Filed under: Aragon, Social | Etiquetes: Consello d'Aragón, Guerra Civil
http://www.arredol.com/trobada-a-bandera-do-consello-daragon/
Hue, 19 de noviembre de 2011 en Caspe, dentro d’o ciclo de Chornadas “1936, l’anyo en que tot cambea” ha estau presentau l’unico eixemplar conoixiu de bandera aprebada en 1937 por o Consello d’Aragón.
A bandera ha estau presentada por l’investigador Agustín Martín, o tamién investigador Amadeo Barceló, de Caspe y por Ruben, un coleccionista d’articlos d’a guerra civil que la adquirió fa no guaire en un antiquario, y dimpués d’analisar-la, se dio cuenta que heba de veyer con a historia d’Aragón dimpués de descartar que estase catalana.
Clamó a un investigador d’Alcanyiz, que le metió en contacto con Amadeo Barceló, a qui ninvió una foto. Amadeo Barceló conoixeba por Julián Casanova que Agustín Martín buscaba a bandera d’o Consello, alazetando-se en esferents testimonios escritos. Dimpués de meter-se en contacto Amadeo y Agustín, plegoron a la conclusión inequivoca que ista yera a bandera d’o Consello d’Aragón, d’alcuerdo con a descripción feita en os boletins oficials d’o Consello d’Aragón.
A bandera presentada hue ye un banderin d’auto, seguntes Ruben, d’os que se meteban en os autos oficials. Os tres han coincidiu en lanzar a hipotesi que puede estar a bandera de l’auto de Joaquín Ascaso, president d’o Consello y suposan que estio furtada por un soldau franquista, como contrimuestra una chicota inscripcion que bi’n ha en un lateral d’a bandera.
Filed under: Fendo Orella, Okupacion | Etiquetes: CSO Kike Mur, Radio Chabolo
Una nueva radio Radio Libre ye naixida en Zaragoza, se diz Radio Chabolo y emite en o 107.6 FM dende o vico de Torrero:
http://radiochabolo.noblezabaturra.org
Empentada por o Centro Social Okupau Kike Mur, con seu en l’antiga Garchola de Torrero (Plaza d’a Memoria Historica), bi ferá iste venient viernes 2 d’aviento a presentación d’a suya programación con una fiesta mutant a partir d’as 21 horas.
Adintro d’ista programación, Radio Chabolo conta con un zarpau de programas propios y reemisions de programas d’atras Radios Libres, como por eixemplo Radio Bronka de Barcelona con Cinco bárbaros en la cabeza u Radio Topo, d’ista mesma ciudat, con El Acratador, Skándalo en las Ondas, La Enredadera, Ciutat Podrida y Fendo Orella.
Ascuita Radio Chabolo en o 107.6 FM y, remera que Fendo Orella i sonaremos reemitius os viernes de 17.00 a 18.00 horas.
Filed under: Fendo Orella, Radio Topo | Etiquetes: Berri Txarrak, Consello d'Aragón, CSO Kike Mur, decreiximiento, Eleccions, Noam Chomsky
“O miedo ixuta a boca, mulla as mans y mutila. O miedo de saber nos condena a la ignorancia; o miedo de fer nos reduce a la impotencia. A dictadura militar, miedo d’ascuitar, miedo de decir, nos convirtió en xordomudos. Agora a democracia, que tien miedo de remerar, nos fa amnesia; pero no cal estar Sigmud Freud ta saber que no bi ha alcabia que pueda amagar a vasura d’a memoria.”
Eduardo Galeano
Baixa-te-ne o nuestro zaguer programa d’o chueves 24 de noviembre.
Remera, totz os chueves en Radio Topo (101.8 FM zaragozana), de 6 a 7 d’a tardi, Fendo Orella, programa de raso en aragonés.
Filed under: Aragon, Ecolochía, Social, Tecnolochia | Etiquetes: decreiximiento, economía, felicidat, Meyo ambient
“O punto de partida ta explicar a teoría d’o decreiximiento ye simple: no se puede creixer economicament de traza indefinida en un planeta finito. Dito d’atra traza, si continamos consumindo os recursos naturals a la velocidat actual, s’acotolarán y china-chana viviremos en un mundo pior.
A contaminación d’as auguas, a esferra d’o suelo fertil, l’acotole d’os combustibles fosils, l’empioramiento d’as condicions laborals u o progresivo retalle en as libertatz individuals son simptomas inequivocos d’a crisi global que padeixemos y indicios claros de que o camín trigau no ye l’adequau.
Manimenos, istas adversidatz, luen d’estar un obstaclo t’o desembolique d’as capacidatz d’o ser humano, suposan una oportunidat de superación, de creiximiento personal y colectivo. Un nuevo punto de partida dende o que, unindo l’antigo a o nuevo, demos os primers trangos enta un esvenidero millor.
As chornadas que acontecerán d’o 21 de noviembre a o 22 d’aviento en Zaragoza, son pensadas ta, por una parti, revelar o dificil scenario en o que nos trobamos y, por atra, dar a conoixer de qué traza podemos decreixer d’una traza ordenada, feliz y digna; d’una traza que cambie o nuestro modelo de vida y contribuiga a la nuestra felicidat present y futura.”
Filed under: Fendo Orella, Radio Topo | Etiquetes: 20N, D'estrela a estrela, El Corazon del Sapo, EZLN, FARC, Non Servium
Triga un enemigo gran y isto t’obligará a creixer ta poder concarar-lo. Mengua o tuyo miedo porque, si ell creixe, tu te farás chicot”, me dició lo Viello Antonio una tardi de mayo y plevia, en ixa hora en que reinan o tabaco y a parola.
Subcomandant Insurchent Marcos
Programa con una poqueta sabor zapatista por o 28eno cabo d’anyo d’a fundación de l’EZLN. Bi faciemos o zaguer resumen d’a emisión d’estrela a estrela, manifestación antifaixista o 18 de noviembre en Zaragoza, FARC-EP, breu sobre as esleccions y noticietas de l’aragonés. Tot isto con mosica d’as collas El Corazón del Sapo y Non Servium con o suyo nuevo treballo “El rodillo del kaos”.
Baixa y ascuita o nuestro zaguer programa:
Emitimos como siempre en o 101.8 FM de Radio Topo, totz os chueves de 18.00 a 19.00 horas.
Dende fa anyadas, nos venimos movilizando Noviembre par d’atro ta parar una calendata tan sinyalera como o 20N, día en o que fa ya 36 anyadas, se metió fin a la dictadura menada por Francisco Franco con a suya propia muerte. Con tot y con ixo, isto no suposó un tranque de tot con ixe rechimen, pues hemos recibiu como herencio d’ixa cruel dictadura un legau de chuches, militars, policías y guardias civils, que estioron complices y executors d’as atrocidatz que se’n cometioron mientres o franquismo y que huei encara continan impunes con total beneplacito d’o sistema. Ye por isto que continamos denunciando o continismo d’iste rechimen faixista, que infrinche opresión, censura y represión a os estratos más baixos d’a sociedat. A mal clamada “Transición democratica” habió de suposar a fin de tot isto, manimenos, s’atorgó l’amnistía a tot o tarabidau politico d’a dictadura, concedendo impunidat a asasins y torturadors y posibilitando que muitos d’ells se tornasen en os primers politicos d’a democracia.
Actualment, os treballadors y as treballaderas somos bosando as conseqüencias d’a crisi d’o sistema economico capitalista y somos estando victimas d’un retalle de dreitos sin precedents y que plega en todas os dembas. En tot iste scenario se son dando situacions inacceptables; tot plegando as interpresas en esquimens escandalosos, fan despius masivos y realizan ERE’s con total impunidat. Isto nos fica en un marco laboral precario de tot, empentau por o sistema y materializau por os Estaus complices en plans economicos de caracter neoliberal. Faina que son permitindo, d’atra man, os sindicatos mayoritarios, desamparando y vendendo a o treballador, empachando o conflicto con a patronal y fendo de colchón d’a luita de clases. No ixublidamos o burguil de vadas organizadas por as y os treballadors que han estau respondidas con cruel violencia por parti d’o tarabidau represor d’o sistema en totz os pueblos de l’Estau. D’atra mán, denunciamos y no ixublidamos a situación de l’eslabón más feble d’a clase obrera, inmigrants y mullers, doblement oprimidas por o sistema. Os y as inmigrants hemos de concarar-nos a o discurso racista y xenofobo que ha iu chupindo a sociedat, un discurso que s’ha feito cargo d’espardir a extremadreita y que en un puyal d’enchaquias ye estau difundiu por os meyos de comunicación. As mullers, por atro costau, hemos d’afrontar encara a imposición d’o patriarcau en as esferents dembas d’a suya vida.
A isto cal adhibir-le a conculcación de dreitos fundamentals tocants a vivienda, sanidat, educación y resta servicios publicos, os quals son estando obchecto d’una politica de privatización que va en detrimento d’os ciudadans. Paradigmatico en iste sentiu ye o caso d’a privatización d’a sanidat, con a implantación d’o copago y a construcción d’hespitals con fondos publicos y chestionaus por interpresas privadas. Tampoco no ixublidamos ni perdonamos a cesión y venda d’a educación a mans privadas, como ocurre con os plans Bolonia y EU 2015 como caso mas sinyalero, que suposa a puyada d’as tasas y torna as becas en creditos hipotecarios. Por no charrar d’o puyal de desafucios que son patindo mils de familias unicament en estar miembros d’a clase treballadera.
Mientres todas istas anyadas son muitas as luitas y os movimientos socials que s’han organizaus en contra d’iste sistema capitalista, dende os comandos autonomos anticapitalistas d’as anyadas 70 dica o choven movimiento d’o 15-M. A respuesta por parti de l’Estau en mayor u menor grau, ye estada siempre a mesma: censura, tortura y persecución politica y chudicial en traza d’enrestidas y montaches policials, incomunicación, detención, criminalización y ilegalización de colectivos, asociacions y partius politicos. O sistema reprime qualsiquier luita que supose un avance social. Por isto, huei queremos fer homenache a totz os que luitan y más que más a totz ixos que son presos por concarar-sen a iste inchusto sistema. Ye por isto que desichimos a puesta en libertat decamín de totz os presos y presas politicos d’iste Estau.
¡Y ta forro de bota, encara tienen a lacha de demandar-nos o voto o 20 de noviembre! ¿Ta qué? ¿Ta continar con iste sistema capitalista que nos extorsiona y oprime cada día? ¿Ta que puedan continar emplindo-sen a pocha a costa d’a nuestra sudor y as nuestras glarimas? L’hombre que comete una error y no a corriche, en comete un atra encara mayor.
Amás de denunciar, si bi ha qualcosa que reclamemos huei, ye chusticia, que se faiga chusticia y prencipien a bosar os verdaders culpables d’ista situación. Y si bi ha qualcosa que haigamos de fer, ye chuntar as nuestras fuerzas ta fer frent definitivament a iste sistema capitalista y a os suyos estaus complices.
Por tot isto, lo claman esleccions y no’n son.
Por tot isto, lo claman democracia y no’n ye.
MANIFESTACIÓN ANTIFAIXISTA
Viernes 18 Noviembre.
19.30 h.
Parque Pignatelli
Filed under: Fendo Orella, Radio Topo | Etiquetes: abellas, Cheb Balowsky, D'estrela a estrela, The Twangs
“Ta cumplir os suyos obchectivos o sistema capitalista fa servir (y ha feito servir historicament) dos trazas de gubernabilidat u domino: por a fuerza (gubiernos melitars) u por modelos de partius politicos, ye decir, gubiernos controlaus por o sistema economico que fan o suyo cometiu emplegando a “persuasión” disenyada dende tot o sistema ideolochico ya desembolicau y baixo l’amenaza coercitiva d’o sistema represivo (sistema chudicial, policial, etc). Os primers se’n conoixen como dictaduras, os segundos como democracias.
Toda la historia d’o capitalismo ye escrita sobre ista dinamica de l’eixercicio d’a “gubernabilidat” u eixercicio d’o poder, que se’n van complementando. Encara que a traza más acorde con a persuasión ye a clamada “democracia”, cada vegada que, emplegando os propios regles de chuego d’o sistema, han conseguiu a mayoría parlamentaria collas que han meso en periglo o status quo d’o capitalismo (bien haiga estau o capitalismo transnacional u l’eixerciu por as burguesías nacionals), un golpe d’estau ha meso a fin a ditos gubiernos, tornado ta la “democracia” dimpués que a limpieza tanto de personas como d’ideyas (no dandaliando en l’acotolamiento fisico de toda oposición) guaranciaba de nuevas o control d’o poder por parti d’o capital.”
Nekane Jurado, d’o libro “Independencia, de reivindicación historica a necesidat economica”.
Baixa y ascuita o nuestro zaguer programa:
Emitimos como siempre en o 101.8 FM de Radio Topo, agora con nuevo horario: totz os chueves de 18.00 a 19.00 horas.
Filed under: Ecolochía, Internacional, Meyo Ambién, Represion, Social, Solidaridat
O Gubierno de Navarra ha calificau como delito d’atentau a l’autoridat l’acción d’os tartazos anti-TAV aventaus contra Yolanda Barcina. Ista calificación d’atentau ye a unica traza de fer treslau d’o caso enta tribunals espanyols.
Dende una anvista de dreito internacional publico, se vulnera o prencipio de chuez natural predeterminau por a lei, y se permite que os delitos calificaus como atentau a l’autoridat, feitos por “espanyols” a personas espanyolas difuera d’o territorio estatal sin que haiga habiu dilichencias chudicials en o país an que s’han feito, sigan competencia de l’Audiencia Nacional.
Que iste caso vaiga a estar instruyiu por l’Audiencia Nacional mete de manifiesto una vegada más o excepcional d’iste tribunal, inexistent en as organizacions chudicials d’os países d’o nuestro entorno y hereu d’o Tribunal d’Orden Publico franquista.
Entendemos que l’acción d’os tartazos s’ha calificau como atentau a l’autoridat como a unica traza de que siga competencia d’un tribunal espanyol. Dende o movimento de desobediencia a o TAV Mugitu! queremos denunciar l’animo platerament criminalizador d’o Gubierno de Navarra que ha calificau d’ista traza un acto comico de protesta feito sin dengún animo de fer mal y que en Francia no suposó nian sisquiera una detención.
En dependencias d’a policía foral, a os tres detenius se les obligó a dar muestras d’ADN como condición indispensable ta quedar en libertat, no estando ísta preba obligatoria. Debant de l’amenaza de continar detenius y de incurrir en un delito de desobediencia, dos d’ells i accedión o viernes pasau de nueitz y o tercero lo sabado de meyodíyas. Queremos denuciar ista coacción a os detenius ta que facilitasen o suyo ADN, metendo ficacio que ista preba corresponde a la averiguación d’un delito y manimenos en iste caso no teneba garra sentiu ya que l’acción estió publica y os detenius s’endrezaban a fer una rueda de prensa tamién publica.
O zaguer d’os detenius meso en libertat, que ha pasau 22 horas en os calabozos ha denuncia o trato recibiu ya que se l’ha privau de dormir mientres a nueit. A tamás que solicitó terne que terne que amortasen a luz, a Policía Foral se i negó aducindo que a camara de seguridad suposadament colocada ta empachar autolesions no podría grabar os movimientos d’o deteniu. Asinas mesmo se le negó una segunda manta.
Por tot isto consideramos que tres d’os nuestros companyers han estau victimas d’un secuestro feito por a Policía Foral baixo ordens de Yolanda Barcina, que a tamás de considerar l’acción como “un encete muy dulce” a o frent d’o CTP (Comunidat de Treballo d’os Perineus) no ha encaixau mica bien o “laminero” d’a nuestra propuesta. Tanto ye asinas que con l’acusación feita pende sobre istas personas posibles penas de garchola en un tribunal d’excepción.
Animamos a continar amostrando a nuestra oposición a o TAV fendo accions de desobediencia.
Mugitu! Mugimendua
