Fendo Orella 101.8 FM


Fendo Orella en a kontrakantxa

A tamás de que se nos atragantó a parte tecnica d’o programa, teniemos una entrevista con una responsable d’o venient Nafarroa Oinez que se ferá a l’atro canto d’a muga, en Tutera/Tudela, y tamién promotora d’o concierto d’o venient 22 de chunio en a mesma localidat nabarra de Fermín Muguruza, Zuloak y Las Culebras en refirme a o mesmo.

Tamién tos charremos de tristas noticias d’a futura expulsión d’un immigrant en Zaragoza y d’a detención y agresión a dos mas por parte d’a UAPO. Tamién tos charremos d’as movilizacions contra a “Troika”, o porqué tenemos iste orache tan barrenau, comentando-tos que ya somos en bell medio d’o cambeo climatico y as furas conseqüencias que puede tener.

A livel de luengas d’Aragón, tos leyemos a “II Declaración de Mequinenza” que han acordau alcaldes de municipios catalanofablants en Aragón en defensa d’a suya luenga y contra a lei de no luengas, asinas como tos comentemos a unión d’as asociacions en defensa de l’aragonés ta defender a luenga y tamién contra ista lei en o que se conoixe como “Manifiesto d’Almudevar”.

A atro livel cultural, charremos de conciertos de ska (El último skalón y Brigada Improductiva, y Ser-Vicio Públiko) y d’as ferias que s’han celebrau iste pasau cabo de semana en Fonz y Benavarri.

Y como canta traducida, “Lucrezia”, de Fermín Muguruza y Dut.

Ascuita o programa.

O venient lunes mas, de 22 a 23 h. en Radio Topo, 101.8 FM Zaragoza.



Fendo Orella entre capitalismo, luengas, ateísmo, chiflos y salterios

O zaguer programa vinió calient charrando de l’aumento d’a represión policial en as zagueras semanas en Aragón y a resta de l’Estau, amás de charrar-tos una mica de capitalismo, ixa parola que pareixe que siga viedada de decir en os medios de comunicación y en a carrera.

Nos visitó un convidau que nos charró sobre a I Trobada de Salterio y Chiflo en Lasaosa o venient sabado 25, que chirará arredol d’istos dos instrumentos tradicionals.

Tos trahiemos as novedatz d’as luengas d’Aragón y atras luengas minorizadas, diemos a bienplegada a una nueva radio libre, Radio Pirineo en o 102.8 FM de Uesca, y nos visitó Barrenau, que en a suya sección nos charró d’ateísmo recomendando bells libros y autors asinas como vidios arredol d’iste tema.

Ta rematar o programa en o que sonó mosica fura y combativa, a canta traducida de Gen, “UAPO”.

Aquí puetz ascuitar o programa.

Nos “viyemos” a semana venient, en Radio Topo, 101.8 FM Zaragoza, lunes de 22 a 23 h.

 



Fendo Orella navega entre l’actualidat y a historia

En o zaguer programa charremos de l’actualidat metendo o punto de gollada en o capitalismo (asedio a o Congreso, desastre de Bangladesh, tiroteu de Roma, manifestación d’o 23 d’abril d’a Coordinadera Sindical Alternativa), amás de comentar-tos a movilización contra o nuevo reglamento de circulación en o que respecta a las bicicletas y o zaguer concierto de Soziedad Alkóholika en Zaragoza.

En a sección “O mirallo de papel”, o nuestro comapanyero nos comentó y nos desaconselló o libro “Aragón: su identidad siglo a siglo” que regalaba Heraldo de Aragón, editau por o Gubierno d’Aragón y a on descubriemos un exercicio claro d’adoctrinamiento en o mas puro y rancio espanyolismo rechionalista aragonés.

Tamién tos charremos de l’1 de mayo y a suya historia, asinas como recordar o venient socalce de Radio Topo ta l’1 de mayo, una rifa que se ferá en venients calendatas t’o XX cabo d’anyo d’a radio (podetz demandar-nos numers) con una cesta valurada en 200 € y as XX Chornadas d’as Luengas d’Aragón de l’asociación cultural Nogará-Religada. Ta rematar o programa, a canta traducida d’una colla zaragozana desapareixida, Mog, con a canta “Nuevo orden”.

Programa 29-4-13

Tos asperamos o venient lunes en Radio Topo, 101.8 FM Zaragoza de 22 a 23 h.

 



¿Fendo Orella tamién ye ETA?

Prencipiemos o programa d’una traza una mica especial, y ye que a colla valenciana Obrint Pas deixan o suyo prochecto de traza indefinida y queriemos alcordar-nos-ne. Faciemos un repaso a l’actualidat, centrau en as declaracions d’a Delegada d’o Gubierno en Madrit, Cristina Cifuentes que relacionaba a la PAH con ETA y pleguemos a la conclusión de que tot ye ETA. Tamién charremos d’a manifestación d’a Marea Azula en esfensa d’os nuestros ríos o pasau sabado.

Tamién tos recentemos bells conciertos d’o cabo de semana pasau, os dos en a sala zaragozana Arrebato. O concierto de Mil Motivos y Switch Over ta rematar o prochecto “Cuando el Ebro suena… disidencia lleva” y o concierto de presentación d’o primer disco d’a veterana banda punk zaragozana KBKS (Karrero Blanko Kampeón de Salto) que tanyoron chunto a la colla femenina noruega de punk-grunge-garage Lucky Malice.

En l’aspecto mas purament cultural tos charremos d’a opera “Il Trovatore” de Verdi, situada en bells puntos d’Aragón y en a nuestra sección “O mirallo de papel” tos presentemos bells libros sobre a revolución bolivariana d’Hugo Chávez en Venezuela, tanto a favor como en contra.

Y nos despidiemos con a canta traducida, en ista ocasión le tocó a la desapareixida colla mallorquina Sexy Sadie con a canta “Forever is longer than the Universe itself”.

Programa 25/03/2013

O venient lunes nos tornamos a trobar en Radio Topo de 22 a 23 h. en o 101.8 FM Zaragoza.



Quan l’Ebro sona…
Març 19, 2013, 9:55 am
Filed under: Mosica, Social | Etiquetes: , , ,

Fa bells 5 anyos que una colla d’amigos nos metiemos a dar forma a una ideya que se nos heba ocurriu ta expresar y visibilizar a nuestra oposición a la Exposición Internacional Zaragoza 2008. Acompanyadas de buenas amigas y personas que s’adhibioron, estiemos coordinando o prochecto “Cuando el Ebro suena, disidencia lleva” 58 collas de mosica de Zaragoza compartioron una canta cadagún, a mayoría d’ellas ineditas y muitas d’ellas gravadas de propio. Editamos mil copias d’un triple CD que regalabanos con a compra d’una piruleta de corazón.

En 2013 dengún puede negar que a Expo ha suposau un malfurrie y una esferra t’as cuentas publicas. Entre un verano, tasament 3 meses, Zaragoza se creyó o centro d’o mundo. Tot pareixeba fiesta y color. Pero dimpués d’as grans obras y os enormes edificios, plegoron as ruinas y o reseco. Hue Zaragoza ye una ciudat endeudada, con cada vegada mas diferencias socials y dificultatz ta salir d’una espiral de desarrollismo y creiximiento irracional que no nos leva ta garra cabo.

Qualques d’as que ahiere aplaudioron a Expo con as orellas, hue han cambiau os suyos discursos y veyen a realidat con unatra mirada. As que ahiere nos oposabanos a la Expo, siguiemos luitando por un cambeo de modelo y de ciudat. Hue tos convidamos a trobar-nos todas en a fiesta que hemos organizau ta celebrar o punto y final d’o “Cuando el Ebro Suena… disidencia lleva” que remata con a donación d’a recaudación ta dos prochectos que nos fan goyo.

O viernes 22 de marzo tos asperamos a todas en l’Arrebato, an que donaremos formalment 500 euros a l’Asociación Vecinal Arrebato y 2.000 euros a Radio Topo, alternativas en l’ocio autochestionau y a comunicación libre en as que nos seguimos trobando y asperamos fer-lo por muitos anyos. Leo Vargas nos meterá a o día d’o que suposa a Expo, i habrá rifas, punchadiscos bailongos y os conciertos de dos bandas que por o 2008 encara no existiban y que hue siguen dando ferrete en a ciudat d’o cierzo: Switch Over y Mil Motivos. L’Ebro sigue sonando!

Tos deixamos con a carta compartida con as 58 bandas que formoron parte d’o recopilatorio contra a Expo:

Quiestos amigos, fa 6 anyos nos proposemos un reto, un apasionant prochecto que estase o chilo uniu d’a disidencia mosical zaragozana debant de l’estrapalucio d’a Exposición Internacional de 2008, y fa 5 anyos tot ixe treballo quedó plasmau en o que estase y dica a calendada en ye, a mayor replega de bandas d’a nuestra ciudat y en o qual una parte d’os temas yeran ineditos u estioron gravaus de propio t’o mesmo. Beluns d’istes grupos ya no existen, y atros nuevos serían sin dubda en ista aventura que no estió atra coseta que una gran caixa de resonancia do as suyas voces y instrumentos nos lanzoron o que sentiban. Como podretz imachinar estioron muitas horas de treballo y esfuerzo ta que tot salise ta debant. Mirando enta zaga creyemos sincerament que mereixió a pena.

Y agora, en 2013, quan todas as suyas obras faraonicas y os suyos innombrables malfurries claman a la puerta d’a chent a pedir cuentas, creyemos que “Cuando el Ebro suena… disidencia lleva” ha plegau a la suya fin. Ha pasau tiempo, ye cierto, pero nunca no ye tarde. Y queremos zarrar d’una traza muit especial y como no podeba estar d’unatra traza: con una fiesta, a la qual totz, prou que i sotz convidaus. Será o día 22 de marzo, viernes, en l’Arrebato y en ella tendremos a gran actuación de dos bandas locals, MIL MOTIVOS (rap combativo) y SWITCH-OVER (rabioso rock). A las 20.00 horas, puntualidat exquisita y extrema ta veyer istes dos grans directos de penya tant maha y baralladera.

Queremos tamién aprofitar a oportunidat d’anunciar-tos que en o suyo día, como totz y todas recordaretz, ta emparar o prochecto y aconseguir o triple CD se procedió a la venda d’unas riquismas piruletas. Con cada piruleta regalamos o CD, y a venda d’as piruletas estió muit bien, aconseguiemos a cantidat de 2.545€. Dende “Cuando el Ebro suena… disidencia lleva” hemos decidiu emparar dos prochectos locals con una larga y encomiable trachectoria en o panorama mosical, alternativo y disident. Sobran presentacions ta Radio Topo y l’AV Arrebato. Todas dos concaran o futuro con as mesmas ganas y ilusión que o primer día y, por tirar enta debant con nuevas fitas, cadagún en as suyas necesidatz, cedemos a fondo perdiu y con gran placer 2.000€ a Radio Topo y 500€ a l’AV Arrebato ta que sigan enta debant como siempre han feito. No busquetz os atros 45€ que faltan porque os bienempleamos en una cena bien rica con o nuestro alcalde.

Si iste prochecto ha finalizau no nos culle a menor dubda que unatro distinto vendrá. Agora mas que no nunca hemos de prener o timón y marcar o camín. Agora mas que no nunca hemos d’escuitar as carreras, lanzar ideyas y meter-las en practica.

Gracias a todas y cadaguna d’as que creyoron en isto y lo facioron posible. Nos veyemos en a proxima! L’Ebro sigue sonando!

Quan l’Ebro sona… disidencia leva!



FENDO ORELLA – MATE AMARGO 25/02/2013 – ESPECIAL BOLIVIA

O zaguer programa lo faciemos de conchunta con os nuestros companyers de Mate Amargo y mientras istas dos horas nos miremos d’amanar-tos ta ixe país desconoixiu perdiu entre altiplanos y selvas en Sudamerica.

Charremos d’as nacionalizacions d’interpresas espanyolas por parte d’o gubierno d’Evo Morales, d’o que tamién en recentemos bella parte negativa, como a posible construcción d’una carretera en territorio virchen en a selva, en o Tipnis. Tamién teniemos un convidau en l’estudeo, José de l’asociación cultural Raíces Andinas, con qui charremos, prou que sí, de Bolivia y d’a faina d’a suya asociación.

Vía telefonica charremos con Silvia de Mundubat, que nos charró sobre ista ONG. Comentemos una mica de literatura boliviana, amás de charrar-tos d’as luengas que existen en o país andino y quála ye a suya lechislación y situación. A quinoa, rica planta que fa buena honra como alimento estió tamién present en o programa.

Amenizando, buena mosica boliviana. Tot isto en as 2 horas d’iste especial.

A semana venient prebaremos d’estar con vusatras unatra vegada, como no, en Radio Topo, 101.8 FM Zaragoza.



Fendo Orella 18/02/2013 – XIV Premios d’a mosica aragonesa

En iste programa una parte  d’os nuestros companyers se’n fue t’os XIV Premios d’a mosica aragonesa ta dar-nos-ne treslau en o programa sobre o sucediu astí.

Tos charremos d’atra gala, ista d’os Premios Goya, y tamién d’un articlo sobre indiferencia. Nos ne fuemos enta l’actualidat d’ista pasada semana, con as movilizacions d’a PAH, novedatz y actividatz de Radio Topo y de nuevas tos charremos de Yesa.

Barrenau nos trahió en a suya sección aimors homosexuals en os comics, y de convocatorias, tos ne faciemos alcordanza d’a venient movilización d’o 23F y a posible cobertura d’a mesma por parte de Radio Topo.

Ta rematar, a canta traducida, “Chaos”, d’a colla zaragozana Noise & Oi! en remeranza d’uns feitos acayeixius en o bar d’o mesmo nombre d’a carrera Heroísmo un 15 de febrero de 2003.

Tornaremos t’as ondas a venient semana, o lunes de 22 a 23 h. en Radio Topo, 101.8 FM zaragozana.



Fendo Orella 04/02/2013 – Tío Vadillo torna t’o programa

Tornó t’o programa Tío Vadillo, d’una traza una mica inasperada y sorprendent, estando-se tot o preograma ista vegada, con qui charremos de l’actualidat y de tot o que caleba.

sick brains

Tos presentemos o nuevo disco d’a veterana banda zaragozana Sick Brains que se diz “Círculo de guerra” que presentarán iste viernes en Zaragoza.

Tos charremos d’una iniciativa ta prebar d’evitar a deuda ilechitima d’o Concello de Zaragoza, asinas como atra iniciativa de l’asociación Creamos que demanda donar boligrafos gastaus en esquimen d’a población de Cochabamba en Bolivia.

Tos presentemos a nueva edición d’o ya clasico Febrero Feminista que prencipió a semana pasada y tos charremos d’a historia y personaches que n’i hai en o carnaval de Bielsa, que ye iste cabo de semana, y que tanto a iste como a os actos d’o Febrero Feminista tos animamos a ir-ie.

Nos despidiemos con una canta traducida de Calle 13.

http://archive.org/details/FendoOrella04022012

O lunes venient remera ascuitar-nos en Radio Topo de 22 a 23 h. en o 101.8 d’a FM zaragozana.



FENDO ORELLA 21/01/2013 – APOSTASÍA TA TOTZ Y TODAS
gener 23, 2013, 11:34 am
Filed under: Aragon, Cultura, Fendo Orella, Mosica, Radio Topo, Social, Solidaridat

Continamos esnavesando iste mes de chinero con un nuevo Fendo Orella an que charremos d’as zaguers noticias que han pasau istos diyas.

Tos presentemos tamién una nueva canta d’At Versaris asinas como lo nuevo disco d’una colla archentina que se diz RDA que tos podetz baixar dende aquí:

http://www.facebook.com/l/HAQGNdk17AQH_BL6ZVQ8aybHUs3-QBuoEWfeLs2gswUUG7w/www.mediafire.com/?or9eh5gpjdh1fc8

Barrenau en a suya sección nos charró de l’apostasía, d’os tramites que s’amenistan ta fer-la y d’a suya experiencia ta aconseguir deixar o club d’a fe en Cristo.

Y con a traducción d’una canta de Riot Propaganda podiemos ir en paz.

Aquí tenetz l’audio d’o programa:

http://archive.org/details/FendoOrella21-01-2013

Y a semana venient, si Dios en quiere, más.



Alfon libertat
Desembre 27, 2012, 8:38 am
Filed under: Internacional, Represion, Social, Solidaridat | Etiquetes: ,

A vida d’un choven de 21 anyos se consume entre as rellas d’una garchola. Alfonso Fernández salió de casa suya o pasau 14 de noviembre ta ir chunto a la suya novia ta un d’os piquetz d’o suyo vico, Vallekas. A tasos metros d’o suyo domicilio estioron detenius y levaus dreitament t’a Brigada d’información, an que sufrioron interminables interrogatorios extrachudicials por parti de quantos policías encapuchaus que no aturoron de menazar, fendo servir mesmo posibles conseqüencias contra a suya familia, novia y amigos con a finalidat de buscar información u una autoinculpación d’un delito que no han cometiu. Totz dos son acusaus de tenencia d’explosivos, delito t’o que l’articlo 568 d’o Codigo Penal estableix penas de 4 a 8 anyos. A o marguin d’as contradiccions y diferents versions policials ta contrimostrar que portiaban bella cosa que en realidat nunca no levoron dencima, en o material explosivo que suposadament les requison no han trobau nian una huella de dengún de totz dos detenius, como ratificó o propio fiscal debant d’o chuez, y ixo que estioron muitas y minuciosas as prebas que realizoron. Tampoco no troboron brenca que sostienga ista acusación en os rechistros a totz dos domicilios, en os quals a Brigada d’Información, siempre encapuchaus, tornó a emprenyar a las familias, como si no’n tenesen prou con veyer a os suyos fillos tractaus como verdaders terroristas.

Istas detencions estioron feitas servir como sincusa ta rechistrar un d’os puntos de trobada de Bukaneros, colla de seguidors d’o Rayo Vallecano a o que gosaba acudir Alfon t’animar a l’equipo d’o suyo vico. Tampoco no troboron brenca que podese argumentar l’acusación de tenencia d’explosivos, pero ya heba aconseguiu a Delegación d’o Gubierno criminalizar a un colectivo qualas reivindicacions socials son aconseguindo cada vegada mas notoriedat publica. Perfecto montache ta matar quantos paharos de vez.

Con tot y con ixo, y a tamas de todas as evidencias de tractar-se d’un nuevo montache policial, Alfon no solament no ye meso en libertat (como a suya novia, a l’aspera de chudicio), sino que dimpués de presions d’instancias mas altas o chuez decide ninviar-lo a garchola preventiva. O propio fiscal reconoix que no existe risgo de fuyida, ya que o choven tiene arraigo familiar y cumple con as premisas ta no poder estar aplicau o risgo de fuyida, pero alavez se quitan d’a manga una suposada alarma social, que no nomas ye falsa de raso sino que tamién en ye ilegal, ya que no consta en a lei d’enchudiciamiento criminal t’aplicar a garchola preventiva, estando o solo deteniu o 14-N en toda Europa en ista situación.

Pero no’n tienen prou con secuestrar-lo, sino que a os pocos días l’aplican o rechimen FIES, que suposa entre muitas atras cosetas a intervención de todas as comunicacions, bi incluidas as que tiene con familia y advogau, restriccions severas, hostigamientos… Una garchola adintro d’a garchola, declarau ilegal no fa guaire y denunciau por a-saber-lo organismos a ran mundial. A escalada represiva va dillá, adedicar a Brigada d’Información t’acudir ta domicilios, ta puestos de treballos y a fer seguimientos a quantos amigos d’Alfon por o simple feito d’haber-le escrito a la garchola.

L’Audiencia ha refusau o recurso contra a garchola preventiva, acceptando a ilegalidat de l’alarma social como prencipal motivo, pero inventar-se agora o de risgo de fuyida, o mesmo que o propio fiscal reconoixió no existir dende o prencipio. No solament existe montache policial alimentau por intréses politicos, sino cobertura chudicial ta levar-lo a cabo.

Ye muit facil engarcholar y torturar a un choven de clase obrera, mientres politicos y interpresarios corruptos desfrutan de impunidat total u mientres l’Estau indulta a miembros d’as fuerzas de seguranza acusaus de torturas.

Ye por tot ixo que familiars, amigos y companyers d’Alfon, asinas como todas as organizacions y colectivos sinyants, exichimos a suya libertat immediata y l’absolución de totz os detenius o 14-N.

Por tu, por yo, por totz os presos politicos.

Alfon Libertat! Prou de montaches policials!