Fendo Orella 101.8 FM


Protestas en Kenya: Nomás que un troz d’a istoria
gener 5, 2008, 4:52 pm
Filed under: Internazional

[La Haine]

As plachas de fina arena, un ozeano d’auguas transparéns y azulas, inmensas reserbas d’animals salbaches, una inmensa sabana, fan de Kenya en o perfecto destín de buena parti d’o turismo de luxo. Manimenos, dezaga d’ista paradisíaca postal i trobamos un altero grau d’amalbezadura, ribalidaz politicas apañadas con esferenzias etnicas, y an que a pobreza, as desigualdaz y l’ature son cualcosa endochena.

Fa unas semanas, as esleczións en o país se presentaban como bella cosa normal, con tot y con ixo, dimpués d’as mesmas a situazión s’ha embolicau y esferrau fendose más presén que no nunca o complexo puzzle que fa la reyalidat d’iste estau africano.

A mayoría d’os candidatos han debatiu y esfendiu as suyas posizións en un abanico de temas: economía, infraestructuras, amalbezadura, majimbo/ugatuzi (federalismo u torna), educazión, sistema sanitario y a constituzión. Manimenos, en trancar-se as urnas, os dos candidatos millor clabaus, o presidén salién, Mwai Kibaki y o líder opositor Raila Odinga han sobatiu os pantasmas etnicos ta esfender cadaún o suyo triunfo en as esleczións. De bez os seguidors d’una y de l’atra s’han chitau t’a carrera en esfensa d’os argumentos d’os suyos respeutibes dirichéns.

Y dende Oczidente no s’ha cazegau tiempo en acusar dreitamén de toz os mals que alleran istos diyas a Kenya a las demandas etnicas. Cayindo una begada más en o discurso interesau y simplista, muitos analistas mos presentan l’actual crisis como un enfrontinamiento dentre os miembros d’a etnia Luo (igual como Odinga) y os Kikuyu (d’a que fa parti Kibaki).
Con tot y con ixo, a biolenzia ba dillá d’un enfrontinamiento dentre dos etnias. Mientres a istoria s’han segundiau conflictos etnicos. Por un costau s’han enfrontinau os “guerrers” Kalenjin con os Kikuyu. Dimpués os Kikuyu, chunto a os Luo y Luhya luitón contra os Masai y os Kalenjin. Aquí podemos trobar una d’as radizes d’os conflictos actuals, l’enfrontinamiento de dos trazas de bida muito ligadas ta la propiedat y o control d’a tierra. Mientres que os Kikuyu, Luo y Luhya yeran agricultors, os segundos yeran más que más pastors.

Y en iste contexto l’aparixión d’o colonialismo suposó una azentuazión d’as esferenzias etnicas. Continando lo manual colonial, os britanicos fazión trestallos territorials arbitrarios, espernindo los espazios etnico-cheograficos tradizionals, tot ixo muito en la línia d’o famoso “trestalla y gubierna”.
Un exemplo d’ista politica colonial lo trobamos en a Bal d’o Rift, do dica l’arribada d’as fuerzas colonials o pastoreyo yera la traza de bida d’a redolada (masai y kalenjin). Dimpués os colonialistas imposón l’esplazamiento d’os abitadors locals, sustituyíndolos por miembros d’atras etnias, más aconortaus ta la agricultura y más feitos ta desembolicar a economía agraria y o sistema de cautibos imposaus dende a metropolis.

Dimpués d’a etapa colonial mos i trobamos con a clamada fase neo-colonial, an que as nuebas elites politicas se dedicaran a fer serbir os resortes d’o colonialismo ta prebar d’afincar-se en o nuebo poder. En istas añadas i asistiremos tamién ta cambios en os ligallos inter-etnicos. Asinas d’o pacto dentre Kikuyus y Luos pasaremos t’o ligallo d’os primers con atras etnias minoritarias, más que más os Kalenjin. Y tamién será en ista nueba fase do trobamos atra clau ta replegar millor o conflicto. L’emplego politico por parti d’as elites d’o trestallo etnico.

O faboritismo politico ha estau una tonica cheneral con os tres presidéns, que consziéns d’a imposibilidat de gubernar con o refirme d’una etnia nomás, plegaban t’alcuerdos con atras, encara que manteniban os pribilechios t’os d’a suya. Isto ha alcurriu con Kenyatta (kikuyu), con o suyo suzesor, Moi (kalenjin) y con l’actual presidén Kibaki (kikuyu), y si a la fin, Odinga (luo) ye o benzedor, alcurrirá lo mesmo.

A situazión de Kenya, considerau como “un oasis d’estabilidat en una demba muito bolátil”, puede plegar ta la suya fin. Cheopoliticamén, dende Washington siempre han refirmau o rechimen d’o país, consziens d’o papel tape que Kenya chuga en a región, antimás d’o refirme a la “guerra contra la terror” que Nairobi da ta Estaus Unius. Con tot y con ixo, o gran numero de refuchiaus d’atros estaus, os mobimientos migratorios internos, a presenzia de collas armadas bezinas y os propios trestallos dentre estaus empentaus por os colonialistas, pueden agrabar encara más a situazión.

A situazión d’os masai en Tanzania u d’os Luo en Uganda puede rematar por afectar a la situazión interna d’ixos dos países y rematar presentando un efecto dominó en toda la zona.

A importanzia cheoestratechica de Kenya ta EEUU ha quedau platera ista mesma semana, cuan as tres telebisións más importáns de Norteamerica dedicón gran parti d’a suya programazión informatiba t’os disturbios en Kenya, compitindo con a muerte de Bhutto en Pakistán. Bella cosa inedita en ixe país si femos cuenta que por lo cheneral as notizias internazionals tasamén fan tres minutos d’os informatibos.

Bels analistas siñalan enta o periglo que corre Kenya de rematar dezaga d’os trangos de Costa de Marfil. Y traniminetres, bels lecturas interesadas sobre os prozesos electorals en Africa mos presentan istos como situazións plenas de manipulazions, como si ixo no’n se fese en as democrazias oczidentals, an que os gubiernos no dandalian mica en enantar as esleczions oportunamén u reformar os distritos electorals en esquimen propio, y mesmo fer serbir a economía d’o país como imbersions propias.

Mientres as elites de Kenya no dandalian en mobilizar a os suyos seguidors baxo a bandiera etnica ta recullir esquimens politicos, buena parti d’a poblazión s’amuestra cansa y mustia debán d’o que reculle como “más d’o mesmo” y an que os berdaders perdedors son as chéns más pobres d’o país.
Si aluframos a situazión d’o país africano podemos afirmar que “ni toz os kikuyu son os dominans ni toz os Luo los chusmesos. Os esferens procezos colonial y neocolonial han azentuau as esferenzias de clase dentre as comunidaz de cada etnia”. Por ixo ye más que probable que as elites d’esferéns etnias aigan más en común dentre ellas que no lo que’n tienen con a resta de miembros d’as suyas étnias, y isto ye cualcosa que se preba d’amagar en Kenya.

A fin d’as politicas naxidas d’o colonialismo, tengan o rostro de neocolonialismo u neoliberalismo, ye clau ta rematar con as desigualdaz endemicas de Kenya y de buena parti d’Africa, como lo ye tamién l’enzetar de tot a chusta redistribuzión d’as tierras d’o continén. Mientres no se concare isto, os “pangas” (machetes) se debantarán ensangrentaus, y amasegaus antimás con atras armas más mortiferas y modernas.

Gabinete Vasco de Análisis Internacional (GAIN)

Anuncis

Feu un comentari so far
Deixa un comentari



Deixa un comentari

Fill in your details below or click an icon to log in:

WordPress.com Logo

Esteu comentant fent servir el compte WordPress.com. Log Out / Canvia )

Twitter picture

Esteu comentant fent servir el compte Twitter. Log Out / Canvia )

Facebook photo

Esteu comentant fent servir el compte Facebook. Log Out / Canvia )

Google+ photo

Esteu comentant fent servir el compte Google+. Log Out / Canvia )

Connecting to %s



%d bloggers like this: