suyas «cualidatz» emblematicas: individual, consumidor, moderno, flexible, eficient, mobil, en comunicacion permanent y asinas asinas. A espardidura masiva y sin qüestionar d’o mobil ha feito parti d’a espardidura d’istas valors, modificando de raso los vinclos socials. D’atra man, no tener mobil significa marguinar-se.
No hemos visto a luz, o mobil no ye o principal periglo d’o sistema, no ye a nueva luita prioritaria. Tampoco no somos primitivistas, no refusamos as tecnolochias u as ferramientas contemporanias y prou. No negamos que o mobil puet fer muita honra en bells casos. En situacions d’emerchencia (detencions, accidents, enrestidas…) no bi ha dengun atro meyo de comunicacion que permita avisar y reaccionar con tanta rapidez y eficiencia. Pero en cheneral, pareixe que s’ha ixublidau que fa 10 anyos no tenebanos mobils y que si no nos cuacan podemos vivir sin ellos. Si no quiers deixar-te alticamar por o miedo, quiers continar esbulligandote contra la inchusticia, si quiers desembolicar un pensamiento critico, te convidamos a leyer lo que vien contino. Bueno, a verdat ye que nos feria asabelo goi que le pretases fuego a o tuyo mobil y t’imos a dar buenas razons ta fer-lo u a lo menos ta pensar-ne…
http://quematumovil.pimienta.org/
2 comentaris fins ara
Deixa un comentari
No será “móbil” en ista grafía nueva?
Comentari per Anònim abril 6, 2010 @ 6:59 pmGracias!
Comentari per fendoorella abril 8, 2010 @ 6:35 am