Fendo Orella 101.8 FM


Testimonio dende l’infierno
gener 10, 2010, 6:10 pm
Filed under: Colonialismo, Internazionalismo, muller, Solidaridat, Sozial | Etiquetes: ,

Sembarathi nos rezenta a suya istoria que corrobora un bideo quitau de Sri Lanka de traza clandestina. Amaga o suyo rostro esfigurau per a pudor y per seguridat, pero tamién per puro despeito. “Por qué tapa o mundo os suyos güellos debant d´o infierno que ye esnabesando lo nuestro pueblo?” se pregunta ista muller antis de prenzipiar a describir-lo.

Me digo Sembarathi y soi naixida de Killinochi (Sri Lanka) fa 39 anyadas. Tiengo una filla de seis anyos y un fillo de nueu. Han perdiu lo pelo per tot lo que les ye tocando beyer mientres os zaguers meses. A sobent se rebellan chilando de nueis.

O 21 d’abiento de 2008, o nuestro lugarón estió bombardiau dende l´aire pero, afortunadament, no yéranos en casa nuestra. En chinero i tornemos ta replegar as nuestras cosas y estiemos bombardiaus de nuebas, ista begada dende un dron (abión no trepulau). A casa d’os nuestros bezins quedó carbonizada y os suyos zinco abitadors ban morir-ie. Poco dimpués nos ne benioron a escar ta trasladar-nos a un espital pero as bombas cayeban dende totz os puestos y no tenébanos do acubillar-nos. Nos ne metiemos en a ilesia pensado que i seríanos seguros pero tamién estió bombardiada. Una bomba de fosforo me cremó a ropa y parti d’a cara.

As escuelas eban suspendiu as clases ta estar conbertidas en espitals probisionals pero lo Gubierno feba ferrete con que se trataba de cubilars ta la guerrilla d’os Tigres Tamils, y que per ixo las bombardiaba. Manimenos, nusatros conseguiemos plegar en un espital de berdat. No bi eba camas ta totz asinas que abiemos de dormir en o sulero. I estiemos tres diyas, o cuatreno lo bombardioron. I ban morir más de trenta personas en ixa enrestida, ista begada dende abions Kfir (cazabombarders feitos en Israel). Tot lo mundo sabeba que ixe yera un espital pero lo enrestiban igualment.

Dimpués de bels diyas de marcha, o 14 de chinero escomenzipió a pleber de traza rabiuda. No podébanos fer serbir os bunkers en o camín ta cubillar-nos-ie, perque yeran engaronaus. Os bombardeyos yeran inzesants y a chent continaba morindo. Ébanos de mober-nos de contino asinas que no aturábanos ta apedecar os calabres.

A Cruz Roya y Nazions Unidas consiguioron instalar-ie uns espitals de campanya a la fin de chinero y dioron a Colombo, a capital de l´estau, a suya adreza exauta ta ebitar os ataques. Pero tamién estioron bombardiaus dende os Kfir. Esmediau febrero, l´aduya internazional albandonó a isla.

Plegamos en l’espital de Puthukkudiyiruppo. Malas que aturaban os bombardeyos, a chen acudiba en tropel a o zentro, pero allora les tornaban a bombardiar. Nos cubillábanos d’as bombas an que podébanos: baixo as enruenas, os autos… No tenébanos ni birolla, ni bunkers, ni merezinas. Yéranos escamallaus.

Dimpués nos dizión que en Tincomalee nos ebacuaría un barco d´a Cruz Roya que gosaba de trayer-ie  merezinas y se’n lebaba a os ferius graus. Pero cada begada que s’amanaba t’a placha os abions tornaban a bombardiar a costa. I asperemos mientres tres diyas. Abiemos d’amortar a os cans perque se yeran minchando los calabres. No querébanos que os ninos beyesen ixo. Os ataques yeran continos y nos embutibanos en os bunkers. Os mios fillos beyoron morir a dos ninos con os que gosaban de chugar, beyoron os suyos repuis per o sulero… Su mai estió graument ferida y ba morir ixa nueit. A la fin, o barco se´n fue sin poder ebacuar-nos y a chent se tornó barrenada. Muitos se ban suizidar.

O 17 de mayo estiemos rodiaus per l’Exerzito y nos enzarrón como a o ganau en una demba amugada per arambradas. I yéranos dezenas de milentas. A sincusa yera que nos trobábanos en una zona minada per o LTTE (os Tigres de Liberazión Tamil) y que i yéranos difuera de periglo. O primer dya no nos dioron augua y nos ne tenión os tres benients sin minchar. De cabo cuan chitaban cualcosa per denzima d´a cleta pero en yera pior. Se formaban muntoneras de chent desesperada y beluns i ban morir esclafaus. O diya 20 nos ne trasladoron dica o campo de Ananthakumarasamy.

Trestallón a os zebils d’os Tigres. A ístos les dizión que yera millor reconoixer a suya pertenencia a o LTTE ya que, de no fer-ne, as consecuencias serían muito piors d’estar escubiertos. Lebábanos diyas sin minchar y nos comportábanos como robots.

Dormíbanos diez en cada tienda. O campo yera trestallau per arambradas y en os costaus eban deseparau a os ombres d’as mullers. Os guardias disparaban a os que prebaban de comunicar-se con os suyos familiars en l´atro costau d´a cleta.

No bi eba escusaus, asinas que ebános de fer os nuestros menesters y banyar-nos en una mena d’ibón. Totz os diyas desapareixeban mullers y ninos. A begadas se trobaban os suyos calabres, pero no pas siempre. Deziban que os biolaban antis de matr-los.

Un diya beyié como dos soldaus se lebaban a un nino dende una moto. Esnabesoron o checkopint d’a dentrada sin que dengún no los aturase. A chent prenzipió a no deixar a os suyos fillos albandonar a tienda. Les acompanyábanos mesmo cuan quereban pixar difuera d´a tienda.

Nos daba de minchar un diya de cada tres. A mayoría de nusatros yéranos mui febles, y os ferius y os mayors no podión superar-lo. A chen moriba pero no se’n ebacuaban os calabres.

Dimpués de mes y meyo en o campo, lo 8 de chulio conseguiemos eslampar-ie sobornando a os guardias. Os mios fillos y yo somo güe en Londres asperando que nos conzedan l’asilo politico. No puedo dezir como salié d´a isla perque metería en periglo a aquels que son prebando de fuyir-ne en istos intes.

Testimonio reculliu per o periodista Karlos Zurutuza ta Gara

Anuncis

Feu un comentari so far
Deixa un comentari



Deixa un comentari

Fill in your details below or click an icon to log in:

WordPress.com Logo

Esteu comentant fent servir el compte WordPress.com. Log Out / Canvia )

Twitter picture

Esteu comentant fent servir el compte Twitter. Log Out / Canvia )

Facebook photo

Esteu comentant fent servir el compte Facebook. Log Out / Canvia )

Google+ photo

Esteu comentant fent servir el compte Google+. Log Out / Canvia )

Connecting to %s



%d bloggers like this: