Fendo Orella 101.8 FM


Fendo Orella en a kontrakantxa

A tamás de que se nos atragantó a parte tecnica d’o programa, teniemos una entrevista con una responsable d’o venient Nafarroa Oinez que se ferá a l’atro canto d’a muga, en Tutera/Tudela, y tamién promotora d’o concierto d’o venient 22 de chunio en a mesma localidat nabarra de Fermín Muguruza, Zuloak y Las Culebras en refirme a o mesmo.

Tamién tos charremos de tristas noticias d’a futura expulsión d’un immigrant en Zaragoza y d’a detención y agresión a dos mas por parte d’a UAPO. Tamién tos charremos d’as movilizacions contra a “Troika”, o porqué tenemos iste orache tan barrenau, comentando-tos que ya somos en bell medio d’o cambeo climatico y as furas conseqüencias que puede tener.

A livel de luengas d’Aragón, tos leyemos a “II Declaración de Mequinenza” que han acordau alcaldes de municipios catalanofablants en Aragón en defensa d’a suya luenga y contra a lei de no luengas, asinas como tos comentemos a unión d’as asociacions en defensa de l’aragonés ta defender a luenga y tamién contra ista lei en o que se conoixe como “Manifiesto d’Almudevar”.

A atro livel cultural, charremos de conciertos de ska (El último skalón y Brigada Improductiva, y Ser-Vicio Públiko) y d’as ferias que s’han celebrau iste pasau cabo de semana en Fonz y Benavarri.

Y como canta traducida, “Lucrezia”, de Fermín Muguruza y Dut.

Ascuita o programa.

O venient lunes mas, de 22 a 23 h. en Radio Topo, 101.8 FM Zaragoza.



Apareix Javier Ortega a salvo, pero deteniu, dimpués de dos diyas desapareixiu
Juny 3, 2013, 10:20 am
Filed under: Aragon, Solidaridat

Javier Ortega ha apareixiu en a maitinada d’iste lunes, seguntes informa Arainfo. Ye a salvo, pero deteniu en una comisaría de Zaragoza. Se desconoixen os cargos. Ista información se ha conoixiu gracias a un testigo presencial d’a detención.

Pareix que Ortega renunció a lo suyo dreito de representación legal, lo que alega la policía ta no haber informau a la familia d’a on yera ni ell, ni a suya furgoneta.

Javier Ortega Díaz, cherent d’a Cooperativa La Veloz Ecomensajería y miembro de REAS Aragón heba desapareixiu iste sabado en o trachecto entre Teruel y Zaragoza. Javier marchó ta Teruel a fer-ie una charrada sobre “Inserción Social” o pasau chueves, continando en contacto telefonico dica la nueit d’o viernes. Dende alavez no s’heba teniu garra contacto con ell.

http://www.arredol.com/apareix-javier-ortega-a-salvo-pero-deteniu-dimpues-de-dos-diyas-desapareixiu/



Fendo Orella entre capitalismo, luengas, ateísmo, chiflos y salterios

O zaguer programa vinió calient charrando de l’aumento d’a represión policial en as zagueras semanas en Aragón y a resta de l’Estau, amás de charrar-tos una mica de capitalismo, ixa parola que pareixe que siga viedada de decir en os medios de comunicación y en a carrera.

Nos visitó un convidau que nos charró sobre a I Trobada de Salterio y Chiflo en Lasaosa o venient sabado 25, que chirará arredol d’istos dos instrumentos tradicionals.

Tos trahiemos as novedatz d’as luengas d’Aragón y atras luengas minorizadas, diemos a bienplegada a una nueva radio libre, Radio Pirineo en o 102.8 FM de Uesca, y nos visitó Barrenau, que en a suya sección nos charró d’ateísmo recomendando bells libros y autors asinas como vidios arredol d’iste tema.

Ta rematar o programa en o que sonó mosica fura y combativa, a canta traducida de Gen, “UAPO”.

Aquí puetz ascuitar o programa.

Nos “viyemos” a semana venient, en Radio Topo, 101.8 FM Zaragoza, lunes de 22 a 23 h.

 



¿Fendo Orella tamién ye ETA?

Prencipiemos o programa d’una traza una mica especial, y ye que a colla valenciana Obrint Pas deixan o suyo prochecto de traza indefinida y queriemos alcordar-nos-ne. Faciemos un repaso a l’actualidat, centrau en as declaracions d’a Delegada d’o Gubierno en Madrit, Cristina Cifuentes que relacionaba a la PAH con ETA y pleguemos a la conclusión de que tot ye ETA. Tamién charremos d’a manifestación d’a Marea Azula en esfensa d’os nuestros ríos o pasau sabado.

Tamién tos recentemos bells conciertos d’o cabo de semana pasau, os dos en a sala zaragozana Arrebato. O concierto de Mil Motivos y Switch Over ta rematar o prochecto “Cuando el Ebro suena… disidencia lleva” y o concierto de presentación d’o primer disco d’a veterana banda punk zaragozana KBKS (Karrero Blanko Kampeón de Salto) que tanyoron chunto a la colla femenina noruega de punk-grunge-garage Lucky Malice.

En l’aspecto mas purament cultural tos charremos d’a opera “Il Trovatore” de Verdi, situada en bells puntos d’Aragón y en a nuestra sección “O mirallo de papel” tos presentemos bells libros sobre a revolución bolivariana d’Hugo Chávez en Venezuela, tanto a favor como en contra.

Y nos despidiemos con a canta traducida, en ista ocasión le tocó a la desapareixida colla mallorquina Sexy Sadie con a canta “Forever is longer than the Universe itself”.

Programa 25/03/2013

O venient lunes nos tornamos a trobar en Radio Topo de 22 a 23 h. en o 101.8 FM Zaragoza.



FENDO ORELLA – MATE AMARGO 25/02/2013 – ESPECIAL BOLIVIA

O zaguer programa lo faciemos de conchunta con os nuestros companyers de Mate Amargo y mientras istas dos horas nos miremos d’amanar-tos ta ixe país desconoixiu perdiu entre altiplanos y selvas en Sudamerica.

Charremos d’as nacionalizacions d’interpresas espanyolas por parte d’o gubierno d’Evo Morales, d’o que tamién en recentemos bella parte negativa, como a posible construcción d’una carretera en territorio virchen en a selva, en o Tipnis. Tamién teniemos un convidau en l’estudeo, José de l’asociación cultural Raíces Andinas, con qui charremos, prou que sí, de Bolivia y d’a faina d’a suya asociación.

Vía telefonica charremos con Silvia de Mundubat, que nos charró sobre ista ONG. Comentemos una mica de literatura boliviana, amás de charrar-tos d’as luengas que existen en o país andino y quála ye a suya lechislación y situación. A quinoa, rica planta que fa buena honra como alimento estió tamién present en o programa.

Amenizando, buena mosica boliviana. Tot isto en as 2 horas d’iste especial.

A semana venient prebaremos d’estar con vusatras unatra vegada, como no, en Radio Topo, 101.8 FM Zaragoza.



FENDO ORELLA 21/01/2013 – APOSTASÍA TA TOTZ Y TODAS
gener 23, 2013, 11:34 am
Filed under: Aragon, Cultura, Fendo Orella, Mosica, Radio Topo, Social, Solidaridat

Continamos esnavesando iste mes de chinero con un nuevo Fendo Orella an que charremos d’as zaguers noticias que han pasau istos diyas.

Tos presentemos tamién una nueva canta d’At Versaris asinas como lo nuevo disco d’una colla archentina que se diz RDA que tos podetz baixar dende aquí:

http://www.facebook.com/l/HAQGNdk17AQH_BL6ZVQ8aybHUs3-QBuoEWfeLs2gswUUG7w/www.mediafire.com/?or9eh5gpjdh1fc8

Barrenau en a suya sección nos charró de l’apostasía, d’os tramites que s’amenistan ta fer-la y d’a suya experiencia ta aconseguir deixar o club d’a fe en Cristo.

Y con a traducción d’una canta de Riot Propaganda podiemos ir en paz.

Aquí tenetz l’audio d’o programa:

http://archive.org/details/FendoOrella21-01-2013

Y a semana venient, si Dios en quiere, más.



Alfon libertat
Desembre 27, 2012, 8:38 am
Filed under: Internacional, Represion, Social, Solidaridat | Etiquetes: ,

A vida d’un choven de 21 anyos se consume entre as rellas d’una garchola. Alfonso Fernández salió de casa suya o pasau 14 de noviembre ta ir chunto a la suya novia ta un d’os piquetz d’o suyo vico, Vallekas. A tasos metros d’o suyo domicilio estioron detenius y levaus dreitament t’a Brigada d’información, an que sufrioron interminables interrogatorios extrachudicials por parti de quantos policías encapuchaus que no aturoron de menazar, fendo servir mesmo posibles conseqüencias contra a suya familia, novia y amigos con a finalidat de buscar información u una autoinculpación d’un delito que no han cometiu. Totz dos son acusaus de tenencia d’explosivos, delito t’o que l’articlo 568 d’o Codigo Penal estableix penas de 4 a 8 anyos. A o marguin d’as contradiccions y diferents versions policials ta contrimostrar que portiaban bella cosa que en realidat nunca no levoron dencima, en o material explosivo que suposadament les requison no han trobau nian una huella de dengún de totz dos detenius, como ratificó o propio fiscal debant d’o chuez, y ixo que estioron muitas y minuciosas as prebas que realizoron. Tampoco no troboron brenca que sostienga ista acusación en os rechistros a totz dos domicilios, en os quals a Brigada d’Información, siempre encapuchaus, tornó a emprenyar a las familias, como si no’n tenesen prou con veyer a os suyos fillos tractaus como verdaders terroristas.

Istas detencions estioron feitas servir como sincusa ta rechistrar un d’os puntos de trobada de Bukaneros, colla de seguidors d’o Rayo Vallecano a o que gosaba acudir Alfon t’animar a l’equipo d’o suyo vico. Tampoco no troboron brenca que podese argumentar l’acusación de tenencia d’explosivos, pero ya heba aconseguiu a Delegación d’o Gubierno criminalizar a un colectivo qualas reivindicacions socials son aconseguindo cada vegada mas notoriedat publica. Perfecto montache ta matar quantos paharos de vez.

Con tot y con ixo, y a tamas de todas as evidencias de tractar-se d’un nuevo montache policial, Alfon no solament no ye meso en libertat (como a suya novia, a l’aspera de chudicio), sino que dimpués de presions d’instancias mas altas o chuez decide ninviar-lo a garchola preventiva. O propio fiscal reconoix que no existe risgo de fuyida, ya que o choven tiene arraigo familiar y cumple con as premisas ta no poder estar aplicau o risgo de fuyida, pero alavez se quitan d’a manga una suposada alarma social, que no nomas ye falsa de raso sino que tamién en ye ilegal, ya que no consta en a lei d’enchudiciamiento criminal t’aplicar a garchola preventiva, estando o solo deteniu o 14-N en toda Europa en ista situación.

Pero no’n tienen prou con secuestrar-lo, sino que a os pocos días l’aplican o rechimen FIES, que suposa entre muitas atras cosetas a intervención de todas as comunicacions, bi incluidas as que tiene con familia y advogau, restriccions severas, hostigamientos… Una garchola adintro d’a garchola, declarau ilegal no fa guaire y denunciau por a-saber-lo organismos a ran mundial. A escalada represiva va dillá, adedicar a Brigada d’Información t’acudir ta domicilios, ta puestos de treballos y a fer seguimientos a quantos amigos d’Alfon por o simple feito d’haber-le escrito a la garchola.

L’Audiencia ha refusau o recurso contra a garchola preventiva, acceptando a ilegalidat de l’alarma social como prencipal motivo, pero inventar-se agora o de risgo de fuyida, o mesmo que o propio fiscal reconoixió no existir dende o prencipio. No solament existe montache policial alimentau por intréses politicos, sino cobertura chudicial ta levar-lo a cabo.

Ye muit facil engarcholar y torturar a un choven de clase obrera, mientres politicos y interpresarios corruptos desfrutan de impunidat total u mientres l’Estau indulta a miembros d’as fuerzas de seguranza acusaus de torturas.

Ye por tot ixo que familiars, amigos y companyers d’Alfon, asinas como todas as organizacions y colectivos sinyants, exichimos a suya libertat immediata y l’absolución de totz os detenius o 14-N.

Por tu, por yo, por totz os presos politicos.

Alfon Libertat! Prou de montaches policials!



Vada? Agora lo tiengo esclatero, prou que en foi!
Novembre 13, 2012, 2:50 pm
Filed under: Social, Solidaridat | Etiquetes: ,

Por Julia Barrau

A mia cabeza ha bulliu istos zaguers dias en tener as mias dubdas sobre a vada. Ganas de fer-ne siempre he tenidas, pero a qüestion que m’embolicaba o tozuelo y no me deixaba dar o trango enta debant yeran as conseqüencias sobre o mio treballo. A ormino nos trobamos entrepuces que nos fa miedo blincar, no cal que un empenton.

Tot indo t’o treballo iste maitin, he furtau una charrada en o tramvia d’un mesache que levaba a chapa contra os retalles en l’amostranza, as estixeras d’a marea verda. Ell treballaria maitin, lo teneba esclatero, no quereba perder os diners d’ixe dia sin treballar… y sisquia tenese una zarrallaria ta plenar-se as pochas ubrindo cerrullos embozaus.

Tot chentando en o treballo, he furtau unatra charrada, en a mesa dezaga de yo. Repaso cheneral a la sanidat, l’amostranza… tot no ye tant mal como pareixe, una vada no cal. Amas de perder os diners d’ixe dia sin treballar… pero ta malfurriar-ne en loteria de nadal, os que sigan menester!

De charradas en he sentiu mas, pero istas dos son estadas l’empenton que me caleba. He preso una decision, maitin fere vada.

Maitin no ire t’o mio treballo, no quiero trobar-me con ista chent ni en o tramvia ni en a interpresa a on que treballo. Maitin, o dia que se baralla a dignidat, quiero foter-me-lo en a carrera chunto a la mia parella que no troba treballo, chunto a os amigos mios que fan vada u son en l’ature, chunto a mis pais y chunto a muitos companyers espachaus de casa suya, precarios, sin ature…

He preso una decision. Agora lo tiengo esclatero, yo foi vada.



Solidaridat (Labradors y obrers)
Juliol 7, 2012, 11:39 am
Filed under: Mosica, Solidaridat | Etiquetes: , , ,

A canta orichinal ye d’Angelic Upstarts y se diz Solidarity, pero ye estada versionada por a-saber-lo collas como IV Reich, Oi! the Arrase u Chicharrica (a letra ye d’istas zaguers versions)

Como esclaus dia y nueit asti son
treballando ta poder sobrevivir
con un radiu chornal
que no plega a final de mes
o tirano imple de dolars a suya mansion

En a unidat, revolucion y en a igualdat
de labradors y obrers d’a ciudat
l’aladro se torna espada ta luitar y
o martiello se torna en arma de libertat

Yo se que a nuestra luita ye en a unidat
y que negras porras no nos feran callar
luitaremos con esprito de libertat
por o camin que femos en caminar

En a unidat, revolucion y en a igualdat
de labradors y obrers d’a ciudat
l’aladro se torna espada ta luitar y
o martiello se torna en arma de libertat

Bi ha patrons que tremolan en o suyo trono
pues saben que o suyo reino va a cayer
eternos opresors d’o pueblo, humils pobres
a vuestra eternidat, tiene una fin

En a unidat, revolucion y en a igualdat
de labradors y obrers d’a ciudat
l’aladro se torna espada ta luitar y
o martiello se torna en arma de libertat

Como esclaus diya y nueit asti son
treballando ta poder sobrevivir
a columnas d’o suyo imperio
s’esboldregan sobre os suyos amos
viellas cadenas que nos oprimen, se crebaran

En a unidat, revolucion y en a igualdat
de labradors y obrers d’a ciudat
l’aladro se torna espada ta luitar y
o martiello se torna en arma de libertat



Vada, vaga, huelga
Març 30, 2012, 10:42 am
Filed under: Social, Solidaridat | Etiquetes: , ,

Quiero una vada do vaigamos totz.
Una vada de brazos, garras, de pelos,
una vada naixendo en cada cuerpo.

Quiero una vada
d’obrers de palomas
de chofers de flors
de tecnicos de ninos
de medicos de mullers.

Quiero una vada gran,
que dica l’amor aconsiga.
Una vada do tot s’ature,
o reloch as fabricas
o tot os colechios
o bus os hespitals
a carretera os puertos.

Una vada de uellos, de mans y de pochons,
Una vada do alentar no sia permitiu,
una vada do naixca o silencio
ta sentir os trangos d’o tirano que marcha.

Gioconda Belli