Fendo Orella 101.8 FM


Con MullersYCordials, iste 8 de chinero
gener 9, 2015, 2:38 pm
Filed under: Fendo Orella | Etiquetes: , , ,

mullersycordials

Iste 8 de chinero hemos contau con a presencia de MullersYCordials, un magazine feminista feito de raso en aragonés, que en breus ferá a suya primera anyada, en habendo quitau cinco numers. Un programa que no tos hetz de perder! Las podetz seguir en o facebook ‘Mullers YCordials’ y en o twitter ‘@MYCfanzine’. Tamién hemos feito un chicot homenache a Charlie Hebdo.

https://archive.org/embed/FendoOrella.08.01.2015

Fendo Orella, en Radio Tabonero (Radio Topo), os chueves de 18:30 a 19:30 en o 101.8 FM de Zaragoza.



Manifiesto feminista de Sol
Mai 24, 2011, 9:02 am
Filed under: Internacional, Social | Etiquetes: , , ,

Somos en a plaza porque:

  • Queremos una sociedat en a que o centro sigan as personas y no pas os mercaus. Por ixo decimos: servicios publicos de baldes y vitals como a educación, a salut, l’atención y cudiau a la nineza y a las personas con necesidatz especials d’atención frent a os retalles socials, a reforma laboral y d’as pensions.
  • Queremos o compromís de todas y totz ta la construcción d’una sociedat do no cullan as violencias masclistas en todas as suyas expresions: economica, estetica, laboral, fisica, psicolochica, sexual, institucional, relichiosa, en traza de tracta con fins d’explotacion laboral y sexual…
  • Queremos decidir librement sobre o nuestro cuerpo, desfrutar y relacionar-nos con ell y con qui nos pete.
  • Queremos aborto libre y de baldes y educación afectiva y sexual.
  • Queremos una sociedat diversa do se respecten as multiples trazas de vivir o sexo y a sexualidat (lesbianas, gais, intersexuals, bisexuals, transexuals, transcheners…) y se bi reconoixca o dreito a la sexualidat en todas as etapas d’a vida. Desichimos a despatolochización d’as identidatz trans.
  • Desichimos que l’estau y a iglesia deixen d’interferir en as nuestras vidas.
  • Ta fer un cambeo real en a sociedat cal prener as decisions por consenso y que as mullers bi participen de traza decisiva.
  • Ye imprescindible incorporar una anvista feminista en a transformación d’o modelo economico y social a o servicio d’as personas y o planeta, en os servicios publicos, en a creyación d’atro modelo de ciudat y chestión d’o territorio y, en as politicas ambientals y agroalimentarias.
  • Ye imprescindible que as mullers sigan protagonistas en ditos procesos de transformación social, politica y economica y en as decisions que se prengan ta ista fin. Y tamién en o disenyo, execución y evaluación d’as politicas resultants.
  • Os temas que afectan a las mullers afectan a toda la sociedat y queremos que sigan en o preto de l’achenda politica, economica y social.
  • Desichimos que as treballaderas domesticas y de l’hogar se incluigan en o rechimen cheneral d’a seguridat social y tiengan dreito a negociación colectiva.
  • Desichimos que se contabilice o treballo domestico como parti d’a riqueza d’os países.
  • Desichimos o reconoiximiento d’as fainas de cudiau d’as personas, os hogars, a vida y a suya socialización completa: tamién, o dreito a decidir librement si queremos u no cudiar, o dreito a estar cudiadas y cudiaus en condicions y o dreito a l’autocudiau. En resumen, o dreito a la Cuidadanía.
  • Desichimos o reparto d’os treballos y a riqueza. Treballar menos ta treballar todas y totz. Condicions laborals y profesionals dignas. Reparto igualitario d’o treballo productivo y reproductivo, igual remuneración y reconoiximiento por os treballos entre mullers y hombres. Y que a riqueza siga a o servicio d’as clases populars.
  • Desichimos o reconoiximiento d’os dreitos d’as treballaderas sexuals.
  • Desichimos que se reconoixca la ciudadanía d’as personas sin condicions legals ni normativas, a eliminación d’a Ley de Extranjería y d’os Centros de Internamiento de Extranjeros.
  • Desichimos l’emplego d’un parlache que nombre a todas as personas y siga libre d’homofobia, masclismo, clasismo y racismo.
  • Reivindicamos que se valore y reconoixca os sabers y conoiximientos d’as mullers y a suya función primordial como transmisoras de cultura.
  • Queremos una escuela coeducativa.
  • Queremos una sociedat do cullan toda mena de familias y collas de convivencia.
  • Refusamos a heteronormatividat y feminidat obligatoria.
  • Somos contra las guerras, refusamos l’emplego d’o cuerpo d’as mullers como arma de guerra y no creyemos que denguna intervención militar guarancie a paz. No a la militarización d’as sociedatz, a la producción y a o comercio d’armas. Convidamos a fer obchección fiscal.
  • Reivindicamos a solidaridat transnacional feminista como ferramienta ta cambear o mundo. En todas as plazas bi ha feministas indignadas, nos adhibimos a las suyas reivindicacions y les damos tot o nuestro refirme.

¡Sin as mullers no bi ha Revolución!
¡A Revolución estará feminista u no’n estará!



Nos han sacau o diya, pero no pas a Boz. Sobre o 8 de Marzo
Març 7, 2008, 10:08 pm
Filed under: Sozial | Etiquetes: , ,

O 8 de marzo ye o diya istorico d’a zelebrazión internazional d’as luitas d’as mullers. Estiaño consona con a chornada de reflexión y a Delegazión de Gubierno de Madrit y o Tribunal Superior de Chustizia de Madrit han considerau que a suya zelebración “puede crebrar o menester clima de reflexión y de neutralidat ideolochica”. Argumentan que podemos biolentar o libre echerzizio d’o dreito de sufrachio… Y por ixo ye lechitimo mugar o nuestro dreito de reunión y manifestazión; cuartando lo nuestro libre deseyo d’estar en as carreras, rebindicando-ie lo muito que encara nos ne manca de conseguir y festellando chuntas lo lograu.

Somos debán d’una topetada de dreitos, dizen. Somos debán d’una pillada más d’os dreitos de siempre, os d’as mullers, dezimos nusatras.

Azeptar que as mullers abemos boz propia y deseyamos chilar-la o diya 8, sin estar ligadas ta garra compromís partidista, ixo fa mal. Porque suposa sentir-nos, y suposa que no pueden fernos serbir ta joriar os suyos suposaus meritos en pro d’a igualdat, igual como sí en ferán o diya 7.
Continua llegint