Fendo Orella 101.8 FM


Muitas felicidatz, AraInfo
Març 12, 2012, 8:29 am
Filed under: Aragon, Social | Etiquetes:

Fa dos anyos que AraInfo realizó a suya primer cobertura. Estió un 11 de marzo de 2010. Un d’ixos fredos maitins en o que te dispiertas con bells correus electronicos y belatro mensache a o mobil. ¡Fote, garra d’ells con buenas noticias! Yeran desaloixando o Centro Social Okupau “El Adoquín” en o vico d’As Fuents de Zaragoza.

Como resume Chuse, una d’as nueu personas d’o “Consello de Redaución d’AraInfo”, empecipiamos “informando dende abaixo, informando siempre con as d’abaixo, informando y deixando-nos sorprender con cada corazón combativo, informando contachiadas d’a exclamación subversiva d’as voces luitadoras d’iste pueblo d’as tierras d’a quatribarrada, informando y formando-nos, a vegadas con aimor, a vegadas con rabia, a vegadas sin dormir, pero siempre compartindo suenios”. Y explica de forma tan natural a suya incorporación a o prochecto con un “¡y yo que afortunadament pasaba por aquí!”.

Dende ixe diya d’o desaloixo de “El Adoquín” hemos treballau por informar a la sociedat aragonesa, hemos dau voz a las personas, organizacions, colectivos y asociacions de tot lo país que no tienen cullida en ixe tarabidau mercantil que son os meyos d’información de masas, controlaus por una reducida sector interpresarial y ideolochico. Hemos denunciau o que atros meyos no s’han atribiu, no han quiesto u no les han deixau denunciar en os suyos respectivos soportes.

A necesidat de creyar qualcosa distinta a o que existe ye bella cosa que nos movió a organizar-nos. Milla explica que “nos hemos cansau de que nos cuenten mentiras sobre o que vivimos diya a diya, de que nos preben de convencer de que o nuestro esvenidero ye milimetricament disenyau. No estomagamos mas analís que lechitiman as inchusticias, amagan as suyas causas y a os suyos causants. No queremos l’uniforme d’enemigo que nos colocan quan damos un trango enta debant, pues nos isola y desepara d’os nuestros iguals. Y, amás, nos aburre estar meras espectadoras. ¡Amenistamos información que nos aduye a transformar a nuestra realidat!” Con ista intención camina Arainfo, dimpués de dos anyos de desobediencia informativa, prebando de fer visteras y enrastrar as luitas populars d’Aragón. Y adhibe Milla: “Dende ixa subchectividat que nos fa unicos, pero que de vez nos empenta a pillar-nos d’a man, hemos pretau a caminar. Gracias por a calor d’a vuestra acullida, ye a enerchía que nos fa abanzar.”

Tot lo treballo realizau ha estau posible gracias a la libertat que nos han proporcionau os espacios libres en o ret como son Nobleza Baturra y Nodo50. Tampoco no nos ixublidamos de todas ixas amigas que nos han aduyau en ixe proceso de creyación y encara hue nos continan acompanyando en iste viache d’a información libre y sin obstaclos. No podemos negar o caracter anticapitalista d’AraInfo, como apunta Kuka, “dos anyos de delera, d’esfuerzo, unos mas que no atros, por lograr un meyo alternativo de difusión y comunicación, alleno a os meyos oficials d’o Capital. Dos anyos y aquí bi somos, fendo-nos o nuestro espacio, creixendo y dando voz a os y as que no lo tenebanos dica agora. Dos anyos y muito camín y treballo por debant”.

Muitas de nusatras no imachinabanos que o prochecto que encetabanos iba a evolucionar d’a traza que l’ha feito y lo contina fendo. Hemos creixiu como personas y como colectivo. “Yo tasament sabeba publicar unas linias con foto en o blog de “La enredadera” y gracias a las mías compas d’AraInfo ya sé meter vidios, clasificar as noticias por categorías, cambiar o formato a os textos y muitas qüestions tecnicas que antis no creyeba tan amenistables y que hue las considero muito importants, ya que fan mas accesible y atractiva la información, son a o servicio d’o que queremos contar, que ye o realment important, o que creyamos chuntas dende as luitas populars”, nos cuenta Nacho Escartín, atra d’as personas d’o “Consello de Redaución d’AraInfo”. Por muy esferents que sigamos entre nusatras, hemos abanzau con un mesmo obchectivo, favoreixer os cambeos que queremos en a sociedat aragonesa. ¡Qué no ye poco!.

¡Ay, a tecnolochía y as nuevas ferramientas de comunicación! ¡Quánto hemos aprendiu y o que nos ne queda!… Silvia etiqueta y “taguea”: [treballo en equipo y cooperación], [consenso], [formación y información], [risas muitas risas], [capacidat de critica y d’autocritica], [resolución de conflictos], [compromís etico y solidario], [creyatividat] y [politicas feministas].

Remeramos ixos primers anyos en os que Kaos en la Red, Adeban u Nobleza Baturra daban cullida a toda ixa información que se cheneraba a o nuestro arredol, a on sin querer controlabas as visitas y veyebas en qué cifras de lecturas te movebas. Agora paramos cuenta de que continamos creixendo, que a on antis yeran 300, 500, 1.000 visitas,… ¡agora en son muitas mas! En iste sentiu, Iker reconoixe que “quan prencipiamos a pensar en AraInfo fa mas de tres anyos yeranos nomás que quatro personas con muita delera y poco conoiximiento tecnico, agora en somos nueu en o Consello y un ret important de colaboradoras muito activas. En ixos tiempos no yera conscient d’o gran treballo tecnico que suposaba mantener un portal-web d’istas caracteristicas, como La Haine, Kaos, Rebelión, Nodo50, etc, ye agora quan entiendo o gran esfuerzo que suposa chestionar totz istos fluixos d’información que diya a diya van y vienen por os retz”.

A mayor alegría que tenemos como colectivo, ye a cada vegada mayor acceptación por parti d’a sociedat, ascuitar ixas criticas constructivas, as felicitacions por o treballo realizau, por o disenyo web u que te pleguen valoracions tecnicas ta que o portal que agora mesmo femos servir como soporte t’as nuestras comunicacions siga mas accesible. Gracias a ellas, aprendemos a valurar encara mas o treballo que realizamos, como enfatiza Serchio, compartindo que “en AraInfo he disfrutau treballando con as ueito companyeras d’o Consello, gracias por estomagar-me y fer posible totz os retos que nos hemos iu proposando. En istos anyos he viviu muit buenos momentos en AraInfo, pero tamién remero bellas coberturas plenas de fotografías, “tweets”, apuntes, trucadas y prisas por rematar a cronica, pero en fin, que n’i haiga muitas, muitas mas por iste país”

A nuestra voluntat colectiva ye clara. Queremos continar en o present ta conquerir l’esvenidero. Como aporta Chorche, deseyamos “aprender fendo. Asinas hemos pasau istos dos primers anyos de singladura en AraInfo. Entre todas hemos iu formando-nos, y no menos important, cudiando-nos ta no perder-nos en a tecnolochía u en as esferencias. Entre todas, “as nueu” y tamién todas “as nuestras colaboradoras”, hemos estau capables de ninviar ta tot Aragón y t’o mundo “virtual” as luitas d’emancipación social, nacional, de clase u de chenero que s’han iu producindo a o nuestro arredol. En ista labor nos comprometemos a continar.”

Y ta rematar ista conversación a 9 bandas, Josám Peckinpah adhibe con entusiasmo que “istos dos anyos han estau intensos, polius y luminosos. A tamás d’as inchusticias y barbaridatz imposadas por o sistema, hemos consiguiu retratar muitas risetas y uelladas d’asperanza en a chent que nos rodia. O pueblo contina luitando y nusatras continaremos quitando as camaras t’a carrera, ta continar estando testigos y altavoces d’a suya luita”.

Advertisements

Feu un comentari so far
Deixa un comentari



Deixa un comentari

Fill in your details below or click an icon to log in:

WordPress.com Logo

Esteu comentant fent servir el compte WordPress.com. Log Out / Canvia )

Twitter picture

Esteu comentant fent servir el compte Twitter. Log Out / Canvia )

Facebook photo

Esteu comentant fent servir el compte Facebook. Log Out / Canvia )

Google+ photo

Esteu comentant fent servir el compte Google+. Log Out / Canvia )

Connecting to %s



%d bloggers like this: