Si dezimos que no corren buenos tiempos de seguras que ya no ye notizia ta dengún, os sintomas d’ista crisis cada begada son más plateros y istos, como no, afectan a os de cutio; chobens, treballadors, estudians, paraus… Debán d’ista situazión parixe que a clase politica, mas que una soluzión reyal, lo que buscan son apaños ta mantener como siga o sistema que esfiende de raso, a maxima de: “o rico mas rico, o pobre mas pobre”.
O Conzello de Zaragoza no ye ni muito menos una excepzión, ye un eixemplo esclatero d’una politica que ye prou luén d’estar sozial. No emos de parar cuenta que en o malfurrie reyalizau en a materializazión d’a Expo 2008, an que malfurrioron zientos de millons en un prochecto de mas que dudosa utilidat. Agora emos d’endurar istos exzesos en traza de retalles en presupuestos de gasto sozial, casas de chobentut trancadas y ature d’as obras en belunas d’ellas, más que más en o prochecto que se prebaba de fer en l’antiga farinera de San Chusé. No contentos con dixar-nos sin espazios do reyalizar as nuestras actibidaz, tamién nos tallan as pocas libertaz que tenébanos ta fer actibidaz en a carrera con a clamada ordenanza zebica, que bieda reyalizar actibidaz en a bia publica como cantar, minchar, fer malabars y amás, meyán piñoras, enrestidas, redadas, detenzions… Fa bels años ta concar-se con iste problema, se le dió bida a un local albandonau ta creyar-ie un zentro sozial, tot funzionando se i reyalizoron asabelo actibidaz ta chobens y mayors, cursez de baldes, zine, documentals, exposizions, tallers, y asinas asinas. Estió desaloixau en mayo de 2008 con trucazos y porrazos, Rasmia murió pero no pas nusatros.
Dimpués d’iste desaloix nos i emos chuniu más colectibos y más chén de todas as edaz, con más razons que no nunca ta continar luitando, t’alportar o nuestro granet d’arena en ista baralla de cutiano por cambiar a soziedat y a bida d’os chobens más que más. Un nuebo zentro sozial okupau ubre as suyas puertas ta dar bida a un espazio laso dende fa más de 10 años, con él naixen nuebas asperanzas y creixen ilusions, con él combidamos a tot o mundo a partizipar en iste prochecto de toz y todas.
Feu un comentari so far
Deixa un comentari
Fendo Orella 101.8 FM 