Filed under: Aragon, Cultura, Fendo Orella, Luenga | Etiquetes: A hora Charrante, cados radio, chornadas, mullersycordials, nogará, radio somontano
Hue prencipian as XXII Chornadas d’as Luengas d’Aragón que un anyo más organiza l’Asociación Cultural Nogará-Religada.
Ista tarde prencipian con dos horas de radio en directo que tenemos a placer de fer chunto con Cados Radio, Charradas y Capazos de Radio Somontano, A Hora Charrante y Mullers y Cordials.
O martes se presentará o libro “Historietas d’un lugar de Cinco Villas” con José Arbués (Autor d’o libro) y Chusé Raúl Usón (editor).
O mierques plegará o turno d’as Charradas con José María Satué, mientras que o chueves Diego Colás explicará por qué s’ha de reubrir o Canfranc.
O viernes, Mª José Girón charrará de turismo lingüistico achuntando a neofablants y patrimonials.
O luns 20 Chusé García-Moreno ferá una visita turistica en aragonés por o casco historico zaragozano.
Y ta rematar, o martes 21 en a seu de Nogará se ferá un taste de vins D.O. Carinyena y degustación de quesos O Xortical.
Todas as actividatz prencipian a las 19 h en o Centro Joaquin Roncal (c/ Sant Braulio 5-7), fueras de l’actividat d’o martes 21 que será en a seu de Nogará (Pza Asso, local)
Filed under: Cultura, Fendo Orella, Luenga | Etiquetes: Chorche Pérez, Estrellados, GuinDJ, Softaragones
Ahiere, 9 d’abril, Chorche Pérez se pasó por os Estudeos Centrals de Radio Topo ta charrar-nos de Softaragonés, una iniciativa que leva anyos traducindo Software ta la nuestra luenga ta que podamos fer servir programas como Skype u Gimp en aragonés, asinas como lo Telegram u Mozilla-Firefox, amás d’o traductor online u d’o sintetizador eSpeak.
Precisament, estió iste sintetizador eSpeak qui fació a introducción d’o programa y un d’os programas d’os que más nos charró Chorche.
Tamién contemos con a colaboración de GuinDJ, d’o programa Estrellados, que amás d’aduyar-nos con os mandos y amenizar a charrada con bell temazo, fació posible que iste programa estase trilingüe
Si queretz saber-ne más, no tos perdatz iste programa. Y tos prometemos más colaboracións de Chorche, porque ye claro que una hora no ye prou ta que nos cuente tot lo que sabe.
Ta ascuitar o programa pencha aquí
Filed under: Cultura, Fendo Orella, Luenga | Etiquetes: aragonés, Ca-2 Radio, día d'a luenga materna
O pasau 19 de febrero faciemos un programa especial con motivo d’o Diya d’a Luenga Materna en o que contemos con uns convidaus de luxo: os zagals de Cados Radio!
Lucía, Raquel, Juan y Pablo nos contón cuentos en a suya luenga, nos comentoron qué suposa ta ells que l’aragonés no s’amostre en a escuela y dimpués sus pais facioron a charrada sobre o dificil que ye estar pai aragonesofablant (difícil, sí, pero no imposible!!)
Ah! Y tot amenizau por as suyas cantas favoritas!! No tos podetz perder iste programa, si garra dubda, un d’os millors Fendo Orellas que hetz sentiu nunca!
Ta ascuitar o programa pencha aquí
Filed under: Cheografía, Cultura, Ecolochía, Fendo Orella | Etiquetes: Fendo Orella
I puyamos o programa d’o chueves pasau 18 d’aviento, anque comentemos bella noticia graciosa y a nuestra presentadora estrela nos charró d’os problemas de despoblación en a serranía de Cuenca y Teruel, asinas como os problemas ecolochicos que chenera.
https://archive.org/details/18.12.2014.FO
Totz os chueves dende as 18:30 dica as 19:00, Fendo Orella, programa de radio en aragonés feito en RadioTopo, 101.8FM.
Ista semana fablaremos d’o nadal en Manchester y Anglaterra, asinas como de costumbres y noticias de Manchester y o Reuno Uniu en venir un viello conoixiu de propio!
Filed under: Aragon, Cultura, Fendo Orella, Luenga, Radio Topo | Etiquetes: aragonés, Fermin Muguruza, leyendas, Madalena, Obrint Pas, refrans, Tio Vadillo
Ahiere estió o nuestro zaguer programa d’a temporada y teniemos a honor de tener a Tío Vadillo con nusatros con qui faciemos un chicot repaso d’a temporada y o sucediu.
Tamién charremos d’o prencipio d’a XXVI Semana Cultural d’a Madalena y de leyendas aragonesas y os suyos personaches, y ta que practiquetz una mica mas l’aragonés, bells refrans chistavins.
Tos comentemos o concurset ta que ganetz una dentrada t’o concierto de Fermín Muguruza d’iste sabado en Tudela, con dos dentradas en chuego. Hetz de fer un comentario en o nuestro blog metendo-ie bell enlaz a bella canta de Fermín Muguruza, y os dos primers, las ganarán.
Y antiparti, se despidió atro d’os nuestros companyers y lo fació con a canta traducida a l’aragonés “La vida sense tu” d’Obrint Pas.
Dimpués d’o verano asperamos trobar-nos a l’atro costau d’as ondas libres, en Radio Topo, 101.8 FM Zaragoza!
Filed under: Aragon, Cultura, Fendo Orella, Luenga, Meyo Ambién, Mosica, Radio Topo, Represion, Social, Solidaridat | Etiquetes: clima, Fermin Muguruza, immigrants, Luengas, Nafarroa Oinez, represión
A tamás de que se nos atragantó a parte tecnica d’o programa, teniemos una entrevista con una responsable d’o venient Nafarroa Oinez que se ferá a l’atro canto d’a muga, en Tutera/Tudela, y tamién promotora d’o concierto d’o venient 22 de chunio en a mesma localidat nabarra de Fermín Muguruza, Zuloak y Las Culebras en refirme a o mesmo.
Tamién tos charremos de tristas noticias d’a futura expulsión d’un immigrant en Zaragoza y d’a detención y agresión a dos mas por parte d’a UAPO. Tamién tos charremos d’as movilizacions contra a “Troika”, o porqué tenemos iste orache tan barrenau, comentando-tos que ya somos en bell medio d’o cambeo climatico y as furas conseqüencias que puede tener.
A livel de luengas d’Aragón, tos leyemos a “II Declaración de Mequinenza” que han acordau alcaldes de municipios catalanofablants en Aragón en defensa d’a suya luenga y contra a lei de no luengas, asinas como tos comentemos a unión d’as asociacions en defensa de l’aragonés ta defender a luenga y tamién contra ista lei en o que se conoixe como “Manifiesto d’Almudevar”.
A atro livel cultural, charremos de conciertos de ska (El último skalón y Brigada Improductiva, y Ser-Vicio Públiko) y d’as ferias que s’han celebrau iste pasau cabo de semana en Fonz y Benavarri.
Y como canta traducida, “Lucrezia”, de Fermín Muguruza y Dut.
O venient lunes mas, de 22 a 23 h. en Radio Topo, 101.8 FM Zaragoza.
Filed under: Aragon, Cultura, Fendo Orella, Luenga, Mosica, Radio Topo, Represion, Social, Solidaridat | Etiquetes: ateísmo, Barrenau, capitalismo, chiflo, Luengas, represión, salterio
O zaguer programa vinió calient charrando de l’aumento d’a represión policial en as zagueras semanas en Aragón y a resta de l’Estau, amás de charrar-tos una mica de capitalismo, ixa parola que pareixe que siga viedada de decir en os medios de comunicación y en a carrera.
Nos visitó un convidau que nos charró sobre a I Trobada de Salterio y Chiflo en Lasaosa o venient sabado 25, que chirará arredol d’istos dos instrumentos tradicionals.
Tos trahiemos as novedatz d’as luengas d’Aragón y atras luengas minorizadas, diemos a bienplegada a una nueva radio libre, Radio Pirineo en o 102.8 FM de Uesca, y nos visitó Barrenau, que en a suya sección nos charró d’ateísmo recomendando bells libros y autors asinas como vidios arredol d’iste tema.
Ta rematar o programa en o que sonó mosica fura y combativa, a canta traducida de Gen, “UAPO”.
Aquí puetz ascuitar o programa.
Nos “viyemos” a semana venient, en Radio Topo, 101.8 FM Zaragoza, lunes de 22 a 23 h.
Filed under: Aragon, Cultura, Luenga | Etiquetes: aragonés, Catalán, chornadas, nogará
Hue empecipian as XX Chornadas d’as Luengas d’Aragón. No puetz perder-te-las!
Charradas en o Centro Chuaquín Roncal (Pza. San Braulio, 5-7) totz os diyas a las 19:30h
Chueves 2 de mayo a las 20:00 en a librería “Pantera Rosa” (Carrera San Vicente de Paúl, 28) ferá a presentación o periodista Óscar Senar y os autors. A las 21:00 Brenda dimpués d’a presentación en “A Flama” (Carrera Mayor, 53)
Harry Clever ye o detective más peligarcero d’a ciudat.
Creyau fa más de 15 anyadas por o dibuixant Chema Cebolla ta la revista 451º, iste anti-heroe ye una sarcastica mofla d’aquells detectives privaus, balloqueros, traicioners y mullerers que fan parte d’o chenero d’o cine negro d’o Hollywood d’os anyos 40 y 50 d’o sieglo pasau.
Collas de gangsters, presecucions d’autos, carrerons foscos, zarracuchos afogaus en o fumo de tabaco, polidas mullers que nomás se veyen como obchetos, combates de boxeo achustaus…Totz istos ingredients, de mal estomacar, fan parte d’a vida cutiana de Harry Clever.
Con os suyos muitos defectos y pocas virtutz Harry Clever esboldrega a l’arreu totz os mitos d’a novela policiaca.
S’ha dito que Harry Clever ye un personache “noir”, tamién que Harry Clever ye un tebeo muito “pulp”, pero de lo que no bi ha garra dubda ye de que Harry Clever ye o detective más peligarcero d’a ciudat.
Filed under: Aragon, Cultura, Internacional, Mosica, Radio Topo, Social, Solidaridat | Etiquetes: Arrebato, Chávez, ETA, KBKS, Lucky Malice, Mirallo de papel, Obrint Pas, opera, PAH, Sexy Sadie
Prencipiemos o programa d’una traza una mica especial, y ye que a colla valenciana Obrint Pas deixan o suyo prochecto de traza indefinida y queriemos alcordar-nos-ne. Faciemos un repaso a l’actualidat, centrau en as declaracions d’a Delegada d’o Gubierno en Madrit, Cristina Cifuentes que relacionaba a la PAH con ETA y pleguemos a la conclusión de que tot ye ETA. Tamién charremos d’a manifestación d’a Marea Azula en esfensa d’os nuestros ríos o pasau sabado.
Tamién tos recentemos bells conciertos d’o cabo de semana pasau, os dos en a sala zaragozana Arrebato. O concierto de Mil Motivos y Switch Over ta rematar o prochecto “Cuando el Ebro suena… disidencia lleva” y o concierto de presentación d’o primer disco d’a veterana banda punk zaragozana KBKS (Karrero Blanko Kampeón de Salto) que tanyoron chunto a la colla femenina noruega de punk-grunge-garage Lucky Malice.
En l’aspecto mas purament cultural tos charremos d’a opera “Il Trovatore” de Verdi, situada en bells puntos d’Aragón y en a nuestra sección “O mirallo de papel” tos presentemos bells libros sobre a revolución bolivariana d’Hugo Chávez en Venezuela, tanto a favor como en contra.
Y nos despidiemos con a canta traducida, en ista ocasión le tocó a la desapareixida colla mallorquina Sexy Sadie con a canta “Forever is longer than the Universe itself”.
O venient lunes nos tornamos a trobar en Radio Topo de 22 a 23 h. en o 101.8 FM Zaragoza.
Fendo Orella 101.8 FM 