Viernes 29 d’octobre
20:00 horas
Sala Arena Rock (Plaza Utrillas, 3)
Curba Roya, con enchaquia d’o suyo cinqueno cabo d’anyo de vida, organiza y presenta una nueit de mosica negra ta iste viernes:
The Offenders (Cosenza, Italia)
http://www.myspace.com/theoffendersit
Funkópatas (Zaragoza)
http://funkopatas.com/
En rematar o concierto as sesions en os platos de Nanote y Mignoni, companyers de Radio Topo 101.8 FM con o programa Skandalo en las Ondas.
Ta saber-ne mas:
http://curbaroya.wordpress.com/
«Lunes par d’atro dende 1978, o BOE publica huei o nuevo diccionario d’a luenga castellana, valiu entre o 24 y o 31 d’agosto, con os cambeyos en o significau d’as parolas seguntes calendata y hora. O nuevo lexico t’a venient semana no conserva denguna d’as definicions establecidas anteriorment y entre as nuevas se troban por eixemplo, as venients:
O martes, ‘casa’ querrá decir ‘zapato’, o chueves ‘treballo’, o domingo ‘intemperie’. Dende as 19 horas, fuera de miercols y viernes, querra decir ‘calculo infinitesimal’. T’o significau de ‘zapato’, ‘treballo’, ‘intemperie’ y ‘calculo infinitesimal’, veiga as dentradas correspondients.
O venient miercols, ‘democracia’ querra decir ‘dictadura’ dica las 9 d’a nueit. Hora en a que pasara a nombrar lo que agora entendemos por ‘chandrio’. O viernes, sabado y domingo significara, respectivament, ‘cortina de humo’, ‘merienda de negros’ y ‘yo me lo guiso y yo me lo como’. O sentiu de todas istas expresions, tamien cambeyant, estara de buen trobar por orden alfabetico.
O significau de ‘libertat’ cambeyara cada seis horas mientres a venient semana, incluyindo-ie -entre atras- as venients acepcions: ‘esclavitut’, ‘bombardeyo’, ‘automóvil’, ‘prostitucion’, ‘espachau’, ‘temporada taurina’. En o tocant a la parola ‘humanidat’, cada fablant podra eslechir o suyo conteniu semantico librement (parando cuenta en a nueva definicion de ‘libertat’).
Os ciudadanos que continen fendo servir o castellano d’a semana zaguera (u atro encara mas antigo) estaran pinyoraus con arreglo a o decreto 14/79 y eventualment trataus como foranos no comunitarios.
As parolas d’ista noticia han d’entender-se en o sentiu especificau por o BOE.»
O pasau lunes 18 d’octobre o CSO La Vieja Escuela, do ya se levaba tiempo planeyando lo Hackmeeting, trobada anyal de hackers y hacktivistas, estio desaloixau de maitinada por a policia. Ta espachar-nos d’asti, aproveiton os refuerzos policials plegaus de Barcelona, y a hora en a que os vecins y vecinas d’o vico se descansaban dimpues d’una semana de fiestas d’o Pilar.
O desaloixo d’o pasau lunes 18 d’octobre no aturo a dengun, sino que nos facio mas fuertes: esferents colectivos participon en una manifestacion de refuse, en a que os nuestros retes se viyon as caras en a carrera. No quieren enterar-se que fer-nos fuera d’un puesto no atura cosa: as asociacions de vecins, l’asambleya okupa y o hacktivismo continan construyindo alternativas, y quan nos ye menester un puesto, lo trobamos. Saliemos de La Vieja Escuela, y agora nos trancamos en a garchola: hemos ubierto as puertas d’a Garchola d’a Republica Independient de Torrero.
No podebanos trobar un puesto millor. O vico ye canso d’alufrar iste malfurriau espacio, canso d’as megas promesas de ceder o puesto ta l’emplego vecinal, cansos de que os suyos prochectos d’emplego comunitario y social sigan ignoraus por os que nomas prometen como mercancia electoral.
O nuevo espacio liberau ye en a Plaza d’a Memoria Historica, encara que pareixca que os que claman as plazas padeixen d’amnesia. En iste puesto cumplio condena tot o que pensaba esferent mientres a zaguera dictadura militar. No meten a l’azar os suyos focos de represion. En 1917 debanton as suyas cletas en o vico d’as minas de do salion os cantals t’os suyos palacios.
Garra dispositivo de control ye ta cutio, y huei engueramos ista garchola reapropiada t’os vecins con unas chornadas en as que continar subvertindo l’emplego d’a tecnolochia. A era dichital no ye soque o paradiso d’o consumo que quieren vender-nos, ye tamien un scenario de resistencias dichitals, de reapropiacion y construccion d’alternativas a comunal con a tecnolochia como aliada.
O Hackmeeting ha prencipiau huei, como hebanos prometiu. En istos intes nos trobamos atrapaciando l’espacio a tot estrus, ye granizo lo treballo que se bi ye fendo.
Viene-te-ne con a tuya refitoleria, no deixes que te lo cuenten: Viene-ie y treballa a zofra. Viene-ie y mulla-te, viene-ie y pregunta.
As charradas prencipiaran o viernes 22 de tardes.
Bienvenius t’o goza!hack.
Bienvenius t’a Garchola de Torrero.
Zaragoza resiste,
Republica Insurchent de Torrero
21 d’octobre de 2010.
Filed under: Aragon, Cultura, Luenga | Etiquetes: ASCUMA, Maella, matarranya
Baixa-te o programa (pdf) con todas as actividatz.
Filed under: Aragon, Social, Solidaridat | Etiquetes: antirrepresiva, BIC, chenta
Quan a basemia d’o control social y d’a represion politica se fa reyalidat
O maitin d’o lunes 15 de marzo de 2010 un companyero recibe a temprana visita de 4 efectivos d’a policia espanyola vestius de paisano, os quals le puixan a que les acompanye ta comisaria a “fer-le unas preguntas”. Dimpues d’o traslau, de l’espulle d’ensers (cordons de zapatiellas y atras prendas incluyidas), de documentacion y l’interrogatorio, tot fendo un poder por ligar a atros companyers (fotografia incluyida) con un delito de furto con violencia, se le porta deteniu y esposau en un furgon fosco de tot ta calabozos. Mientres meyant estrucias levan ta comisaria a un atro companyero que tamien ye deteniu con un trato rebaixant de raso, a primeras horas d’a tarde.
Os represors no malfurrian o tiempo: tot presionado a os detenius, atros fan un poder ta enreciar os cargos con atros supuestos delitos. Ya a la fin d’a tarde, un d’ells remata de prestar declaracion chunto a l’advogau suyo, quan le comunican que o suyo client a lo menos fera una nueit asti; y, antes que l’atro no veiga a o suyo esfensor, fan que ambos companyers se veigan mientres bells breus intes: ¿compartir miedos? ¿chustificar amenazas? ¿crebar o companyerismo? ¿forzar bella mena de declaracion? Qualsiquiera podio estar l’obchetivo.
Ya de nueitz, y ambos por deseparau, complegan en calabozos do les estara reyalizada (esviellada, millor dito) a ficha policial en ausencia d’os suyos advogaus. Aproveitando a situacion d’indefension d’os chovens independentistas, as fuerzas d’ocupacion quiton muestras de saliva ta cautivos d’ADN amas de fotografias y uellas de todas as trazas imachinables, igual en o formato clasico y legal con tinta sobre papel como con embolicaus trastes de tecnolochia dichital. Dimpues un nuevo traslau por deseparau dica la comisaria de San Chuse y de botiboleyo a puesta en libertat con cargos d’os dos companyers.
Diyas mas tarde os dos compareixen debant d’una rueda de reconoiximiento en os chuzgaus de Zaragoza. Dengun d’os testigos pueden meter-los en o puesto y l’inte. Conseqüentment o chuzgau d’instruccion numero 12 dicta o sobreseimiento libre respecto d’os acusaus.
Si quiers saber-ne mas tiens o texto anterior completo aqui.
Y si quiers refirmar a os companyers con os gastos chudicials, tiens una convocatoria o sabado venient:
Chenta antirrepresiva
Sabado 26 d’octobre, 15.00 horas
A Enrestida (Callizo San cristobal, Zaragoza)
Filed under: Aragon, Colonialismo, Papels | Etiquetes: Arbeloa, copa d'o mundo, Pilars
Plega o 12 d’octobre y Zaragoza se chupe de fiesta. As carreras se plenan de chent, chovens y mayors, d’aqui y de dilla. Os cantons se plenan de botiguetas d’artesania, de churrerias y castanyeras. As plazas lo fan de mosica, conciertos y teyatro. No cal que fer-se una gambadeta por o centro d’a ciudat ta comprobar-lo.
Plega o 12 d’octobre y Zaragoza se plena de colonialismo. A tamas de que bi ha chent treballando firme y en una endrecera oposada, os Pilars continan pudindo a relichion, espanyolismo y baturrismo. No cal que fer-se una gambadeta por o centro d’a ciudat ta comprobar-lo.
No cal que fer-se una gambadeta por o Paseyo Independencia ta parar cuenta que ta El Periodico los Pilars ye a venda de chapers con o sinyal rojoygualda en a suya caseta. No cal que fer-se una gambeta por o mercau aragones d’as Murallas romanas ta parar cuenta que t’o concello os Pilars, en o mercau aragones, ye a venda de pulseras con o sinyal rojoygualda. No cal que fer-se una gambadeta por os bars y arredols d’a Plaza de Toros ta parar cuenta qui son os d’a Fiesta Nacional (a taurina y a d’o 12 d’octobre, prou que si). No cal que fer-se una gambeta por a Plaza d’o Pilar ta veyer qui va t’a ufrenda d’a Patrona d’a Hispanidat y d’a Guardia Civil. No cal que leyer o Heraldo. No cal que veyer o programa de fiestas. No cal que veyer o nuestro concello.
Faiga honra y como ya zaguer eixemplo d’a basemia espanyolista y d’o “todo por la patria” en o que s’han tornau os Pilars, ista noticia:
A copa d’o mundo tasament estio unas poquetas horas en Zaragoza, chusto ta que Alvaro Arbeloa la debantase en o pregon d’as Fiestas d’o Pilar. O domingo de maitins tornaba ta Melilla, do yera programada una recepcion oficial en o concello d’a ciudat.
O viernes a copa -u a suya replica, porque l’equipo campion no recibe a orichinal que mientres a celebracion en l’estadio- yera en Salamanca. O sabado de meyodiyas plegaba en Melilla y dimpues de chentar saliba enta o Concello de Zaragoza.
Tanto viache y lo achustau d’os tiempos han creyau sospeitas. Bi habra mas d’una copa? Dica las quatro d’a tarde d’o sabado o famoso trofeu estio en a seu d’a ULOG-24 de Melilla. Seguntes explico lo director d’a television publica de Melilla la coincidencia de que o president d’a Federacion Melillense de Futbol siga tamien brigada d’ista unidat propicio que a copa acompanyase una chenta castrense. Bells testigos aseguran que a copa se retiro enta las quatro d’a tarde.
D’atra man, fuents d’o Concello de Zaragoza aseguran que o trofeu plego en a capital aragonesa enta la meya t’as siet y as siet d’a tarde. Un horario imposible de cubrir en vuelos comercials y que creyo suspicacias por a posibilidat de que bi hese varias replicas. A Reyal Federacion Espanyola de Futbol (RFEF) lo desmintio: “No bi’n ha que una. Ye verdat que nos somos pensando de fer-ne atra, pero encara no la hemos feita”.
Manimenos, a solucion a l’enigma apunta ta atros camins. A investigacion feita por a television publica melillense apunta a que o trofeu plego en Zaragoza en un avion privau, en o que viachon un representant d’a RFEF y un vichilant. O coste d’istos vuelos ye de bells 10.000 euros, seguntes ixas mesmas fuents, una cantidat que se desconoixe qui boso.
Rage Against The Machine
Know your enemy
Naixu con conoiximiento y o punyo alto / Un testigo a o maniquiello nafrau / Tot enantando en o 92 /Encara en una cambra sin vistas/ Lo que has de saber / Lo que has de saber / Que quan yo digo imos, imos, imos /Amplificador y amplificar /Desafiar /
Soi un chermano con un esmo furo
Cal prener l’accion / No nos ye menester a clau /Imos a dentrar-ie
Cal fer qualcosa / Sobre venganza, una insignia y una pistola / Porque te ranco lo micro, esgarrar a scena, esgarrar o sistema / Yo naixie ta enrabiar contra ells / O punyo en a suya cara, ye o puesto / Y cacegare l’estilo de tot
Conoixe o tuyo enemigo
A parola ye naixida / Luita contra la guerra, que le floran a os regles / Agora no’n tiengo de paciencia / Malaudo d’a complacencia de tot / Con o D E S A F I O / L’esmo d’un revolucionario / Tan platero o camin / O dido en a tierra d’as cadenas / Que? A tierra d’a libertat? / Qui te dicio que ye o tuyo enemigo?
Cal fer qualcosa / Sobre venganza, una insignia y una pistola / Porque te ranco lo micro, esgarrar a scena, esgarrar o sistema / Yo naixie ta enrabiar contra ells
Cal prener l’accion / No nos ye menester a clau / Imos a dentrar-ie
Agora no’n tiengo de paciencia / Malaudo d’a complacencia de tot / Agora no’n tiengo de paciencia / Malaudo d’a complacencia de tot / Malaudo de malaudo de malaudo de malaudo de malaudo de tu / Ye plegau l’inte de bosar / Si, conoixco os mios enemigos/ Ells son os mayestros que m’amostron a barallar con tu
Compromis, conformidat, asimilacion, chusmesa / Ignorancia, hipocresia, brutalidat, elite
Totz ixos son os suenios americanos
A nuestra emision te pareix buena igual como una trunfa?
A nuestra calidat fa que o tuyo receptor sone como una trunfa?
Te fan goi as trunfas onduladas? A nusatr@s as rustidas y a freqüencia modulada.
Por tot ixo, te proposamos… Radio Topo: A trunfa.
Brenda popular y trunfera organizada por Radio Topo en o solar d’o Coso Baixo 182.
Viernes 15 d’octobre a partir d’as 19.00 oras.
Bi presentaremos a nuestra nueva emision en streaming y podcast. As trunfas rustidas y a mosica as metemos nusatr@s y contamos con tu t’acompanyar-nos, pleva, trone u faiga fredor continamos emitindo.
RADIO TOPO 101.8FM
Baixo a foscor de l’angunia capitalista, d’o control d’o mercau, de diners y pres, de reyalidat borde, de uelladas de bislai, d’intreses amagaus, de risetas megas, de pochas plenas y fresqueras buedas, nos trobamos nusatras. Como purnas en intes de fer luz.
Baixo ixa boira preta de cultura televisada, d’ocio esbafau, de radices ixutas, de tiempos acotolaus, d’esmos conquerius, de voluntatz escruixinadas, de colonialismo mediatico, de brancas talladas, d’ixubliu mortal, nos trobamos nusatras. Como lagors en intes de chitar.
Somos purnas. Somos luz. Somos a fin d’a foscor.
Somos lagors. Somos chitos. Somos qui escampa la boira.
Somos os alazetz que no deixan que s’espalde a utopia. Somos os pilars d’a tierra.
Pilars disidents 2010
Programa
