Fendo Orella 101.8 FM


Una luenga que no se puede tallar
Novembre 3, 2011, 11:39 am
Filed under: Aragon, Cultura, Luenga, Social | Etiquetes: , , ,

http://arainfo.org/?p=316

Fernando Estabén Vallespín

O mundo de l’aragonés pareixe que nunca no puede estar en calma, siempre en un contino tierratremo. Si no ye per uns, ye per atros. Iste verano pasau conoixemos a o nuevo Gubierno d’Aragón, presidiu por Luisa F. Rudi d’o PP, que en o que importa a las luengas d’Aragón metió a Dolores Serrat como Consellera de Cultura y a un tal Humberto Vadillo como Director Cheneral de Cultura.

Iste sinyor, con un curriculum nulo ta un puesto como ixe, fació unas declaracions sobre a cultura y sobre l’aragonés (antis d’estar nombrau en o suyo actual cargo) que han produciu un chilo quasi unanime en o mundo d’a cultura aragonesa en contra d’iste nombramiento. Nos centraremos en o que respecta a l’aragonés.

Iste sinyor, en o suyo twitter (cudiadosament borrau mas tardi ta no deixar bayo, encara que prou chent ha puesto guardar as prebas) deciba, sin mica vergüenya:

“HumbertoZgz Si eres capaz de presentarme un sólo hablante nativo de aragonés (no modalidades) os invito a comer en El Cachirulo.
HumbertoZgz Dicho de otra forma el aragonés existe como el Klingorn. Es un invento (y estoy seguro de que el klingorn lo habla más gente)
HumbertoZgz Me parece bien q la gente se entretenga con el aragonés o el Alto ëlfico, me basta con q no quieran pagarlo con mi dinero
HumbertoZgz En Aragón hay más hablantes de Klingorn que de “lengua aragonesa” q para empezar no existe.
HumbertoZgz Van a enseñar “lengua aragonesa” en la “Facultad” de Huesca. Cada día más tontos.”

Podemos viyer o desprecio total ent’a luenga aragonesa y os suyos fablants. Talment Vadillo (y atras personas d’o suyo partiu) no sepan d’a existencia d’a sciencia clamada Filolochía, que estudia precisament as luengas, y que precisament, l’aragonés ye considerada una luenga mas d’as miles que n’i hai en o mundo, no un conchunto de variedatz esferents como deciba o President d’a RAE (Reyal Academia d’a Luenga Espanyola), l’aragonés Blecua, en una recient entrevista en un meyo de comunicación aragonés. Que un ansotano y un benasqués no se pueden comunicar? Que no ye a mesma luenga? Talment Vadillo y os suyos companyers/as tiengan o titol de Filolochía, n’haigan feito mil postgraus y haigan descubierto o que a resta de scientificos d’a disciplina no han feito, encara que si ye con istos argumentos, sería millor que no’n decisen brenca, ta no fer o ridiculo.

Talment no haiga visto os escritos conservaus en aragonés u obras literarias d’atros sieglos escritas en o mesmo idioma.

L’aragonés naixe arredol d’o sieglo VIII, como un nuevo dialecto d’o latín, como a resta de luengas d’a Peninsula, fueras de l’euskera. Tien a maxima espardidura en o sieglo XIII si fa u no fa, estando luenga oficial d’o Reino d’Aragón, y prencipia o suyo retacule en o sieglo XV con a plegada de reis castellanos a o trono aragonés. Dende alavez no ha feito que retacular respective a o castellano, y encara pervive entre atras cosas gracias a la orografía pirinenca, que dica fa no guaire no ye estada guaire accesible. A UNESCO la considera a luenga en mayor periglo de desaparición d’Europa (ya se ye trencando prou a transmisión cheneracional). Actualment, encara que no i hai un censo oficial, alto u baixo i hai (con suerte) uns 10.000 fablants activos, sin contar con a chent que conoixe a luenga pero no la charra.

Y qué se fa ta evitar a esferra? As Cortz d’Aragón apreboron en o cabo de 2009 a conoixida como Lei de Luengas: http://www.boa.aragon.es/cgi-bin/BOAE/BRSCGI?CMD=VERDOC&BASE=BOLE&PIECE=BOLE&DOCR=3&SEC=FIRMA&RNG=200&SEPARADOR=&&PUBL=20091230, una lei de minimos en a que, prou que no se charra de cooficialidat y d’a que en istos quasi dos anyos de vichencia no s’ha feito (y prou tardi) que constituir o Consello Superior d’as Luengas d’Aragón, que nomás podió aprebar a constitución d’as Academias de l’aragonés y d’o catalán, que per esferents motivos (que no analizaremos aquí) no vagó d’aprebar-las per parti de l’anterior Gubierno aragonés.

Como no, nos trobamos con una pasividat total per parti d’os esferents gubiernos. Primer, tardando 10 anyos en aprebar una lei de luengas (que por cierto, os primers en presentar un prochecto de lei de luengas, ta par de l’anyo 1999 estioron os que agora son en o Gubierno, PP-PAR, y que ta par d’alavez no chemecaban per decir aragonés y catalán como lo fan agora, pero a politica ya se sabe cómo ye…); segundo, tardando anyo y meyo en no desembolicar ixa mesma feble lei, que de tan feble, estoi que tampoco no caleba tanto tiempo ta pensar en cómo desembolicar-la, no?; tercer, agora, con l’anuncio de que a lei, encara que no será derogada de raso, sí que se suposa que se quedará de traza finitiva en una lei muerta, u mas muerta encara.

A ofensiva contra tot o que no siga castellano enanta en tot l’Estau baixo os gubiernos d’o PP como si d’os quatro chinetes de l’apocalipsi se tractase. Ye que o que no ye castellano no ye cultura? Vadillos y demás s’ixublidan de que os idiomas, sigan quals sigan, son Patrimonio d’a Humanidat, y como tals, cal esfender-las, no acotolar-las! Ye una esferra cada vegada que una luenga muere, pero ya se sabe, fueras d’o castellano, anglés, francés, alemán, chino… a resta de luengas no fan honra. Pero ye que as luengas minoritarias no son cultura? Acaso son folklore (como diría Eduardo Galeano) u superstición? Acaso ye charrar mal como tantas y tantas vegadas s’ha dito contra l’aragonés mientres sieglos d’enrestida castellonofona? Totz y todas hemos d’estar identicos? Acaso no ye a esferencia o que enriqueixe a o ser humano?

Per todas as faltadas a l’aragonés y a la cultura, y per tanto a os suyos fablants, o sinyor Director Cheneral de Cultura habría de dimitir (si tenese una mica de vergüenya) u estar forachitau (si tenesen una mica de vergüenya en o suyo Gubierno y partiu).

Mientres os Vadillos luitan per un Aragón monolingüe y aculturizau a on nomás o que fa diners se considera cultura, en l’aragonés no queda atra que confitar en nusatros/as mesmos/as ta que ista chicota luenga que encara ye bien viva (veiga-se o vistero que se ye fendo l’idioma en os retz ciberneticos y como se contrimuestra que l’aragonés no nomás fa honra ta charrar de monts, crabas y trastes agricolas, que se puede charrar de TOT). As personas que siempre hemos portau o peso d’a suya pervivencia, nos tememos que habremos d’estar as que continemos en a mesma luita, y prou que con mas rasmia, como os tiempos nos amuestran.

A pesar d’as grans divisions internas (talment en bells casos irreconciliables), cal fer iste camín totz y todas chuntas, patrimonials y neofablants, y as personas que nos refirman en ista luita, ta poder viyer un aragonés que deixe d’estar en periglo, un aragonés que no siga nomás un conchunto de dialectos trestallaus cadagún per o suyo costau, un aragonés que no siga sentiu con vergüenya per os suyos propios fablants, soque con argüello d’estar una parti mas d’estar y sentir-se aragonés. Per ixo, no ye prou con o que se fa, cal salir t’as carreras, cal demostrar que no somos mudos, que a nuestra luenga ye bien viva, que no se puede tallar.

Anuncis

Feu un comentari so far
Deixa un comentari



Deixa un comentari

Fill in your details below or click an icon to log in:

WordPress.com Logo

Esteu comentant fent servir el compte WordPress.com. Log Out / Canvia )

Twitter picture

Esteu comentant fent servir el compte Twitter. Log Out / Canvia )

Facebook photo

Esteu comentant fent servir el compte Facebook. Log Out / Canvia )

Google+ photo

Esteu comentant fent servir el compte Google+. Log Out / Canvia )

Connecting to %s



%d bloggers like this: