Fendo Orella 101.8 FM


Especial Luenga Materna con Ca-2 Radio
Abril 10, 2015, 8:36 am
Filed under: Cultura, Fendo Orella, Luenga | Etiquetes: , ,

O pasau 19 de febrero faciemos un programa especial con motivo d’o Diya d’a Luenga Materna en o que contemos con uns convidaus de luxo: os zagals de Cados Radio!

Lucía, Raquel, Juan y Pablo nos contón cuentos en a suya luenga, nos comentoron qué suposa ta ells que l’aragonés no s’amostre en a escuela y dimpués sus pais facioron a charrada sobre o dificil que ye estar pai aragonesofablant (difícil, sí, pero no imposible!!)

Ah! Y tot amenizau por as suyas cantas favoritas!! No tos podetz perder iste programa, si garra dubda, un d’os millors Fendo Orellas que hetz sentiu nunca!

Ta ascuitar o programa pencha aquí



Fendo Orella se’n va de vacanzas

Ahiere estió o nuestro zaguer programa d’a temporada y teniemos a honor de tener a Tío Vadillo con nusatros con qui faciemos un chicot repaso d’a temporada y o sucediu.

Tamién charremos d’o prencipio d’a XXVI Semana Cultural d’a Madalena y de leyendas aragonesas y os suyos personaches, y ta que practiquetz una mica mas l’aragonés, bells refrans chistavins.

Tos comentemos o concurset ta que ganetz una dentrada t’o concierto de Fermín Muguruza d’iste sabado en Tudela, con dos dentradas en chuego. Hetz de fer un comentario en o nuestro blog metendo-ie bell enlaz a bella canta de Fermín Muguruza, y os dos primers, las ganarán.

Y antiparti, se despidió atro d’os nuestros companyers y lo fació con a canta traducida a l’aragonés “La vida sense tu” d’Obrint Pas.

Ascuita aquí o programa.

Dimpués d’o verano asperamos trobar-nos a l’atro costau d’as ondas libres, en Radio Topo, 101.8 FM Zaragoza!



XX Chornadas d’as Luengas d’Aragón
Mai 4, 2013, 8:58 am
Filed under: Aragon, Cultura, Luenga | Etiquetes: , , ,

Hue empecipian as XX Chornadas d’as Luengas d’Aragón. No puetz perder-te-las!

-Sabado 4 de mayo en a plaza de C.M.A. Las Armas (Plza. Las Armas, 66)
11:00h Clase d’aragonés, palotiau, chuegos ta ninos, mercadet d’asociacions, socalce…
20:00h Concierto con Prau, Vietato Pensare y La Vidriera Irreverente.

Charradas en o Centro Chuaquín Roncal (Pza. San Braulio, 5-7) totz os diyas a las 19:30h

-Lunes 6 de mayo,:
Experiencia d’o primer Centro lingüistico feito en Aragón.
Ponent: Chorche Paniello
-Martes 7 de mayo:  Presentación d’o libro Tradiciones, costumbres y lengua en Fuencalderas.
Ponents: José Arbués, Fernando Romanos y Chusé Raúl Usón.
-Miércols 8 de mayo:
Gartxot, Largometrache d’animación en euskera. Soztitolau en aragonés por Fernando Romanos y Chabi Lozano.
Ponents: Asisko y Mixel, guionistas y directors. (www.gartxotfilma.com)
-Chueves 9 de mayo:
Atras luengas minoritarias en Aragón.
Ponents: Asociación Zarabene (Senegal) y Asociación cultural Raíces Andinas (Bolivia)
-Viernes 10 de mayo:
L’asturianu, luenga chirmana de l’aragonés.
Ponent: Carlos Pulgar, d’a Xunta pola esfensa de la llingua asturiana


Presentación d’o comic en aragonés: “Harry Clever, o detective más peligarcero d’a ciudat”
Mai 2, 2013, 12:08 pm
Filed under: Aragon, Cultura, Luenga | Etiquetes: , ,

Chueves 2 de mayo a las 20:00 en a librería “Pantera Rosa” (Carrera San Vicente de Paúl, 28) ferá a presentación o periodista Óscar Senar y os autors. A las 21:00 Brenda dimpués d’a presentación en “A Flama” (Carrera Mayor, 53)

Harry Clever ye o detective más peligarcero d’a ciudat.

Creyau fa más de 15 anyadas por o dibuixant Chema Cebolla ta la revista 451º, iste anti-heroe ye una sarcastica mofla d’aquells detectives privaus, balloqueros, traicioners y mullerers que fan parte d’o chenero d’o cine negro d’o Hollywood d’os anyos 40 y 50 d’o sieglo pasau.

Collas de gangsters, presecucions d’autos, carrerons foscos, zarracuchos afogaus en o fumo de tabaco, polidas mullers que nomás se veyen como obchetos, combates de boxeo achustaus…Totz istos ingredients, de mal estomacar, fan parte d’a vida cutiana de Harry Clever.

Con os suyos muitos defectos y pocas virtutz Harry Clever esboldrega a l’arreu totz os mitos d’a novela policiaca.

S’ha dito que Harry Clever ye un personache “noir”, tamién que Harry Clever ye un tebeo muito “pulp”, pero de lo que no bi ha garra dubda ye de que Harry Clever ye o detective más peligarcero d’a ciudat.



Emisión especial d’estrela a estrela (2)
Novembre 30, 2012, 4:09 pm
Filed under: Luenga, Radio Topo | Etiquetes: ,

Un forau en o gudron d’una carrera, qualsiquier carrera d’ista ciudat. Un chito bi creix con os suyos quatro petalos. Quatro febles petalos royos que ya acucutan enta alto. Feble flor naixida d’una simient que viacho en o melico d’o cierzo. Mala yerba que creix con o permiso de dengun. Mala yerba que fa tranya en ista feble luenga de quatro petalos. Continamos con a delera d’emplir-lo tot de flors. Que o cierzo bufe concietero, que a simient viache enta qualsiquier forau de qualsiquier carrera d’ista ciudat. Que l’anyo venient tornen a acucutar os suyos quatro febles petalos royos.

http://www.youtube.com/watch?v=Mto5I2ITgmA

A simient creix y iste anyo creixen tamién as horas d’emisión y o numero de programas. Creixemos enta alto, febles pero argüellosas. Blincaremos por alto d’as dotze horas d’a pasada edición.

Maitín sabado 1 d’aviento en Radio Topo 101.8 FM emitiremos de raso en aragonés. Empliremos tot de flors royas, de quatro petalos, con a segunda emisión d’estrela a estrela.

Luen d’intreses comercials, Radio Topo 101.8 FM, radio libre zaragozana que emite dende fa ya 19 anyadas, prene ista iniciativa por segundo anyo, en esfensa de todas as luengas minorizadas como patrimonio d’a humanidat y en concreto de l’aragonés como luenga con mayor risque de desapareixer de toda Europa, y tos convida a que faigatz parti d’ella sentindo-la, escribindo por mail u gritando a o telefono 976 29 13 98.

Ascuíta-nos en o 101.8 d’a freqüencia modulada u a traviés d’internet

¿Cómo ascuitar Radio Topo 101.8 FM por internet?

Ye de buen fer, puncha en o vinclo d’alto que se diz “Streaming” Malas que i punches s’ubrirá un vinclo que has d’ubrir con bell reproductor de soniu que tiengas en l’ordinador tuyo.

Atra opción ye que ubras dreitament o vinclo d’o streaming (http://lorenzo.traci.es/icecast/rtopo.mp3) en o tuyo reproductor de soniu.

Horarios y conteníus

En ista segunda edición amaitinamos más y se nos ferá mas tardi. No somos todas as que hébanos quiesto estar-ie en primerías,  a la fin nomás que as que hemos puesto… Si fa u no fa 15 horas d’emisión de raso en aragonés en un total de 16 programas, un buen zarpau d’ista emisora que ferán un especial adequando os conteníus suyos a l’aragonés (belún mesmo torna de propio ta ista emisión) y programas tamién d’atras Radios Libres d’a ciudat que han quiesto adhibir-se a ista emisión.

Sona o revel
O programa rei d’os maitins d’a nuestra emisora, El Kantamañanas, ferá sonar o revel en un programa especial con convidaus como por eixemplo a Escuela d’aragonés Nogará.
De 8 a 9 horas

Esfendemos a tierra
Prochectos de barra a barra d’Aragón que miran d’estricallar-lo.
De 9 a 10 horas

El Rocktubernio
Especial d’o programa musical de Radio Topo, en aragonés. O millor rock d’a ciudat!
De 10 a 11 horas

La Cañería
Torna de propio ta ista emisión o mitico programa de Radio Topo que se feba “con los fondos reservados de Ecologistas en Acción”
De 11 a 12 horas

Radio Chabolo
Programa d’as companyeras d’ista Radio Libre que emite dende o CSO Kike Mur.
De 12 a 13 horas

Mosica disident
Mosica en directo, entrevistas y lo que siga menester.
De 13 a 14 horas

Kaldo de Cultivo
Especial en aragonés d’o programa que Farmacriticxs fa en Radio Topo. Un analís a la sanidat rural con una fablant patrimonial chesa.
De 14 a 14:30 horas

Rueda Libre
Especial en aragonés d’o programa que o colectivo Pedalea fa en Radio Topo. Salut y buen pedal!
De 14:30 a 15 horas

Radio La Granja
Programa d’as companyeras d’ista Radio Libre que emite dende o vico de Sant Chusé.
De 15 a 16 horas

Decreiximiento u barbarie
Teoría y practica sobre o decreiximiento, ¿qué ye isto? ¿ta qué fa honra?
De 16 a 17 horas

Fendo Orella
Programa de Radio Topo, como siempre en aragones. Rufierta con convidaus sinyalers d’o mundo de l’aragonés.
De 17 a 18 horas

Fillos de l’Angunia
Hijos del Agobio de Radio Topo. Ista anyada, programa especial sobre punk aragonés.
De 18 a 19 horas

El Acorazado Topemkin
Programa de Radio Topo, especial en aragonés. Noticias a canyonazos.
De 19 a 20 horas

A Liedrera
La Enredadera de Radio Topo, en aragonés y a rebutir de contenius: teyatro, mosica en directo, entrevista a Ánchel Conte, nombres de carreras y asinas-asinas.
De 20 a 21 horas

Made in Aragon
Programa con dos historiadors que tractarán as esferras culturals en o patrimonio aragonés.
De 21 a 22 horas

L’Acrataire
El Acratador de Radio Topo en aragones. Programa que dende fa mas de vint anyos fa chent d’o CSA La Revuelta.
De 22 a 22:30 horas

Despedida
22:30 …y en rematar feremos una fiesta en l’Avv Arrebato (C/ Palafox), i sotz totz y todas convidadas!



Fendo Orella 15-03-2012
Març 16, 2012, 9:43 am
Filed under: Fendo Orella, Radio Topo, Tecnolochia | Etiquetes: , ,

Baixa-te-ne u ascuita o nuestro zaguer programa:

Que delito ye o furto d’un banco comparau con o feito de fundar-ne un?

Con istas parolas de l’anarquista de Cascant Lucio Urtubia encetemos o programa, acompanyaus ista vegada por dos convidaus complegaus de mundos esferents, como gosa dicir-se la uno d’a branca de sciencias y l’atro de letras, totz dos responsables de que l’aragones faiga tranya en o mundo d’as nuevas tecnolochias.

Nos fotiemos tot o programa charrando con ells d’o traductor y corrector d’aragones que han desembolicau, de ferramientas libres y d’as nuevas posibilidatz que s’ubren ta l’aragones con istas tecnolochias.

Mosicalment ascuitemos a os valencians Aspencat, que han quitau un nuevo treballo clamau Inèdit y que tos presentaremos mas enta debant. Nos despidiemos con una canta traducida de La Polla Records.



Fendo Orella 5-1-12
gener 6, 2012, 12:27 pm
Filed under: Fendo Orella, Radio Topo | Etiquetes: , , , ,

A mía voz
tremola con os aires,
brila con o sol,
se chela con os cierzos,
s’aflama con as calors…

A mía voz ye a de tu
y a d’ixa chent
que no conoixemos
ni tu ni yo.

Ye a vida de nusatros,
d’os que mos fa mal
o corazón,
d’os que encara semos ninons
con o peso d’as anyadas
y as arrugas d’o dolor…

A mia voz
-en tiengo encara de voz?-
ye de tu, amigo,
no la deixes morir en yo.

No deixetz morir a mía voz. Anchel Conte

Baixa-te-ne u ascuita o nuestro zaguer programa:

Primer programa d’ista anyada 2012 en o que i charremos d’o diario dichital en aragonés “Arredol” con un miembro d’iste prochecto. Tamién nos amanamos ta Euskal Herria a cuenta d’a manifestación internacional d’o 7 de chinero a favor d’os presos y presas politicas bascas, ta continar fendo camín ent’a paz. Una muerte en una detención d’os mossos d’esquadra y noticietas de l’aragonés plenoron a resta d’o programa, con mosica de Temps al Temps y Soziedad Alkohólika, rematando con Dixebra.

Remera que emitimos totz os chueves en Radio Topo, 101.8 d’a freqüencia modulada zaragozana, de 18 a 19 horas. Y que tamien puedes ascuitar-nos en directo en o ret a travies d’a web de Radio Topo u en as reemisions de Radio Chabolo 107.6 FM os viernes de 17 a 18 horas.



Vadillo rebla con a Lei de Luengas
Desembre 28, 2011, 3:57 pm
Filed under: Aragon, Cultura, Luenga | Etiquetes: , , ,

L’actual director cheneral de Cultura d’o Gubierno d’Aragón, Humberto Vadillo, retacula y continará con l’aplicación d’a Lei de Luengas seguntes unas declaracions feitas ahier martes en un conoixiu restaurant d’a capital aragonesa.

Seguntes o propio Vadillo, se dará treslau oficialment a o Consello Superior d’as Luengas, organo creyau a radiz d’ista lei a pasada lechislatura, ta que contine “antes con antes” con a suya actividat, y aspera que as academias puedan estar funcionando de tot “antes de l’ature d’o verano de 2012”

Dimpués d’unas semanas de debatz internos cusiraus por Dolores Serrat, Francisco Bono y Luisa Fernanda Rudi, han trancau as linias d’un acuerdo que conta con o visto bueno d’o socio de gubierno “en parolas d’o propio José Ángel Biel”

En o bell meyo d’a crisi y en una lechislatura tacada por os retalles, afirmó que “continar con l’aplicación d’a lei suposaría un gasto zero” y que mesmo s’asperaba a creyación de bells puestos de treballo “en un horizont de quatro anyos”

Seguntes s’ha puesto saber, a presión feita por prestichiosos fablants patrimonials d’aragonés como l’expresident d’o Consorcio Expo 2008 Roque Gistau, natural de Bielsa, u l’expresident José María Mur, naixiu de Chistén, y de figuras tant sinyaleras como Marcelino Iglesias, naixiu de Bonansa, u a propia Dolores Serrat, naixida de Ripoll en o caso d’o catalán, han feito venir a plego a o director cheneral de Cultura.

A fosca chestión d’a suya demba y a polemica por as suyas declaracions previas a o cargo que ocupa actualment, fación que istas declaracions trucasen o ficacio d’os meyos de comunicación que se trobaban en o parking d’o restaurant “El Cachirulo” ta cubrir a celebración d’o XVIII Campionato Internacional de Morra, conqueriu por Aragón o pasau mes de noviembre en Corcega.

Humberto se despidió agredeixendo a os meyos l’atención, y antes de no dentrar en l’auto que l’asperaba adhibió “muitas gracias” en aragonés, “moltes gràcies” en catalán y “qatlho” en Klingon, un cenyo ta muitos parau d’antes, que metió a fin a una cena que seguntes podió saber-se-ne dimpués, bosó o propio Vadillo en perder una apuesta.

Ista breu información que ha feito brilar os uellos d’asperanza a muitos aragoneses s’enamplará en una rueda de prensa convocada t’os meyos huei miercols 28 d’aviento de 2011.



Fendo Orella 15-12-2011

¿Por que se que vivimos en o primer mundo?

Porque ta puyar as tasament 20 escalaretas que bi ha entre o branquil de casa mía y a primer planta, os míos vecins fan servir l’ascensor.

Baixa-te-ne u ascuita dende o ret o nuestro zaguer programa:

China-chana l’anyo va acotolando-se, en iste debant de debantzaguer programa de 2011 teniemos noticietas de l’aragones, asturiano, represion con a detencion d’o periodista Edu Leon, 20 d’aviento en Zaragoza y Uesca, pobreza infantil, respuesta d’o SAT a Cayetano de Alba y regalemos papeletas t’a rifa en refirme de Xaloa Telebista, television d’a que tos charremos fa bells programas.

Mosicalment presentemos o nuevo treballo de Kase.O, Jazz Magnetism, y traduciemos una canta suya a l’aragones ta rematar o programa.

Remera que emitimos totz os chueves en Radio Topo, 101.8 d’a freqüencia modulada zaragozana, de 18 a 19 horas. Y que tamien puedes ascuitar-nos en directo en o ret a travies d’a web de Radio Topo u en as reemisions de Radio Chabolo 107.6 FM os viernes de 17 a 18 horas.



Una luenga que no se puede tallar
Novembre 3, 2011, 11:39 am
Filed under: Aragon, Cultura, Luenga, Social | Etiquetes: , , ,

http://arainfo.org/?p=316

Fernando Estabén Vallespín

O mundo de l’aragonés pareixe que nunca no puede estar en calma, siempre en un contino tierratremo. Si no ye per uns, ye per atros. Iste verano pasau conoixemos a o nuevo Gubierno d’Aragón, presidiu por Luisa F. Rudi d’o PP, que en o que importa a las luengas d’Aragón metió a Dolores Serrat como Consellera de Cultura y a un tal Humberto Vadillo como Director Cheneral de Cultura.

Iste sinyor, con un curriculum nulo ta un puesto como ixe, fació unas declaracions sobre a cultura y sobre l’aragonés (antis d’estar nombrau en o suyo actual cargo) que han produciu un chilo quasi unanime en o mundo d’a cultura aragonesa en contra d’iste nombramiento. Nos centraremos en o que respecta a l’aragonés.

Iste sinyor, en o suyo twitter (cudiadosament borrau mas tardi ta no deixar bayo, encara que prou chent ha puesto guardar as prebas) deciba, sin mica vergüenya:

“HumbertoZgz Si eres capaz de presentarme un sólo hablante nativo de aragonés (no modalidades) os invito a comer en El Cachirulo.
HumbertoZgz Dicho de otra forma el aragonés existe como el Klingorn. Es un invento (y estoy seguro de que el klingorn lo habla más gente)
HumbertoZgz Me parece bien q la gente se entretenga con el aragonés o el Alto ëlfico, me basta con q no quieran pagarlo con mi dinero
HumbertoZgz En Aragón hay más hablantes de Klingorn que de “lengua aragonesa” q para empezar no existe.
HumbertoZgz Van a enseñar “lengua aragonesa” en la “Facultad” de Huesca. Cada día más tontos.”

Podemos viyer o desprecio total ent’a luenga aragonesa y os suyos fablants. Talment Vadillo (y atras personas d’o suyo partiu) no sepan d’a existencia d’a sciencia clamada Filolochía, que estudia precisament as luengas, y que precisament, l’aragonés ye considerada una luenga mas d’as miles que n’i hai en o mundo, no un conchunto de variedatz esferents como deciba o President d’a RAE (Reyal Academia d’a Luenga Espanyola), l’aragonés Blecua, en una recient entrevista en un meyo de comunicación aragonés. Que un ansotano y un benasqués no se pueden comunicar? Que no ye a mesma luenga? Talment Vadillo y os suyos companyers/as tiengan o titol de Filolochía, n’haigan feito mil postgraus y haigan descubierto o que a resta de scientificos d’a disciplina no han feito, encara que si ye con istos argumentos, sería millor que no’n decisen brenca, ta no fer o ridiculo. Continua llegint