Dende A clau roya (ACR) tos convidamos a participar en a chornada “nos esmelicamos d’o masclismo” iste venient sabado 2 de chulio en A Enrestida. A chornada penderá en:
- 12:00 debantadera de l’espacio ta la catrinalla
- 12:30 taller de risoterapia
- 15:00 chenta popular
- 16:30 karaoke
Tot l’esquimen será destinau ta una campanya de prevención d’a violencia masclista.
Tos i asperamos a todas y totz!!!
Ta saber-ne más:
http://aclauroya.wordpress.com/
Viernes, 1 de chulio · 20:30
CSO KIKE MUR (TORRERO)
CRIATURA – Hardcore punk melodico
SIFX – Hardcore melodico orchestra
GEN – Rock de serie B
O Pacto de l’Euro. Un trango más enta la esclavitut.
Atra nueva tongada de retalles y privatizacions s’amana. En as altas esferas economicas y financieras europeas y con l’embreque dreito d’os politicos que gubiernan a rechión de l’Euro, se paran as nuevas reformas salvaderas de l’Estau d’o Bienestar. O mesmo que nos iba a dar a unidat monetaria y que s’alazetó en o credito, en a explotación d’obrers y inmigrants, l’endeudamiento d’a clase treballadera u en as hipotecas, trampas que a la fin fación creyer-se rica a la pobretalla. Os “nuevos ricos” contiban endeudando-sen a o compás d’Eurovisión y os meyos de comunicación aproveitaban ta tractar d’extirpar, qual cirurchano Astray pero con muita mas sutilidat, l’esmo d’ista nueva gran clase meya. EEUUropa caminaba de buen gana. Si ahiere feban honra todas istas trampas que han sosteniu a sociedat de consumo mas salvache que no ha conoixiu o viello continent, huei prencipian a estar inútils. A chent enganyada tanto tiempo prencipia a parar cuenta d’a trama quan as suyas aspiracions de tener un esvenidero prospero y tranquilo, ya estase treballando u especulando, s’esfan de bote y boleyo. L’ature, os embargos y a indichencia avanzan y a l’arreu, a monico, van trucando a la puerta de muitos d’ixos “nuevos ricos” d’antes más, huei afogaus, arruinadas, endeudaus y embargaus. A las puertas de qui nunca no deixón d’estar pobres trucó anteriorment y de traza masiva. En pocos anyos os aturaus se multiplicón. Inmigrants retomando lo furo camín d’o nomada por supervivencia y millons de familias vivindo por debaixo d’o ran d’a pobreza. Os politicos, como si estasen meros vasallos d’os mercaus, lechislan y pactan ta continar enrestindo a la motor d’a suya maquinaria, a @s mas febles. A gran masa que sostiene a os banquers y a o poder interpresarial contina sufrindo as nuevas reformas laborals que desichen istas pantasmas clamadas mercaus y en as que ya tramenan retacules dignos d’a Edat Meya. Os dreitos que guaranciaban como inalienables ta las personas irán desapareixendo chino-chano ta rematar tornándonos en autentica mercancía, esclavos, numers en mans d’as interpresas multinacionals y os bancos. Tot prebando de rescatar estaus que no son estaus prou austeros u a os que, como diz Angela Merkel a amagatons, se les ha iu un poquet a mán. ¿Sisquiá rescatan a os suyos pueblos? Ixos rescates no se traducen que en una condena quasi ta cutio ta la chent, a la que afogarán un poquet mas mientres uns cuantos anyos ta poder bosar os intreses de l’ampre facilitando as privatizacions, aturando a inversión social y auspiciando as reformas laborals, os espachaus y a perda de soberanía en mans d’os rescatadors, que rematarán d’acotolar os pocos dreitos que pueda conservar o pueblo. Y ixo que nunca no plegará a desfrutar d’esquimen social dengún ya que totz ixos millons que agora han de tornar con creces se destinarán ta bosar deudas que nunca no chenerón u inversions privadas de quals esquimens no ferán parti. D’atra mán, viyerán como a suya situación ye mas insostenible cada día. Y tot frent a o malfurrie d’una clase politica y sindical que no resuelve os suyos problemas. Tanimientres, istos mecenas que son os que menan os mercaus, pueden continar aumentando y rentabilizando as suyas inversions en istos países y en atros como l’Estau espanyol, sobre os que acucuta dende fa tiempo a menaza. Si a formula ha teniu tanto exito en Latinoamerica y Africa… ¿porque no va a funcionar aquí?
Y agora un atra nueva reforma. Y maitín ¿qué?
No bi ha reforma posible.
Ye hora de luitar sin compleixos, con intelichencia. En totz os frents y por totz os meyos menesters u maitín ya estará prou tarde.
Se tresbatió lo miedo a l’esvenider porque ya no s’alufra ni a corto plazo. Ixe sistema no cal rescatar-lo. Cal estricallar-lo.
¿U encara no yes canso de minchar mierda?
¡A PRENER AS CARRERAS!
XXIV SEMANA CULTURAL D’A MADALENA
d’o 17 a o 26 de chunio de 2011
http://avmadalena.org/semanacultural/
Prengamos as carreras, faigamos cultura. Hemos adhibiu costumbres, trazas de vida, conoiximientos que se fan y se transmiten, que nos permiten desembolicar un chuicio critico con o que nos rodía. Adhibamo-nos una vegada más, a la rebelión, con as nuestras fiestas autochestionadas. Trobando-nos, igual como totz os días, en as plazas, fendo chuntos, enreligándonos, enchugardius. A Cultura no se vende, no ye allena ni intresada, a cultura no ye negocio, a Cultura ye o Pueblo creyando.
Filed under: Cultura, Mosica, Social | Etiquetes: Creative Commons, Cultura libre, magofermin
Magofermin presenta…
Viernes 10 de chunio
21.00 h
Prau, Visión Túnel, Gen y Fanfara Shavale.
Sabado 11 de chunio
17.00 h
“Aprendiendo a amplificar” con teatro y danza, mercadet social y tallers: radio, maquillache y globoflexia.
19.00 h
Con poco rudio Dechusban y Abraham Castellón.
21.00 h
Con qualcosa más de rudio Abraham Castellón y a suya banda, Los Draps, Turtle Giant, Iconoclash y El último skalón.
magofermin, zaragoza, primavera 2011.
O venient mes de chunio, os días 10 y 11, se celebrará la segunda muestra de cultura libre: “Amplificando el silencio” do as chents vivients van a poder conoixer y fer a conoixer as esferents trazas d’entender a cultura sin corsés ni cortapisas.
Dende o colectivo mosical magofermin, queremos reivindicar o papel d’a cultura alternativa y l’asociacionismo activo en a nuestra ciudat, como cheneradors de ret cultural y artistico, y como catalizadors d’a conciencia y cohesión social.
A muestra tien por obchectivo fundamental que a cultura rebuta por as marguins de l’Ebro, do va a arroclar-se l’actividat en istos dos días: mosica libre, trobada de colectivos, mercadet social, actividatz infantils, tallers educativos y asinas asinas.
A chornada d’o viernes prencipiará si fa u no fa a la meya t’as nueu con mosica libre. Tres collas de casa con estilos prou esferents, pero que comparten a traza d’entender a espardidura d’a suya mosica –editan baixo licencias libres Creative Commons- nos ufrirán o suyo directo: Prau, Visión túnel y Gen. Ta rematar o día un convidau que crebará o silencio… si en bell inte bi’n habió: Fanfara Shavale.
O sabado estará una chornada más fura… en prencipiar de tardes compartirán espacio en a Ribera de l’Ebro y a Uerva esferents actividatz ta espardir y fomentar a participación ciudadana en a cultura colectiva y libre. Escomenzaremos con “Aprendiendo a amplificar”, una ripa d’actividatz endrezadas t’os chicotz: taller de globoflexia con Rayuela y de maquillache a cargo d’a colla d’animación Pachamama, actuacions de teatro y danza organizaus por o PIEE Pedro de Luna.
Istas actividatz se refirmarán en un zarpau d’actos paralelos: trobada de colectivos y mercadet, brenda popular vechetariana (opción vegana), Taller de Radio Libre por do pasaremos totz os participants que queramos explicar lo i que femos, mosica con poco rudio de tardes con Abraham Castellón y Dechusban.
A partir d’as 21 coladas mosica con más rudio. De nuevas concierto con diversidat d’estilos y una fin común: Amplificar o silencio. Abraham Castellón y a suya banda, Los draps, Iconoclash y en o suyo Eurotour 2011 os brasilenyos Turtle Giant y El último skalón.
Ta saber-ne más:
http://magofermin.org/amplificando-el-silencio-ii-10-11-junio/
Una fabrica aragonesa contina fendo-se tristament famosa a ran mundial. Cal que sepamos más sobre ella y cómo, a tamás d’a faina criminal que desembolica, puede continar quitando esquimens d’a nuestra ciudat, por meyo de recalificacions de sulers consentidas por o Concello de Zaragoza.
Mambrú (Alternativa Antimilitarista.MOC)
En a noticia que os meyos reproducen en o Reino de Espanya tocant a la venda de bombas a Libia se’n ha explicau que, coincidindo con a prohibición fixada en Oslo, a fabricant, Instalaza, dentró en crisi y l’esvenidero d’a suya fabrica de Zaragoza pende d’un convenio urbanistico que ha demandau -sin tasament contrapartidas- ta construyir 160 viviendas, duplicando lo sinyalau en o PGOU d’a ciudat.
O «pilotazo» que puede salvar a Instalaza d’a quiebra
Recientment, o Concello de Zaragoza, con os votos de PSOE, PP y PAR, ha aprobau una recalificación d’a demba que ocupa Instalaza en a carrera Monreal, en o preto d’o Casco Historico, permitindo-le quasi duplicar a edificabilidat maxima que admite o PGOU ta que con l’esquimen inmobiliario chenerau ta la interpresa -si fa u no fa entre 11 y 12 millons d’euros- acceda a quitar as instalacions d’o centro d’a ciudat. Existe una xorrontadera coincidencia de cifras entre lo estimau d’esquimen minimo por iste «pilotazo» urbanistico, y as perdugas de 11 millons d’euros que alega la interpresa haber sufriu en investigación, desembolic y inversión en maquinaria ta la fabricación d’as MAT-120, que se’n son idas por o desagüe d’a prohibición internacional, y que, pareixe que habrían meso a la interpresa en quiebra tecnica. Una quiebra que ye brincando por l’inte por a resta d’o suyo catalogo d’armamento, de vez que atras interpresas d’armas espanyolas viyen tamién frustradas as suyas programadas vendas a Libia.
Instalaza ha aguardau a asegurar-se o present institucional d’a recalificación ta fer publica a suya reclamación de 40 millons más a o gubierno central por «daño emergente y lucro cesante», dimpues de que Espanya decidise viedar as bombas de racimo, en o que, manimenos, más bien pareixe estar un esclatero alcuerdo entre as interpresas d’armamento afectadas por a prohibición internacional, y o gubierno espanyol, que, una vegada más, bosarán os nuestros impuestos.
Dengún no menciona, en ixe sentiu, que una «propuesta que recullise elementos d’intrés publico prou importants» como refusan os tecnicos a la propuesta orichinal de recalificación, bien podese estar a que forzase a la interpresa a cambear d’actividat.
Libia: bombas de fragmentación con denominación d’orichen Zaragoza
A interpresa d’armamento Instalaza, con fabrica en Zaragoza, ye estada en o centro de una polemica internacional por o suposau emplego d’as bombas de fragmentación (modelo MAT-120), que a interpresa vendió a o rechimen de Gadafi, en o bombardeyo d’a ciudat libia de Misrasta. Encara que a Convención sobre Municions de Fragmentación, nunca no sinyada por Libia, vieda ixa mena d’armamento dende 2008, Instalaza quitó tres permisos d’o gubierno espanyol ta la venda de bombas de fragmentación a ixe país en 2007 por valor de 3,83 millons d’euros, que fació efectiva en 2008.
