Tenébanos a tierra y ells a biblia.
Trancamos os uellos,
y quan los ubriemos,
ells teneban a tierra y nusatros a biblia.
Baixa y ascuita o nuestro zaguer programa en o venient vinclo:
Continamos emitindo totz os lunes de 18.00 a 19.00 horas, ascuitanos en o 101.8 FM de Radio Topo u por internet. Tamien puetz fer-lo lo martes de maitins d’ixas dos mesmas trazas, de 11.00 a 12.00 horas en as repeticions.
Filed under: Fendo Orella, Cultura, Mosica | Etiquetes: Aspencat, Naixen Primaveres
Cada matí es divisa a l’horitzó una remor que ve de la foscor…
siluetes sense nom carregades de rancor!
vidas sin vida esclavas d’a eterna aspiració,
avancen sense descans i ja res les detindrà!
¡Nuevas primaveras naixerán!
¡Nuevas primaveres vendrán!
Aspencat
Colla naixida d’os lugars valencians Xaló, Orba y Benissa en 2005.
En istas 6 anyadas de vida, han librau o suyo prochecto mosical en tres CDs.
En 2007 quitón o suyo primer treballo La festa està servida, continón en 2009 con Obri la llauna y dos anyadas dimpués, en iste 2011, han feito l’enguero d’o suyo tercer treballo: Naixen Primaveres.
Naixen Primaveres ye feito por 11 cantas, en as quals han colaborau un puyal d’amigos que i adhiben “plurilingüismo y multiculturalidat” como los mesmos Aspencat dicen. Ells son chent de Sargento García, Salsamuffin, Obrint Pas, La Gossa Sorda, Orxata, Sophy zoo, La Raíz y Skalissai.
Ta saber-ne más y/u baixar de baldes o suyo zaguer treballo:
www.aspencat.org
Filed under: Internacional, Social | Etiquetes: 15M, acampada, Feminismo, Sol
Somos en a plaza porque:
- Queremos una sociedat en a que o centro sigan as personas y no pas os mercaus. Por ixo decimos: servicios publicos de baldes y vitals como a educación, a salut, l’atención y cudiau a la nineza y a las personas con necesidatz especials d’atención frent a os retalles socials, a reforma laboral y d’as pensions.
- Queremos o compromís de todas y totz ta la construcción d’una sociedat do no cullan as violencias masclistas en todas as suyas expresions: economica, estetica, laboral, fisica, psicolochica, sexual, institucional, relichiosa, en traza de tracta con fins d’explotacion laboral y sexual…
- Queremos decidir librement sobre o nuestro cuerpo, desfrutar y relacionar-nos con ell y con qui nos pete.
- Queremos aborto libre y de baldes y educación afectiva y sexual.
- Queremos una sociedat diversa do se respecten as multiples trazas de vivir o sexo y a sexualidat (lesbianas, gais, intersexuals, bisexuals, transexuals, transcheners…) y se bi reconoixca o dreito a la sexualidat en todas as etapas d’a vida. Desichimos a despatolochización d’as identidatz trans.
- Desichimos que l’estau y a iglesia deixen d’interferir en as nuestras vidas.
- Ta fer un cambeo real en a sociedat cal prener as decisions por consenso y que as mullers bi participen de traza decisiva.
- Ye imprescindible incorporar una anvista feminista en a transformación d’o modelo economico y social a o servicio d’as personas y o planeta, en os servicios publicos, en a creyación d’atro modelo de ciudat y chestión d’o territorio y, en as politicas ambientals y agroalimentarias.
- Ye imprescindible que as mullers sigan protagonistas en ditos procesos de transformación social, politica y economica y en as decisions que se prengan ta ista fin. Y tamién en o disenyo, execución y evaluación d’as politicas resultants.
- Os temas que afectan a las mullers afectan a toda la sociedat y queremos que sigan en o preto de l’achenda politica, economica y social.
- Desichimos que as treballaderas domesticas y de l’hogar se incluigan en o rechimen cheneral d’a seguridat social y tiengan dreito a negociación colectiva.
- Desichimos que se contabilice o treballo domestico como parti d’a riqueza d’os países.
- Desichimos o reconoiximiento d’as fainas de cudiau d’as personas, os hogars, a vida y a suya socialización completa: tamién, o dreito a decidir librement si queremos u no cudiar, o dreito a estar cudiadas y cudiaus en condicions y o dreito a l’autocudiau. En resumen, o dreito a la Cuidadanía.
- Desichimos o reparto d’os treballos y a riqueza. Treballar menos ta treballar todas y totz. Condicions laborals y profesionals dignas. Reparto igualitario d’o treballo productivo y reproductivo, igual remuneración y reconoiximiento por os treballos entre mullers y hombres. Y que a riqueza siga a o servicio d’as clases populars.
- Desichimos o reconoiximiento d’os dreitos d’as treballaderas sexuals.
- Desichimos que se reconoixca la ciudadanía d’as personas sin condicions legals ni normativas, a eliminación d’a Ley de Extranjería y d’os Centros de Internamiento de Extranjeros.
- Desichimos l’emplego d’un parlache que nombre a todas as personas y siga libre d’homofobia, masclismo, clasismo y racismo.
- Reivindicamos que se valore y reconoixca os sabers y conoiximientos d’as mullers y a suya función primordial como transmisoras de cultura.
- Queremos una escuela coeducativa.
- Queremos una sociedat do cullan toda mena de familias y collas de convivencia.
- Refusamos a heteronormatividat y feminidat obligatoria.
- Somos contra las guerras, refusamos l’emplego d’o cuerpo d’as mullers como arma de guerra y no creyemos que denguna intervención militar guarancie a paz. No a la militarización d’as sociedatz, a la producción y a o comercio d’armas. Convidamos a fer obchección fiscal.
- Reivindicamos a solidaridat transnacional feminista como ferramienta ta cambear o mundo. En todas as plazas bi ha feministas indignadas, nos adhibimos a las suyas reivindicacions y les damos tot o nuestro refirme.
¡Sin as mullers no bi ha Revolución!
¡A Revolución estará feminista u no’n estará!
Filed under: Social | Etiquetes: acampada, democracia real ya, Radio Topo 101.8 FM
Huei sabado 21 de mayo de 2011, dende as 10.00 d’o maitín emisión de Radio Acampada en o 101.8 d’a freqüencia modulada zaragozana.
Manifiesto “Democracia Real Ya”:
Somos personas normals y corrients. Somos igual como tú: chent que se debanta de maitins ta estudear, ta treballar u ta fer-se o pré, chent que tien familia y amigos. Chent que treballa firme totz os días ta vivir y dar un esvenidero millor a os que nos rodian.
Uns nos consideramos más progresistas, atros más conservadors. Uns creyents, un atros no. Uns tenemos ideyolochías bien definidas, atros nos consideramos apoliticos… Pero totzs nos ne femos y somos indignaus por o panorama politico, economico y social que veyemos a o nuestro arredol. Por a corrupción d’os politicos, interpresaires, banquers… Por a indefensión d’o ciudadano normal.
Ista situación nos fa mal a totz diariament. Pero si totz nos chuntamos, podemos chirar-la. Ye hora de meter-se en movimiento, hora de construir de conchunta una sociedat millor. Por ixo sostenemos firmement o venient:
- As prioridatz de toda sociedat avanzada han d’estar a igualdat, o progreso, a solidaridat, o libre acceso a la cultura, a sostenibilidat ecolochica y o desenvolic, o bienestar y a felicidat d’as personas.
- Existen uns dreitos alazetals que habrían d’estar cubiertos en istas sociedatz: dreito a la vivienda, a o treballo, a la cultura, a la salut, a la educación, a la participación politica, a o libre desembolic personal, y dreito a o consumo d’os biens necesarios ta una vida sana y feliz.
- L’actual funcionamiento d’o nuestro sistema economico y gubernamental no para cuenta d’istas prioridatz y ye un entrepuz t’o progreso d’a humanidat.
- A democracia parte d’o pueblo (demos=pueblo; cracia=gubierno) asinas que o gubierno ha d’estar d’o pueblo. Manimenos, en iste país a mayor parte d’a clase politica sisquiera nos ascuita. As suyas fainas habrían d’estar a de portar a nuestra voz ent’as institucions, facilitando-ie a participación politica ciudadana meyant cauces dreitos y prebando de tener o mayor beneficio t’a mayoría d’a sociedat, no a d’enriqueixer-se y millorar a la nuestra costa, parando cuenta soque a os dictaus d’os grans poders economicos y agafando-se a o poder a traviés d’una dictadura partitocratica menada por as immobils siglas d’o PPSOE.
- L’anglucia y acumulación de poder en uns pocos fa desigualdat, crispación y inchusticia, lo qual mena ta la violencia, que refusamos. L’obsoleto y antinatural modelo economico vichent bloquea la maquinaria social en una espiral que se consume a sí mesma enriqueixindo a uns pocos y ficando en a pobreza y a escasez a la resta. Dica o colapso.
- A voluntat y fin d’o sistema ye la acumulación de diners, metendo-la por dencima d’a eficacia y o bienestar d’a sociedat. Malfurriando recursos, estricallando lo planeta, chenerando desemplego y consumidors infelices.
- Os ciudadanos femos parte de l’engranache d’una maquina destinada a enriqueixer a una minoría que nian sabe d’as nuestras necesidatz. Somos anonimos, pero sin nusatros mica d’isto existiría, pues nusatros movemos o mundo.
- Si como sociedat aprendemos a no fiar o nuestro esvenidero a una abstracta rentabilidat economica que nunca no va en beneficio d’a mayoría, podremos eliminar os abusos y mancas que totz patimos.
- Ye menester una Revolución Etica. Hemos meso los diners antes que no lo Ser Humano y hemos de meter-los a o nuestro servicio. Somos personas, no productos d’o mercau. No nomás soi lo que merco, por qué lo merco y a qui le’n merco.
Por tot o debantdito, soi indignau.
Creigo que puedo cambear-lo.
Creigo que puedo aduyar.
Sé que chuntos podemos.
Sale con nusatros. Ye o tuyo dreito.
Filed under: Cultura, Fendo Orella | Etiquetes: A Enrestida, AraInfo, Fendo Orella, Historias del Paraíso, La Pantera Rossa, Xavi Sarrià
Ahiere chueves 19 de mayo, en o Centro Social-Librería “La Pantera Rossa”, d’a man d’A Enrestida y o programa de Radio Topo “Fendo orella”, se realizó a presentación d’o libro “Historias del Paraíso” en castellano, editau por a editorial Txalaparta y presentau por o suyo autor, Xavi Sarrià.
Dimpués d’a edición orichinal, en catalán, que s’escribió fa uns 2-3 anyos, Txalaparta s’intresó por a suya traducción a o castellano.
Xavi contó que siempre le ha feito goyo d’escribir, encara que prencipió con a mosica, a o canto d’a suya colla, Obrint Pas, que plegan d’editar nuevo disco.
En o libro se i recentan historias (en concreto 22), relacionadas con o que viven con a colla, refleixando o mundo actual. Un mosaico d’historias curtas en esferents países y contextos. O libro se prencipió a escribir en una chira, contando con l’aduya d’a resta d’integrants d’a mesma.
Se tractaba d’escribir historias de países por os que i pasaban, querendo blincar t’a realidat, sin escribir sobre a situación politica, soque entender a realidat d’as personas, meter-se en a suya piel, entender os suyos sentimientos, reflexionar o porqué pasan ixas cosas. O tema d’o paradiso siempre ye present en o libro, refirindo-se a os paradisos personals. Xavi estió contando diversas anecdotas de Venezuela, Bosnia, Finlandia… que son bells d’os países que son citaus en o libro.
As historias s’enreligan unas con atras a traviés de citas, querendo deixar claro dende qué punto de vista ye escrito lo libro. Introducen a las historias, reflexionando arredol d’ellas. A cita mas important, a que ubre y zarra o libro, que i contiene l’esprito d’o mesmo. Tamién comentó que ye muit important fablar en literatura “d’as nuestras cosas”. No estar politicament correcto, amostrando as contradiccions d’a vida.
Ascuita a presentación:
http://www.archive.org/details/PresentacinHistoriasDelParasoDeXaviSarri
Cronica y audio d’os companyers d’AraInfo.
Colonización parlamentaria.
En l’anyo 2000 José María Aznar avienta o trescole sobre as rudas chents aragonesas. A respuesta popular estió implacable. Onze anyadas dimpués, ixe Partido Popular puet ganar as esleccions nacionals (seguntes dicen as enqüestas). De vez, o PSOE ha colaborau en disenyar un scenario ecocida sobre o territorio (casinos de cartón-piedra, pistas d’esquí, linias d’alta tensión, entibos), con a colaboración d’un convenciu PAR. Si gana o PP, derogarán a Lei de Luengas, igual como Felipe V. Asinas son. Encletaus en a nuestra estupenda garchola, uellamos como ilegalizan candidaturas (Sortu, Bildu) en o país vecín. Espanyolismo sobre representau. Por aquí en sobra, l’uno y l’atro, como lo turnismo d’a Restauración isabelina. Prencipian as esleccions, y nomás nos ne queda decir que l’autocolonización ye o pior sintoma d’un pueblo, como ixos interminables clasicos d’o fútbol, bipolars y repetitivos.
Que prencipie l’espectaclo banal.
Articlo quitau d’o blog aragonando.
Baixa y ascuita o nuestro zaguer programa en o venient vinclo:
Continamos emitindo totz os lunes de 18.00 a 19.00 horas, ascuitanos en o 101.8 FM de Radio Topo u por internet. Tamien puetz fer-lo lo martes de maitins d’ixas dos mesmas trazas, de 11.00 a 12.00 horas en as repeticions.
Arrebato ubre as suyas puertas.
Un atra vegada.
Han pasau si fa u no fa dos anyos dende que ixas mesmas puertas se trancasen debant d’o nuestro naso.O tranque y precinto d’o nuestro hogar (y de muitos mosicos de tot o mundo que conoixen Zaragoza por iste espacio d’expresión libre y soberano) s’alazetó en un zarpau d’argumentos tecnicos. Asinas lo explicamos publicament en o suyo inte: bi heba “un problema administrativo” y lo íbanos a resolver.
Mientres 15 anyos nunca no bi habió dengún problema con o vecindario d’o que femos parte, a tamás d’as rumors que en bell inte s’haigan quiesto tornar en verdatz. Arrebato se relaciona con o suyo vico y con a resta d’o mundo en os mesmos terminos: respecto y comunicación.
Por ixo, igual como antes, os nuestros conciertos rematarán a las 22.00 horadas.
Por ixo, y millor que no antes, continaremos explicando por qué y ta qué femos lo que femos a qualsiquiera que entre en casa nuestra u s’intrese por lo que bi ocurre.
No somos de tornada porque a nuestra actividat no ha reblau mientres iste periodo. A programación en atros locals y espacios d’a ciudat en son un esclatero eixemplo. A totz ells o nuestro más sincero agradeiximiento. Sin ixublidar a participación social en o vico d’a Madalena con actividatz como lo mercadet ta vecins y comercios “Calles Vivas”, d’o que agora mesmo somos parando a suya segunda edición que prencipiará o sabado 4 de chunio.
Porque asinas lo entendemos y porque somos convencius de que ixa ye a millor traza d’empentar a cultura dende abaixo, queremos dar treslau a la resta d’a ciudat: ixas expresions y actividatz que clamamos “arte” son menesters ta la nuestra convivencia como dignas de respecto y dedicación. No podemos permitir que se continen tornando en un obchecto más de consumo u en truca politica que nos mantiene en o papel d’espectadors-consumidors. En Arrebato decimos “no” a o pan y circo d’o sieglo XXI y tos convidamos a promover o mismo prochecto en os vuestros vicos. Dengún no sabe quantos Arrebatos se sostienen mientres una decada con os diners que cuesta cada macro-concierto, cada súper-espectaclo u cada mega-prochecto, d’ixos que son de moda, siempre vuedos de participación y dedicaus ta fins de marketing politico. Desichamos o dreito a treballar d’ista traza. ¿Qué será ixo de l’“espacio publico” si no practicamos a verdadera chestión publica y directa d’as actividatz que se i fan? Desichamos o dreito a disponer d’espacios en os que recuperar o sentiu d’o termino “Centro Cultural” u “Centro Social”. ¡Quantos más, millor! ¿Quántos espacios vuedos y inutilizaus bi ha en a nuestra ciudat? ¡Milentas!
Prou de pasividat y consumo. Enta alto a participación.
En a cultura como en a resta d’a nuestra vida cutiana:
Solencos no podemos. Con amigos, sí.
Larga vida al Arrebato
Zaragoza, mayo de 2011.
