Fendo Orella 101.8 FM


Berri Txarrak
Abril 8, 2008, 4:01 pm
Filed under: Mosica | Etiquetes: , , , ,

Berri Txarrak tornó ta Zaragoza o pasau biernes 4 d’abril, en rematar a suya chira mundial. Ista begada ta presentar-ie o suyo nuebo DVD “Zertarako Amestu”

Aintro d’a primera chornada d’o nobeno festibal “Moflete Humano”, a colla de Lekumberri chunto con as zaragozanas Afraid of Myself y Zobux penchón o cartel de “dentradas acotoladas” d’a Sala Bass Space.

Una cambra a rebutir de chen aguardó -con o buen treballo d’as dos collas zaragozanas- que bi amanixesen sobre o tarabidau os 3 mosicos bascos.

Alto u baxo dos oras de conzierto, an que remerón cantas de toz os suyos discos y más que más, prou que sí, d’o suyo zaguer treballo “Jaio.Musika.Hil”. En o bis no xublidón a bersión d’a canta de KOP “sols el poble salva al poble” que no guaires conoixeban y una chiqueta colla aguardaba. Ta rematar de tot, como ye de dar, a sobrebuena “Bisai Berriak”.

Abríanos de parar cuenta como una colla que no fa cantas que en euskera, ye capable de plenar una sala en Zaragoza de chen que conoix y canta todas as suyas cantas en ixa luenga.

Una colla que fa una chira mundial bella cosa ha de tener, y más encara cuán en ista ziudat de luengas muertas -torno a dizir- son capables de plenar a caramuello una cambra cantando en una luenga que no ye ni castellano ni anglés.

Debán de toda ixa chen Gorka de Berri Txarrak tenió unas palabras de refirme ta l’aragonés dizindo que en ixe inte le cuacaría saber dizir bella cosa en aragonés, que no dixaranos morir a luenga.

Talmén a bella persona d’a cambra le trucasen o ficazio ixas parolas antis de continar chilando a benién canta d’a colla basca.

Ista ye a istoria d’a colla que leyemos en o nuestro programa d’ixe mesmo diya…

Berri Txarrak

A colla de rock Berri Txarrak (Malas notizias) naxió en 1994 como colla de Gorka Urbizu (boz y guitarra) y Aitor Goikoetxea (batería), encara que estió en 1997 cuan prenzipión a treballar de raso en ista colla, completada allora por Mikel López (baxo) y Aitor Oreja (guitarrista, qui dixó a colla a la fin d’o 2004). A colla ye de Lekunberri (Nabarra) y ha zinco discos dica la calendata, toz cantaus en euskera y baxo lo sello discografico GOR.

Dimpués d’autoeditar-se una maqueta con seis temas, BERRI TXARRAK obtenió bels premios en bels concursos de demos y collas nobels, lo que remató con a ufierta de grabar o suyo primer disco, de titol omonimo y que beyó a luz en l’agüerro de 1997. Grabau en Esparza de Galar (Nabarra) Berri Txarrak se ficó con fuerza en o rock euskaldun, grazias a singles como ‘Lotsarik gabe’, ‘500 urte ta gero’ u ‘Ardifiziala’. Seguntes os suyos autors, iste primer disco suposó una mena de puén estilistico dentre a demo y o suyo segundo disco, con o que metión os alazez t’os suyos beniéns treballos.

Iste disco plegó en 1999 con o titol d’Ikasten (aprendendo). ‘Ikasten’ sorprendió grazias a una eboluzión mica común en un segundo disco, muito treballau y con una espezial traza de bier as cantas. Temas como ‘Ikusi arte’, ‘Ez’ u mesmo ‘Ikasten’ ubrión a posibilidat d’ufrir una sinfinidat de conziertos y crexer como colla.

Dos añadas dimpués (2001) plegó ‘Eskuak/Ukabilak’ (Mans/Puños), un disco que ba confirmar as buenas trazas de Berri Txarrak y los refirmó igual como a tuca d’a banguardia d’o rock basco. Grabau en Garate Studios (Andoain) bi contiene clasicos d’o repertorio de BTX igual como ‘Oihu’, a metalica ‘Stereo’ u a funda ‘Biziraun’, que obtenió lo galardón ‘Gaztea Saria’ t’a millor canta de l’añada.

En 2003 plegó a cuartena entrega, Libre, grabau en o mesmo puesto que o zaguer treballo. Iste disco suposó atro gran blinco en a carrera de Berri Txarrak y trayó con él o beneplazito d’a critica espezializada y as primeras chiras por Europa. Libre ye o disco más hardcore de Berri Txarrak, una colla en contina eboluzión y que cudia muito o suyo mensache critico y pleno de sentimientos. Bels meyos musicals siñalón enta Libre como ‘millor disco estatal de rock en 2003’. Destacan temas como ‘Denak ez du balio’ (do colabora Tim McIlrath d’a colla RISE AGAINST), ‘Hil nintzen eguna’ u ‘Izena, izana, ezina’.

Dimpués d’una larga chira, o guitarrista Aitor Oreja albandona la colla. Ya en 2005, Gorka, Aitor y Mikel deziden continar entabán como trío y se zentran en fer o suyo zinqueno álbum. ‘Jaio.Musika.Hil’ (Naxer.Mosica.Morir) se graba en un caserío d’Eraso (Nabarra) y ye mezclau en USA a mans d’Ed Rose, reputau incheniero d’o soniu indie americano.

Anuncis

Feu un comentari so far
Deixa un comentari



Deixa un comentari

Fill in your details below or click an icon to log in:

WordPress.com Logo

Esteu comentant fent servir el compte WordPress.com. Log Out / Canvia )

Twitter picture

Esteu comentant fent servir el compte Twitter. Log Out / Canvia )

Facebook photo

Esteu comentant fent servir el compte Facebook. Log Out / Canvia )

Google+ photo

Esteu comentant fent servir el compte Google+. Log Out / Canvia )

Connecting to %s



%d bloggers like this: