Fendo Orella 101.8 FM


A baralla por Pakistán
Desembre 30, 2007, 9:38 pm
Filed under: Internazional

[La Haine]

A muerte de Benazir Bhutto en atentau ha empentau buena parti d’os alazez politicos d’ixe país asiatico, pero dillá d’a esferra que suposa ta la suya familia personal y politica y mesmo ta l’esbenidero de Pakistán, a suya biolenta final parixeba continar o títol de “cronica d’una muerte anunziada”. Os intereses de Washington y as deleras d’a propia Bhutto fazión un eszenario birtual.

Y ixe guión s’ha trobau de tot con a cruda reyalidat d’ixe embolicau y fosco estau y ha blincau esmicazau dimpués de l’atentau contra la famosa politica paquistaní. Igual como si d’una trachedia griega se tratase, a familia Bhutto ha estau marcada por a muerte biolenta d’os suyos miembros, o pai de Benazir y dos d’os suyos chirmáns tamién morión de traza biolenta, y por as xorrontaduras de corrupzión, o suyo propio mariu en as carreras de Pakistán ye conoxiu como “lo siñor 10%”

Pakistán ye un país en o rafe d’o salto, una feble situazión si se fa cuenta d’a capazidat desestabilizadora ta ixa demba d’o continén asiatico que suposaría una radicalizazión d’a soziedat paquistaní, sin tampoco no xublidar a capazidat nucleyar que tiene Islamabad. Os enfrontinamientos y a biolenzia continan por todas as probinzias y o ran d’istos puya diya par d’atro.

Una breu güellada mos permite bier cómo dica fa poco lo mobimiento taliban paquistaní s’eba feito con o control d’os distritos de Swat y Shangla en a Probinzia d’a muga d’o Noreste, fa poco remontaus por l’echerzito dimpues de zereñas barallas y con importan cazegada de bidas en ambos bandos. Antimás ista interbenzión de l’echerzito ha feito tamién un altero numero de muertes zebils lo que de bez traye un mayor refuse a las fuerzas d’Islamabad en a zona y a una mayor radicalizazión d’os suyos abitadors.

A biolenzia sectaria tamién ye periodica, tanto dentre esferens tribus como dentre miembros d’as comunidaz chiítas y sunitas d’o país. Atras zonas, como Baluchistán, asisten a o rebiscolar d’o mobimiento armau que busca a formazión d’un estau propio y refusa l’autoridat d’o gubierno zentral, a qui acusa d’espullar as riquezas d’ixe pueblo y de marguinar a os suyos ziudadans.

Tamién somos asistindo a un importán incremento d’as enrestidas suizidas contra militars, alteros cargos d’o gubierno y mainates politicos, o propio Musharraf ha estau obcheto de más d’una enrestida. Y tot isto ye apañau por a presenzia d’una oposizión trestallada y feble que busca plegar ta bel resorte d’o poder encara que ixo siga fer ligallos contra natura. As esferens posturas en torno a la partizipación en as beniéns eleczions d’o güeito de chinero u o boicot a las mesmas continan trestallando-la encara más.

O presidén Mushrraf, como a figura d’o “cheneral en o suyo laberinto” parixe dica agora trobar-se seguro, a lo menos en o sentiu politico, ya que como emos bisto en cualsiquier inte se puede suzeder atra enrestida contra la suya bida. Y ta estar plegaus en ista situazión ye clau o refirme que plega dende Washington, lo que a carrera d’o país reculle con umor ta dizir-le “Busharraf”, y d’os militars paquistanís, lo que le permite mantener-se firme en o suyo puesto a o fren d’o país.

A disparixión fisica d’a eszena politica de Bhutto ba a dar lugar a un puyal d’especulazions y interpretazions como lo ferá sin garra dandalio l’atentau feito en Rawalpindi. Ye berdat que l’anterior enrestida contra Bhutto en plegar t’o país dimpués d’añadas d’exilio dió muestras d’estar una aizión planeyada con muita niquitosidat, lo que fa pensar que no guaire luén d’ella podebanos trobar a bel miembro d’o totpoderoso serbizio secreto, l’ISI. Y ixos datos pasón curiosamén esaperzibius en a mayoría d’analís oczidentals. En ista enchaquia estará de mal trobar l’autor intelectual de l’atentau, ya que iste puede obedexer a un amplo abanico d’intereses que se benefizian con a disparixión de Bhutto, antimás tampoco no podemos xublidar l’alto numero d’enemigos que’n teneba la politica paquistaní.

Una d’as claus ta replecar iste enreligau puzzle en o que s’ha tornau o Pakistán de güe ye o papel que tienen as fuerzas armadas dende a fundazión d’o país. En istos intes, os militars paquistanís son una importán interpresa finanziera que ha iu fendo retes y fuens finanzieras ta poder desembolicar a suya maquinaria militar, bi incluyiu o costoso programa nucleyar, y controlar a o mesmo tiempo politica y economicamén Pakistán.

Os chenerals paquistanís no son interesaus en a esfensa d’un modelo democratico, porque son consziens que ixo podría significar a fin d’os suyos pribilechios y d’a suya acomodada y poderosa situazión, y en ixo se troban tamién con l’atro protagonista clau, o gobierno d’Estaus Unius.

As actuazions de Washinton en Pakistán, igual como en atras partis d’o mundo, han estau esfrazadas por o discurso de “promober a democrazia en toz os cantóns d’o planeta”, pero d’a misma traza que en o pasau con Pinochet, Marcos [Filipinas] y atros muitos dictadors, u mesmo con o cheneral Zia y o propio Musharaf en Pakistán, lo que en reyalidat busca l’actuazión d’a politica exterior estau-unidense ye a esfensa d’o suyos propios intereses economicos, politicos u militars en tot lo mundo. Por ixo esfender a democrazia con dictadors como os ditos sonaría a risa de no estar por a permenadura que han feito en os pueblos a os que dize “querer aduyar”.

Una güellada enta os papels paquistanís escribius en urdu mos permite trobar o sentir d’a poblazión local, carrañaus de tot con l’actitut d’o suyo gubierno debán d’as pretensions d’os mainates d’a Casa Blanca. Un echemplo lo trobamos en a bisita ta Pakistán d’o Subsecretario d’Estau norteamericano Jhon Negroponte, que ye presentada como “parti d’os mesmos escamallos ta cusirar os suyos propios intereses”. Y más ta debán, entre linias, se puede leyer que “l’achenda reyal d’a bisita no ye rematar con l’estau d’emerchenzia y establir una democrazia berdadera en Pakistán, sino asegurar a proteczión d’os intereses d’Estaus Unius en o benién eszenario politico d’o país”. Os frutos d’ista actuazión los somos beyendo en os zaguers diyas millor que no nunca. A presión de Washington ha trayiu una importán puyada d’o sentimiento antiamericano por tot Pakistán, antimás d’aber puyau l’islamismo nazionalista. Iste punto ye importan antimás si femos cuenta que a reyalidat islamista d’o país ye prou luén d’os discursos alarmistas y interesaus que s’arrullan dende Estaus Unius, más que más dende sectors neoconserbadors.

Os partius relichiosos no pas son una fuerza omochenea, a las dibisions tradizionals arredol de chiítas y sunitas cal adibir as esferens tendenzias dentre as collas con alazet en as zonas rurals u mobimientos más urbanos. Antimás, dica fa poco a tendenzia taliban paquistaní representaba un mobimiento marchinal y poco numeroso. Un dato prou importán ye o refirme que plega d’a mayor alianza islamista d’o país, o Muttahida Majlis-e-Amal (MMA) que en as eleczions d’o 2002 logró bella cosa más d’o doze por zien d’o boto (cal dizir que en bellas zonas estió a fuerza más botada).

O prozeso d’islamizazión de Pakistán ha estau ligau de tot a o refirme estau-unidense ta bels mainates d’o país. Asinas, o rechimen militar d’o cheneral Zia recibió lo refirme de l’administrazión republicana de Reegan, ya que lo prenión como aina clau ta forachitar a las fuerzas sobieticas d’Afganistán. A promozión de madrassas y a radicalizazión ideolochica d’as fuerzas islamistas contó con o refirme d’Islamabad y Washington y con diners d’Arabia Saudita. Y agora baxo lo mandato de Musharraf, tamién con refirme norteamericano, somos asistindo a l’enante ideolochico y material d’as fuerzas de l’islamismo militán, uniu a la puyada d’as enrestidas suizidas y a la implantazión d’a sharia en bellas zonas.

As reziens aizions dende EEUU han feito que as canals de comunicazión dentre os militans taliban paquistanís y l’echerzito s’aigan crebau y que la situazión s’amane periglosamen ta un punto sin tornada.

En Pakistán somos asistindo a una luita sin cuartel. Por un costau son as fuerzas armadas y os suyo refirmes politicos y economicos, igual locals como de difuera, y por atro costau trobamos a os militans islamistas, partius minoritarios, parti d’a soziedat zebil, y mesmo Al Qaeda. Son fendo una baralla de toz contra toz. Y sin xublidar a EEUU, uno de cualos politicos ha señalau que “a seguridat de l’arsenal nucleyar paquistaní ye o prinzipal interes estratechico de Washington”. Y ta ixo no dandalean en refirmar a os militars locals ta que “controlen o zentro d’o país” (Islamabad y Punjab).

A soziedat paquistaní concara dibisions etnicas, politicas, sectarias y culturals, y agora a istas cal adibir un mobimiento islamista radicalizau. De seguras que encara no emos asistiu a o remate d’ista luita por Pakistán, pero podemos dizir que probablemen no i asistamos a una final feliz.

Gabinete Vasco de Análisis Internacional (GAIN)


Anuncis

Feu un comentari so far
Deixa un comentari



Deixa un comentari

Fill in your details below or click an icon to log in:

WordPress.com Logo

Esteu comentant fent servir el compte WordPress.com. Log Out / Canvia )

Twitter picture

Esteu comentant fent servir el compte Twitter. Log Out / Canvia )

Facebook photo

Esteu comentant fent servir el compte Facebook. Log Out / Canvia )

Google+ photo

Esteu comentant fent servir el compte Google+. Log Out / Canvia )

Connecting to %s



%d bloggers like this: