Filed under: Fendo Orella, Luenga, Radio Topo | Etiquetes: A hora Charrante, Cintas d'Enguero, Doblache
En ista ocasión trayemos t’o cado d’o tabonero a Edu de Cintas d’Enguero, una iniciativa asabelo pincha que ye plenando Youtube de parolas en aragonés.
Edu nos explica qué le levo a doblar dialogos de cintas ta l’aragonés, cómo lo fa y l’exito que ye tenendo, que mesmo José Mota le ye copiando a ideya.
De seguras que tos fa tanto goy iste programa como a iniciativa.
Ta ascuitar o programa pencha aquí
Ta veyer más scenas de Cintas d’Enguero pencha aquí
Filed under: Aragon, Cultura, Fendo Orella, Luenga, Radio Topo | Etiquetes: aragonés, Fermin Muguruza, leyendas, Madalena, Obrint Pas, refrans, Tio Vadillo
Ahiere estió o nuestro zaguer programa d’a temporada y teniemos a honor de tener a Tío Vadillo con nusatros con qui faciemos un chicot repaso d’a temporada y o sucediu.
Tamién charremos d’o prencipio d’a XXVI Semana Cultural d’a Madalena y de leyendas aragonesas y os suyos personaches, y ta que practiquetz una mica mas l’aragonés, bells refrans chistavins.
Tos comentemos o concurset ta que ganetz una dentrada t’o concierto de Fermín Muguruza d’iste sabado en Tudela, con dos dentradas en chuego. Hetz de fer un comentario en o nuestro blog metendo-ie bell enlaz a bella canta de Fermín Muguruza, y os dos primers, las ganarán.
Y antiparti, se despidió atro d’os nuestros companyers y lo fació con a canta traducida a l’aragonés “La vida sense tu” d’Obrint Pas.
Dimpués d’o verano asperamos trobar-nos a l’atro costau d’as ondas libres, en Radio Topo, 101.8 FM Zaragoza!
No tos ixublidetz de que maitín sabado 15 feremos a gala d’os XX anyos de Radio Topo con mojitos, tapas, mosica y sorpresas, amás d’o sorteu d’a cesta, d’a que suposamos ya en tendretz boletos, no? Maitín dende as 20 h. en a Vía Láctea (C/ Dr. Palomar, 25).
Filed under: Aragon, Cultura, Fendo Orella, Luenga, Meyo Ambién, Mosica, Radio Topo, Represion, Social, Solidaridat | Etiquetes: clima, Fermin Muguruza, immigrants, Luengas, Nafarroa Oinez, represión
A tamás de que se nos atragantó a parte tecnica d’o programa, teniemos una entrevista con una responsable d’o venient Nafarroa Oinez que se ferá a l’atro canto d’a muga, en Tutera/Tudela, y tamién promotora d’o concierto d’o venient 22 de chunio en a mesma localidat nabarra de Fermín Muguruza, Zuloak y Las Culebras en refirme a o mesmo.
Tamién tos charremos de tristas noticias d’a futura expulsión d’un immigrant en Zaragoza y d’a detención y agresión a dos mas por parte d’a UAPO. Tamién tos charremos d’as movilizacions contra a “Troika”, o porqué tenemos iste orache tan barrenau, comentando-tos que ya somos en bell medio d’o cambeo climatico y as furas conseqüencias que puede tener.
A livel de luengas d’Aragón, tos leyemos a “II Declaración de Mequinenza” que han acordau alcaldes de municipios catalanofablants en Aragón en defensa d’a suya luenga y contra a lei de no luengas, asinas como tos comentemos a unión d’as asociacions en defensa de l’aragonés ta defender a luenga y tamién contra ista lei en o que se conoixe como “Manifiesto d’Almudevar”.
A atro livel cultural, charremos de conciertos de ska (El último skalón y Brigada Improductiva, y Ser-Vicio Públiko) y d’as ferias que s’han celebrau iste pasau cabo de semana en Fonz y Benavarri.
Y como canta traducida, “Lucrezia”, de Fermín Muguruza y Dut.
O venient lunes mas, de 22 a 23 h. en Radio Topo, 101.8 FM Zaragoza.
Filed under: Aragon, Cultura, Fendo Orella, Luenga, Mosica, Radio Topo, Represion, Social, Solidaridat | Etiquetes: ateísmo, Barrenau, capitalismo, chiflo, Luengas, represión, salterio
O zaguer programa vinió calient charrando de l’aumento d’a represión policial en as zagueras semanas en Aragón y a resta de l’Estau, amás de charrar-tos una mica de capitalismo, ixa parola que pareixe que siga viedada de decir en os medios de comunicación y en a carrera.
Nos visitó un convidau que nos charró sobre a I Trobada de Salterio y Chiflo en Lasaosa o venient sabado 25, que chirará arredol d’istos dos instrumentos tradicionals.
Tos trahiemos as novedatz d’as luengas d’Aragón y atras luengas minorizadas, diemos a bienplegada a una nueva radio libre, Radio Pirineo en o 102.8 FM de Uesca, y nos visitó Barrenau, que en a suya sección nos charró d’ateísmo recomendando bells libros y autors asinas como vidios arredol d’iste tema.
Ta rematar o programa en o que sonó mosica fura y combativa, a canta traducida de Gen, “UAPO”.
Aquí puetz ascuitar o programa.
Nos “viyemos” a semana venient, en Radio Topo, 101.8 FM Zaragoza, lunes de 22 a 23 h.
Iste miercols 1 de mayo torna l’imprescindible socalce de Radio Topo en o SOLAR D’O CONELLO (en frent plaza d’a Madalena).
Pasa-te-ie a conoixer-nos en persona, leva-te as nuestras camisetas, pegallos, fancins y muito mas. Tapas variadas a cargo d’os programas, trunfas asadas ta caldiar o cuerpo, socalce, biera, y a mosica de DOCTOR CALAVERA + CAMILLE.
Te i asperamos quan rematen as manifestacions (13:00). Con o tuyo refirme continaremos atros 20 anyos estando a voz d’os sin voz, ¡NO I FALTES! ¡ESPARDE, COMPARTE, Y CONTINA LUITANDO!
Filed under: Aragon, Colonialismo, Historia, Internacional, Mosica, Radio Topo, Represion, Social | Etiquetes: 1 de mayo, asedio Congreso, Bangladesh, capitalismo, Heraldo de Aragón, O mirallo de papel, Pedalea, Radio Topo, Roma
En o zaguer programa charremos de l’actualidat metendo o punto de gollada en o capitalismo (asedio a o Congreso, desastre de Bangladesh, tiroteu de Roma, manifestación d’o 23 d’abril d’a Coordinadera Sindical Alternativa), amás de comentar-tos a movilización contra o nuevo reglamento de circulación en o que respecta a las bicicletas y o zaguer concierto de Soziedad Alkóholika en Zaragoza.
En a sección “O mirallo de papel”, o nuestro comapanyero nos comentó y nos desaconselló o libro “Aragón: su identidad siglo a siglo” que regalaba Heraldo de Aragón, editau por o Gubierno d’Aragón y a on descubriemos un exercicio claro d’adoctrinamiento en o mas puro y rancio espanyolismo rechionalista aragonés.
Tamién tos charremos de l’1 de mayo y a suya historia, asinas como recordar o venient socalce de Radio Topo ta l’1 de mayo, una rifa que se ferá en venients calendatas t’o XX cabo d’anyo d’a radio (podetz demandar-nos numers) con una cesta valurada en 200 € y as XX Chornadas d’as Luengas d’Aragón de l’asociación cultural Nogará-Religada. Ta rematar o programa, a canta traducida d’una colla zaragozana desapareixida, Mog, con a canta “Nuevo orden”.
Tos asperamos o venient lunes en Radio Topo, 101.8 FM Zaragoza de 22 a 23 h.
Filed under: Aragon, Cultura, Internacional, Mosica, Radio Topo, Social, Solidaridat | Etiquetes: Arrebato, Chávez, ETA, KBKS, Lucky Malice, Mirallo de papel, Obrint Pas, opera, PAH, Sexy Sadie
Prencipiemos o programa d’una traza una mica especial, y ye que a colla valenciana Obrint Pas deixan o suyo prochecto de traza indefinida y queriemos alcordar-nos-ne. Faciemos un repaso a l’actualidat, centrau en as declaracions d’a Delegada d’o Gubierno en Madrit, Cristina Cifuentes que relacionaba a la PAH con ETA y pleguemos a la conclusión de que tot ye ETA. Tamién charremos d’a manifestación d’a Marea Azula en esfensa d’os nuestros ríos o pasau sabado.
Tamién tos recentemos bells conciertos d’o cabo de semana pasau, os dos en a sala zaragozana Arrebato. O concierto de Mil Motivos y Switch Over ta rematar o prochecto “Cuando el Ebro suena… disidencia lleva” y o concierto de presentación d’o primer disco d’a veterana banda punk zaragozana KBKS (Karrero Blanko Kampeón de Salto) que tanyoron chunto a la colla femenina noruega de punk-grunge-garage Lucky Malice.
En l’aspecto mas purament cultural tos charremos d’a opera “Il Trovatore” de Verdi, situada en bells puntos d’Aragón y en a nuestra sección “O mirallo de papel” tos presentemos bells libros sobre a revolución bolivariana d’Hugo Chávez en Venezuela, tanto a favor como en contra.
Y nos despidiemos con a canta traducida, en ista ocasión le tocó a la desapareixida colla mallorquina Sexy Sadie con a canta “Forever is longer than the Universe itself”.
O venient lunes nos tornamos a trobar en Radio Topo de 22 a 23 h. en o 101.8 FM Zaragoza.
En l’anyo que celebramos o XX cabo d’anyo de Radio Topo, as companyeras d’El Acratador (L’Acrataire en a suya version en aragones) ubren nuevo blog y en ell, de vez que nos recontan a suya historia, lo fan tamien de Radio Topo y d’o movimiento anarquista de Zaragoza.
Han pasau bells anyos…
En 1986 naixeba, d’a man d’Estudiants Anarkistas de CNT en Zaragoza, l’Acratador, un programa de radio que miraba de dar cobertura a las movilizacions estudiantils, a tot meter en aquells anyos.
Uns prencipios pero que muit amateurs, sintonía d’os R.I.P., tant de moda alavez con o suyo LP No te muevas y noticias.
L’Acratador prencipiaba o suyo camín en a quiesta Onda Vorde, antecesora de l’actual Radio Topo, en un chabisque de falsa en o Casco Viello. Yeran anyos efervescents, a Transición daba os suyos zaguers trangos con os movimientos socials y politicos en pleno retacule y l’anarquismo zaragozano yera dividiu en diversas tendencias. I heba dos CNTs y un burguil de partius marxistas d’os quals no’n queda ni a memoria (y beluns d’os quals podrían alcordar fer parti d’o PSOE hue día)
En 1989 a UVE clausura Onda Vorde y l’Acratador empecipia a salir en papel un tiempo mas tarde. 99 numers de boletín contrainformativo y libertario que han quedau t’a memoria colectiva de l’anarquismo zaragozano. Plegamos a quitar dica 3000 eixemplars que se distribuiban de traza gratuita por toda a ciudat, l’Estau y mesmo belún internacionalment.
De vez o programa se muda ta Radio La Granja, que heba estau clausurada por o suyo emparo a la vada de TUZSA y alavez reubierta, emitindo dende o vico de Sant Chusé, an que hue en día contina.
Ta part d’alavez l’Acratador yera un programa de dos horas de duración y viviría a desaparixión d’Estudiants Anarkistas ta convertir-sen en l’Ateneo Libertario de Zaragoza dimpués d’a ocupación de l’antiga Estación d’Utriellas, do s’unificoron os colectivos libertarios d’a ciudat, en 1991.
Utriellas no duró guaire y l’Ateneo empecipiaría o suyo camín en a Casa Okupada de la Paz, en P. Sagasta, pleno centro burgués d’a ciudat. Tiempos de sumar ideyas y d’intensa actividat. A Casa de la Paz sería un referent d’a okupación en tot l’Estau y d’os movimientos socials en Zaragoza.
Allí naixioron colectivos feministas, antimilitaristas, ecolochistas y asinas-asinas. Totz ells tenioron o suyo espacio en o nuestro programa de radio, que iba cambiando de components, de sintonía (ta part d’alavez a canta de GRB).
Ixe leixano 1993 naixe Radio Topo, prochecto d’os antigos miembros d’Onda Vorde reunius en os locals d’a desapareixida Radio Karkoma y con nuevas personas disposadas a tot.
A ideya de Radio Topo ye a mesma d’Onda Vorde: treballo horizontal y antiautoritario. Sin achustaus, treballo autochestionario y ideyas diversas.
Lamentablement o 23 d’aviento de 1993 a Casa de la Paz estió desaloixada. A fin d’un prochecto pero o prencipio d’atros. Intensos disturbios y movilizacions se producirían quantos días dimpués d’o desaloixo.
O desaloixo d’a Casa Okupada de la Paz trayería nuevos intentos infructuosos d’okupación, como o Colechio de Sant Agostín, chusto frent d’an que hue se troba o Local Anarquista La Revuelta. Momentos de resistencia memorables. Pero dimpués vendría l’esbafe d’os colectivos, una breu estancia logando o C.S. Angel Chueca y treslau t’o Coso, do o prochecto se trestalla. Quantos colectivos fundarían o C.S. Entropía.
Emitir en dos radios s’empecipia a fer complicau y l’Acratador deixa Radio La Granja y contina emitindo solament en Radio Topo, que creixe en miembros y en potencia d’emisión. Un prochecto ilusionant y muit plural en ixes momentos.
Dimpués d’o triste truco d’o trestalle y a travesía d’o desierto, se funda o Centro Social Libertario, con a resta de diferents sensibilidatz anarquistas, l’Ateneo Libertario y una colla d’a FIJL.
Allí naixería o Comedor Popular Vegano, que encara sobrevive, totz os sabados.
Radio Topo contina creixendo y plega a tener dica 45 programas. L’Acratador en ye un d’ells pero d’aquell alavez queda a memoria de muitos atros programas de conteniu libertario realizaus por CNT, as JJLL y muitas individualidatz.
Vienen nuevos tiempos y o CSL se treslada t’a C/ Sant Agostín, convertiu en o Centro Social Anarquista La Revuelta, que asume o programa y o boletín.
L’Acratador en papel remataría desapareixendo, pero hemos seguiu en as ondas. Agora con os nuestros podcast, con streaming, en una Radio Topo que fa 20 anyos y que se mantiene con os suyos ideyals, endurando o tronada d’a eterna alegalidat y con mas cosetas que recontar.
Filed under: Aragon, Cultura, Ecolochía, Historia, Internacional, Internacionalismo, Luenga, Mosica, Radio Topo, Social, Solidaridat
O zaguer programa lo faciemos de conchunta con os nuestros companyers de Mate Amargo y mientras istas dos horas nos miremos d’amanar-tos ta ixe país desconoixiu perdiu entre altiplanos y selvas en Sudamerica.
Charremos d’as nacionalizacions d’interpresas espanyolas por parte d’o gubierno d’Evo Morales, d’o que tamién en recentemos bella parte negativa, como a posible construcción d’una carretera en territorio virchen en a selva, en o Tipnis. Tamién teniemos un convidau en l’estudeo, José de l’asociación cultural Raíces Andinas, con qui charremos, prou que sí, de Bolivia y d’a faina d’a suya asociación.
Vía telefonica charremos con Silvia de Mundubat, que nos charró sobre ista ONG. Comentemos una mica de literatura boliviana, amás de charrar-tos d’as luengas que existen en o país andino y quála ye a suya lechislación y situación. A quinoa, rica planta que fa buena honra como alimento estió tamién present en o programa.
Amenizando, buena mosica boliviana. Tot isto en as 2 horas d’iste especial.
A semana venient prebaremos d’estar con vusatras unatra vegada, como no, en Radio Topo, 101.8 FM Zaragoza.
Fendo Orella 101.8 FM 