Fendo Orella 101.8 FM


Revueltas estudiantils en Europa
Desembre 3, 2010, 1:38 pm
Filed under: Internacional, Social | Etiquetes: , ,

Somos en Roma. Periglosos activistas armaus con escudos de zuro con os titols de clasicos d’a literatura universal van camín d’o Senau ta “cercar-lo”, seguntes os meyos de comunicación más importants. Que a manifestación de 3.000 estudiants d’as universidatz romanas se menase t’o Senau, contra o que aventón uegos, ha estau calificau por o President d’o Senau como una “vil agresión” u como un “acto de violencia”. Seguntes se veye, tres minutos -tres- de cerco espectacular fan muita cerina en as alteras esferas.

Os estudiants han comprendiu que ta que belún les ascuite, u dan espectaclo, u dan espectaclo. De no fer-lo, a trachica situación que vive a universidat italiana no ye noticia. Gennaro Carotenuto, que amostra en a universidad publica, explica que a ufierta formativa d’as universidatz italianas s’ha sosteniu en todas istas anyadas en gran part (más d’un tercio) gracias a o treballo d’una masa d’investigadors integraus (24.000) u no integraus (se fabla d’a lo menos 40.000 personas d’entre 30 y 40 anyos).                                                                                                                                             Sobre as suyas espaldas s’ha refirmau l’actividat didactica. De baldes u con pagas simbolicas. 10.000 investigadors se negón ista anyada a continar cumplindo tareas didacticas ta rematar con a hipocresía que mantiene un sistema que pretende rematar con as asperanzas no ya d’una, soque de dos cheneracions.

En Roma, Pisa, Palermo, Turín, Perugia os estudiants que luitan contra o decreto lei d’a menistra d’Educación, Mariastella Gelmini, demostrón haber aprendiu a lición d’os treballadors y os immigrants: se’n puyón t’os tellaus y ocupón edificios ta que se les viyese en as noticias. Se pretenden retallar os fondos t’a universidat publica ta aumentar os destinaus t’a universidat privada.

Ahiere o Parlament no aprebó o decreto lei: una preba más d’a crebadura d’a escachant mayoría parlamentaria d’a que desfrutaba Berlusconi. Uno d’os eslogans d’os manifestants d’ahiere retrataba bien a realidat: “Nusatros seremos ganyosos: o gubierno en ye más”. A propaganda de Palacio le diz a una cheneración con un fosco esvenidero que hemos viviu por dencima d’as nuestras posibilidatz precisament quan les ne son sacando.

O 17 de noviembre protestó o mundo d’os institutos y as escuelas. Salión 200.000 personas t’a carrera. Ahiere en i yeran menos pero dion espectclo. Irrumpión en o territorio d’o poder intocable: o Senau, Palazzo Grazioli (residencia de Berlusconi) u Piazza Montecitorio (plaza d’o Parlament). Y o lider d’o Partiu Democratico habió de puyar a fotiar-se en un tellau ocupau por investigadors d’a Universidat de Roma “La Sapienza”.

Tanimientres, en Londra mils d’estudiants universitarios y de bachillerato tornaban t’as carreras ta protestar contra os retalles. As condutas universitarias son puyadas a 9.000 libras esterlinas (10.658€). Os asperaba a policía, que no debeba permitir atra enrestida espectacular a atro centro de poder, como ocurrió quan a suya protesta tocó físicament a siede d’o Partiu Conservador. A policía cercó una manifestación pacifica. Collas especials d’Intelichencia d’as fuerzas de seguridat detenión a “extremistas domesticos”.

Dende o gubierno criminalizan a protesta, aconsellan a os meyos que no la alimenten con “l’oxicheno d’a publicidat”. Manimenos, os activistas reaccionan en conseqüencia: debantó escandalo que en o puesto Fitwatch se i desen consellos sobre cómo actuar mientres a protesta: mete-te una mascaruta, no faigas fotos que dimpués puedan estar feitas servir contra tu; no portes documentación ni achendas que puedan identificar-te… En Sheffield, Bristol, Liverpool u Manchester zagals de 13 u 14 anyos salión t’a carrera ta apropiar-se d’o present y rancar l’esvenidero d’as mans de l’Estau. Un Estau depredador que en Letonia como en Irlanda, Francia, Islandia, Rumanía u Portugal fa entender a os suyos ciudadanos que se remató l’Estau social.

Poco pueden fer os ciudadanos contra una decisión que les caye d’alto y hipoteca o suyo esvenidero si demuestran a suya disconformidat por separau. Pero os estudiantes europeus son demostrando tener clarismo que l’esvenidero ye aquí, que ye d’ells y se decide agora: por ixo huei, en Roma como en Londra, liberan a la Politica secuestrada, la quitan difuera d’os Palacios y continan luitando.

Anuncis

Feu un comentari so far
Deixa un comentari



Deixa un comentari

Fill in your details below or click an icon to log in:

WordPress.com Logo

Esteu comentant fent servir el compte WordPress.com. Log Out / Canvia )

Twitter picture

Esteu comentant fent servir el compte Twitter. Log Out / Canvia )

Facebook photo

Esteu comentant fent servir el compte Facebook. Log Out / Canvia )

Google+ photo

Esteu comentant fent servir el compte Google+. Log Out / Canvia )

Connecting to %s



%d bloggers like this: