Fendo Orella 101.8 FM


A güellada de Carlos Javier Palomino
Setembre 22, 2009, 9:25 am
Filed under: Internazional, Sozial | Etiquetes: , , ,

Os griegos imbentón a democrazia dixando bien platero a qui dixaban difuera: mullers, esclabos, artesanos, extranchers, mendigos… Yera la democrazia d’os ricos que no s’embolicaban con o que no yera igual como ellos.

O mundo globalizau tamién reclama t’o suyo gubierno a democrazia, pero ye más zinico, os suyos discursos son urbi et orbi como si bi acullisen a totz. ¿No se queda dengún difuera? No, responden os lechisladors d’o mundo. Aquí culllimos totz. ¿Bi ha belún que se lo creiga?

Qué lastima que ya en o cabo d’o sieglo pasau belún se’n baixara d’a falordia y por as carreras escomenzipiase a joriar-se o chilo: “parix democrazia y no’n ye”. A reyalidat ye zerrina y puede más que a falordia sobre as libertatz legadas, en o nuestro caso, por a transizión. Muito más que a güellada t’o frén, con somardona rialleta, d’o democrata de toda la bida.

Muitos continan en a falordia. Pero beluns se concarón bien luego a o xerbigadero ubierto dentre a letra y a reyalidat. Güe son muitos os chobens que boconían en a carrera lo que a una chenerazión anterior le dixó esluzernada: “Parix democrazia y no’n ye”.

Lo continan chilando terne que terne, con fundo conoiximiento de causa, han bisto a qui se le fa puesto en a ziudat y a qui no. Han bisto de frén o rostro de l’amo que mete y saca o teito y o pan. Han bisto morir asesinaus mendigos, inmigrans, omosexuals, royos, treballadors… Han bisto que qui no ye español rico, blanco, catolico y eterosexual ye en o punto de mira. Y lo pior, han bisto que qui no baixa la güellada debán d’ixe güello asesino, tamién ye en periglo.

A muitos les ha costau a bida. Dende l’añada 1991, son 75 os muertos contaus por l’informe Raxen a mans de collas razistas y/u neonazis. Zifra que be de prener-se so que como una muestra, pues: “En l’Estau español, a diferenzia d’Alemania, o Reino Uniu y atros países d’a Unión Europeya, no se disposa de garra estadistica ofizial de delitos d’intoleranzia y crímens d’odio que permita conoixer y balguar o ran d’o problema” A nuestra democrazia tamién en isto ye diferén.

L’informe se tranca con o nombre de Carlos Javier Palomino: “11 de nobiembre de 2007. Madrit. Menor de 16 años, asesinau d’una naballada en o corazón con arma blanca; chunto a la bictima a lo menos atros siet chobens tamién rematón ferius, uno d’ellos bien grau dimpués d’una enrestida d’un ultra a una colla d’antifaixistas en a gara de metro de Legazpi, en Madrit. A polizía detenió a o presunto autor d’a naballada, identificau como Josue E.de la H., de 24 años, melitar, informando que s’endrezaba ta una manifestazión d’as chobentutz de Democracia Nacional”.

Carlos Palomino no’n ye estau o zaguero. Fa cuatro diyas, en a maitinada d’o biernes 11 de septiembre, en o lugar de La Cabrera, (Madrit), Gigi Musat, piquero de profesión y rumano de naiximiento, yera posau en un banco chunto a un amigo, tamién obrero y minusbaliu a consecuenzia d’una cayida d’un tarabidau. Estió enrestiu por una colla de zinco salbaches que lo asesinón a patadas. Lo zaguero que sintió estió: “Rumano de mierda, te imos a cremar”. A notizia amanix dentre pachinas de suzesos. Xorronta. Zinco baliens patriotas calziando a un treballador de 32 años. Una muerte asinas no cai d’un árbol que talla una tronada. Una muerte asinas no ye un suzeso. Xorronta que no se i beigan as esferenzias. Xorronta preguntar-se si a bida d’iste choben abrá estau reyalmén a zaguera en estar tallada. Xorronta.

A notizia no la han dada os meyos dica güe. Ellos sabrán por qué. Bi ha en istos diyas muita dolor y muita indinnazión contra la barbarie xenofoba de corte faixista. Os chobens que la denunzian lo han expresau, pero ya no pueden fer-ne más. Tot féndose o chuizio contra un soldau emberenau d’ideyolochía faixista, a bestia no ha dixau de matar. Xorronta. Ye imposible que a grandaria d’iste odio disparixca sin treballar a fundo as suyas radizes.

Dizen que o chuizio a Josué Estébanez estará largo, y no’n ha d’importar ixo, bi ha muito que bier-ie. Carlos Javier Palomino, no se mira so que a o suyo asesino: un soldau nazi que se creye en o suyo dreito a liberar o suyo instinto criminal. Se mira a os partius politicos d’ideolochía nazi y a os poders politicos que os legalizan. Se mira a las asoziazions faixistas y a las instituzions administratibas que permiten manifestazions contra os inmigrans en os bicos obrers do biben. Se mira a os chuezes que han condenau a tantos atros como Josué a penas insinnificans. Se mira a las fuerzas de l’orden que detienen, abatanan y rebaixan a qui no se duerme con a falordia d’o democrata de toda la bida. Carlos Palomino se mira a os suyos amigos y siente a os polizías que les continan chilando dende os autos: “¡Guarros, arriba!”.

Se mira a os periodistas que creyan en a opinión publica o malbau sentimiento de que a suya muerte, como la d’atros ziens más, son suzesos que acayezen en peleyas de bico, d’a mesma traza que o franquismo explicaba como estrapaluzios d’a carrera un intento de manifestazión ta clamar por as libertatz.

A güellada de Carlos plega en qui amuestra a las suyas borchas a tirar entabán pisando a la resta. Se mira a qui se mira ent’atro costau cuan a bestia fa una chanza como ista: “Palomino, tornanos o cutiello”. Beluns se’n riden.

Carlos no baixará la güellada dica que no se fixe lo intolerable. As suyas 16 añadas puyarán dende o cobaixo d’o metro, sin que ya dengún no pueda aturar-la. Dizen que Gigi Musat contaba estrelas en o zielo d’a plaza. ¿No se tos fa difizil, democratas de toda la bida, contener as glarimas?

Mª Ángeles Maeso
http://www.lahaine.org/index.php?p=40210

Anuncis

Feu un comentari so far
Deixa un comentari



Deixa un comentari

Fill in your details below or click an icon to log in:

WordPress.com Logo

Esteu comentant fent servir el compte WordPress.com. Log Out / Canvia )

Twitter picture

Esteu comentant fent servir el compte Twitter. Log Out / Canvia )

Facebook photo

Esteu comentant fent servir el compte Facebook. Log Out / Canvia )

Google+ photo

Esteu comentant fent servir el compte Google+. Log Out / Canvia )

Connecting to %s



%d bloggers like this: