Hue chueves 16 de febrero a las 19.30 horas en a plaza Santa Engracia, os sindicatos CATA, CGT, CNT, Intersindical d’Aragón y SOA, convocan una manifestación contra l’ature, os retalles y en esfensa d’os servicios publicos.
Con a sinya de l’Alcuerdo “II Alcuerdo ta l’emplego y a negociación colectiva 2012, 2013, 2014″ pactau y sinyau por a patronal CEOE y CEPYME con os sindicatos institucionals CCOO y UGT qui han tornau a traicionar as funcions d’o sindicalismo y con ixo, a la clase treballadera. Isto no ye una novedat ya que asinas lo vienen fendo dende os Pactos d’a Moncloa, encetando un modelo de sindicalismo institucional a o servicio d’a patronal en una cadena contina de renuncia a os mas minimos prencipios eticos, socials, reivindicativos… d’esfensa d’os treballadors y treballaderas. Han sobreixiu qualsiquier criterio de racionalidat y todas as “linias royas” que o sindicalismo ha de tener presents, ya que, con iste Alcuerdo, as y os treballadors somos os responsables d’a crisi.
Mientres, o gubierno d’o PP fixa que a banca, a Casa Reyal y a Ilesia continen mantenendo os suyos privilechios y aumentando-los.
A enrestida a os servicios publicos y socials ye o mas brutal dende a dictadura, debant d’ista situación hemos decidiu fer-les frent dende o movimiento obrero combativo y femos un clamamiento a la sociedat civil y a totz os colectivos y personas que treballan t’aconseguir cambiar iste modelo economico y social que nos porta t’a esferra. Por o que clamamos a la participación en ista manifestación como encete d’una luita contina contra iste sistema que nos escacha.
CATA + CGT + CNT + Intersindical d’Aragón + SOA
Feu un comentari fins ara
Deixa un comentari
