Fendo Orella 101.8 FM

Quiesto Nacho. Me xorronté quan me dicioron que hebas saliu malament d’a bestial agresión d’a policía en a carrera Lagasca y me fa contento que ya sigas millor. No quiero entrar en a qüestión d’a conveniencia u inconveniencia d’a vuestra okupación d’un inmueble, si bien me dicibas que, por l’inte, unicament lo yeratz escoscando y apanyando, pues no quiero que ixe árbol faiga de mal viyer a selva. Tamién sabié que no tos espachoron de l’edificio, pues hebatz decidiu quedar-tos difuera, en a carrera, sobre a cera. Tot sabendo lo succediu, no quiero imachinar lo que podría haber-ie ocurriu adintro, sin camaras ni testigos.

Rematés en l’hespital, con un fascal de contusions y feridas, producto d’as patadas. Sé que yes una persona convencida de que o pacifismo ye a vía adequada en quasilquier situación u acción reivindicativa. Encara más, me dicioron que insistiés a os tuyos companyers ta no dar argumentos a os vuestros detractors en fer servir actitutz u actos violentos. Tú mesmo me recentés o día siguient que, en o preto de l’estrapalucio d’ixe maitín, diciés a os policías que podebatz estar os suyos fillos u os suyos chermans. Yo te creigo, Nacho; te conoixco y te creigo. Sé que dices a verdat en recentar que, mientres un policía te chafaba la cara contra o suelo, atros t’abatanaban o cuerpo y un atro más te crebó d’una patada en os testiclos. Poco podioron viyer os companyers, fotografos, periodistas y curiosos, pues os policías heban feito un rolde t’amagar-ie a scena, pero a tuya cara y o tuyo cuerpo delatan o trogloditico actuar d’ixos policías, y ya no pichas sangre, bien se vale, quienta xorrontadura teniemos en o cuerpo totz, más que más tus pais.

No soi capable d’adivinar qué pasaba por a cabeza d’ixos policías que actuoron con tant extrema violencia con tú. Reciben o nombre d’”achents de l’orden”, pero, viyendo lo que i facioron, no quiero ixe orden t’o mio país ni ta la suya chent. Imposan orden, sí, pero nomás o que fa honra a os que s’autodenominan tamién “chent d’orden”. Son clamaus “fuerzas de seguridat”, pero a suya violencia puede producir muita poca seguridat a qualsiquiera. Desconoixco qué les desichen ta estar policías, pero debant de tot s’habría d’inculcar-les que han d’estar eixemplo de civismo ta toda la ciudadanía y que l’emplego d’a violencia ha d’estar siempre proporcionau. Precisament por ixo, son de más as patadas y as faltadas a una persona como tú, dica deixar-te inconscient y chitau por tierra, entre a chent que demandaba una ambulancia y miraba de reanimar-te en baldes.

No quiero xublidar-me d’o buen treballo que a policía fa en atros ambitos y de cabo quan en circunstancias penibles. Totz les ne agradeixemos y valoramos. Pero he visto a la policía en Barcelona, en Zaragoza, en Grecia, en Siria y en muitos atros puestos d’Europa y d’o mundo, y en totz os casos bi ha una mesma común denominador: enristen a os que poco u cosa tienen, a os indignaus, a las victimas d’o desorden mundial y a crisi economica, y esfienden os intreses d’os ricos, d’os que implen a suya riqueza con a carnota de qui van quedando en o ribazo. Me pregunto si bella vez ixos policías pararán cuenta d’a faina real que son desembolicando. Segurament, muitos d’ells contestarán que s’amugan a cumplir ordens, ignorando que a sincusa de “yo cumplo ordens” ye en l’alazet d’as maldatz y crimens de muitos rechimens totalitarios. No’n he visto de policías detenendo a un interpresaire por perpetrar un ERE inchusto y criminal, a os financiers responsables d’ista crisi, a os tres mainates de Bankia que cobrarán 10,1 millons d’euros a l’anyo, a quantos consienten que en l’Estau espanyol bi haiga más de 1,2 millons de viviendas vuidas. Istos y atros muitos como ells son os verdaders delinqüents, pero no los detienen.

M’estrania tamién o silencio d’os partius politicos que se dicen de cuchas en Aragón. Deixo de costau a o PSOE, tresbatiu dende fa ya masiau tiempo, pero me miro ta CHA y IU y pareixen no haber-se-ne enterau de mica, no enterar-se de cosa. Me pregunto en qué ye quedando ixo que antes más decíbanos con argüello: cucha. Me pregunto qué entienden y que pretenden realment ixos grupos politicos con a suya “oposición constructiva”, tamién si han decidiu que feitos como los d’o chueves pasau en a zaragozana carrera Lagasca no les pertoca.

No me manca que demandar-te que contines asinas y no cambeyes, que a violencia institucional no faiga dandaliar as tuyas conviccions pacifistas, que contines creyendo que atro mundo ye posible. Gracias por estar amigo de yo. Un fuerte abraco.

Antonio Aramayona
Profesor de Filosofía