Fendo Orella 101.8 FM


Taurinos, aproveitatz-ne que isto se remata…
Agost 9, 2010, 2:51 pm
Filed under: Aragon, Social | Etiquetes: , , ,

Aquí somos, un 10 d’agosto más ta protestar contra la sangrienta salvachada que o Concello de Uesca proposa en as suyas fiestas mayors, pero ista anyada, 2010, a sinrazón ha prencipiau o suyo camín enta l’abolición con firme endrecera. A PODA igual como aquellas personas que s’han quiesto amanar huei t’aquí, protesta contra la barbarie especista d’as corridas de toros: pero tamién ta reivindicar que atras fiestas son posibles, sin ferias taurinas, sin becerradas, sin corridas de burros. A la fin, unas fiestas sensibles con os dreitos d’os animals, ya que 60.000 sers vivos son maltrataus anyalment por totz os territorios de l’Estau espanyol mientres festellos populars.

Nos trobamos en un anyada historica t’os animals, fa pocos diyas o parlamento catalán aprebaba una Iniciativa Lechislativa Popular, que acotola as corridas de toros en ixe país (en 1991 ya se reyalizó en Canarias). Dillá de l’aritmetica parlamentaria, a PODA aplaude ixos 180.000 ciudadanos que desichión una ILP historica, gracias a o treballo d’a Plataforma Prou huei podemos decir que en a peninsula iberica se torturará y asesinará menos. Ixa ye a reyalidat, una gran victoria que libra a o pueblo catalán de soportar espectaclos que fan mal a la sensibilidat. A PODA igual como atros colectivos esfensors d’os animals treballa ta que Uesca y Aragón sigan espacios sin corridas de toros. Ye una reyalidat que aquí a fiesta tien un vergüenyoso component etilico-gastronomico, menau por as penyas colaboracionistas y bien ruixiau con diners publicos. Sin ixa aduya de totz os contribuyents, plazas como a uescana estarían infesables economicament. L’Alto Aragón no’n tien d’afición taurina, nomás que Uesca y Balbastro tienen plaza de toros. Ye qüestión de tiempo, que a barbarie s’acotole.

A contina tiranía que o ser humano fa sobre os animals se manifiesta en a-saber-lo aspectos que qualsiquiera puet contemplar diya par d’atro. Pero talment o que mayor refuse puet causar en una persona sensible ye l’espectaclo taurino. Amás de fer-se un acto de abuso enta un ser inesfenso, iste se fa con a complicidat d’as altas instancias, d’os meyos de comunicación y d’o publico que puixa, empenta y refirma. Ista situación se fa penible de tot en ciudatz como Uesca, do a mayoría d’os que van t’a plaza d’as torturas, no i van que ta zorriar, arrullar-se birolla y divertir-se, sin meter o minimo ficacio a os asesinatos a pocos metros d’ells.

Tanimientres, no reblaremos en decir verdatz, faiga duelo a qui le’n faiga, sigan penyistas, politicos, rufiertaires, aficionaus insensibles u intresaus.

O toro ye un ser vivo más, y siempre estará un animal inesfenso debant de tot l’empadullo que se monta en as corridas: a la fin nunca no podrá vencer en ixa mega baralla debant de totz os meyos y trampas que disponen os sers humanos ta que triunfe o torero que siga. A sangrienta masacre que suposa una corrida de toros tien una preparación endrezada a enfebleixer a l’animal a traviés de fierros, banderillas, y mesmo drogando y tallando os suyos cuernos antes de no salir t’a plaza. Tot ye una sangrienta y cruel mentira. Hemos de luitar contra os topicos d’imposar a tradición a qualsiquier pre y contra la demagochia populista: que si o toro naixe ta morir en a plaza, que si ye cultura y por ixo no se puet eliminar, que si ye l’alazet d’a espanyolidat, que si bi ha muitas familias que viven d’isto… Tot sincusas. Una demagochia que se va a rearmar, astí tenemos a recient proposa d’o Partiu Popular ta declarar as corridas de toros como Bien d’Intrés Cultural, u a exhibición bananera de sinyals espanyols con o toro d’Osborne.

A Plataforma Uescana por os Dreitos d’os Animals contina desichindo l’abolición a escape d’os esferents espectaclos taurinos (corridas de toros, novilladas, becerradas, toros embolaus, de fuego, ensogaus, encierros, vaquillas…) ya que suposan un maltrato psicolochico y fisico ta l’animal. Nos solidarizamos con ista luita común, que contina dando trangos importants, como a declaración de ciudatz y lugars “anti-taurinos”, a viedadura en Catalunya, u as multitudinarias manifestacions que se vienen fendo en Pamplona, Zaragoza, Madrit, Bilbao u Barcelona. Queda muito por fer pero a perseverancia ye un triunfo. Cal fer un clamamiento etico a las personas ta que se conciencien de que se tracta d’una tradición eslanguida, vergüenyosa, a sobent mantenida con refirmes publicos (mesmo en intes de crisis como l’actual), u amagada baixo a borina penyista d’unas fiestas patronals.

Taurinos, aproveitatz-ne que isto se remata…

No más violencia, a tortura no ye arte ni cultura. Prou de tradicions violentas y sangrientas.

Plataforma Uescana por os Dreitos d’os Animals (PODA)

Concentración martes 10 d’agosto, a las 17:00 en a plaza santo Domingo (Uesca)

Anuncis

Feu un comentari so far
Deixa un comentari



Deixa un comentari

Fill in your details below or click an icon to log in:

WordPress.com Logo

Esteu comentant fent servir el compte WordPress.com. Log Out / Canvia )

Twitter picture

Esteu comentant fent servir el compte Twitter. Log Out / Canvia )

Facebook photo

Esteu comentant fent servir el compte Facebook. Log Out / Canvia )

Google+ photo

Esteu comentant fent servir el compte Google+. Log Out / Canvia )

Connecting to %s



%d bloggers like this: